公共充電站慘變「斬線場」 用家隨時中伏
根據現場報導，多個零售商場、停車場、甚至高速公路旁嘅充電站都被賊人光顧，充電纜線俾人硬生生割斷，殘骸遺留地面。有用家怒斥：「揸住部電車去到現場，發現無線插，咁我架車點返屋企？」
部分盜竊案仲發生喺日間，人來人往地段，顯示賊人毫無顧忌。報導指出，犯罪集團為左獲取電線入面微量銅線，唔惜破壞設備，仲將銅線非法轉售俾黑市或網上平台，如Facebook Marketplace或eBay，圖利數十鎊。
但實情係，一條線入面嘅銅價值甚低，賊人最多賺幾鎊，但營運商每次維修卻需花費超過£1,000，整體損失驚人。
全國多間充電商齊中招 業界損失逾百萬英鎊
英國幾大充電營運商如InstaVolt、Osprey、RAW Charging等都公開表示，自2023年底以來，所屬充電點多次被破壞，單一公司損失已達£410,000，嚴重影響日常營運同客戶體驗。
有充電商表示，已經裝設CCTV、聲響感應器、甚至喺充電線入面加入可追蹤嘅「液體標記」，以阻嚇罪犯。不過成效有限，因為部分地點依然缺乏即時監察系統，導致賊人照偷不誤。
英國警方：屬新興罪案 正加強巡邏
當地警方表示，EV充電纜線盜竊係「新興犯罪」，犯案者多數屬有組織團伙，專針對偏僻地點落手。警方已經標註出高風險充電站，務求喺收到報案時可以更快介入，並與業界合作研究技術防範方案。
但直至目前為止，大多數案件都未有疑犯落網，破案率極低，令市民信心受創。
民間反應激烈：轉電車前諗清楚！
消息一出即引發網民熱議，有人留言：「咁都偷，英國治安真係唔敢恭維。」、「我都係死死地氣入咗EV，依家日日驚條線被割。」、「車充唔到＝死車，連返屋企都難。」
亦有人認為現時轉電車風險過高：「呢啲事喺香港根本唔會發生，英國反而似第三世界咁。」、「買EV之前，要做足功課，唔係只睇能源成本。」
專家建議：用家應選「帶線制」＋家充為主
針對盜竊潮，專家建議選用「帶自己充電線」（BYOC）設計嘅充電站，避免賊人直接偷線。同時應盡量安裝家用充電器，減少對公共設施依賴。對長途駕駛者而言，更應隨車預備便攜式充電線，並安裝App即時查詢充電站狀況，降低風險。
有廠商亦正研發更堅固難割嘅金屬纜線，結合報警器、GPS追蹤等防盜技術，希望遏止罪案。
刷GDP又贏一場
