復活節公眾假期是旅遊旺季，有港女今日（20日）凌晨在社交平台發帖，現場直擊參加一個由本港旅行社開辦、自稱「香港首創」高鐵專列的湖南旅行團，遇上大伏，出團上車才知有「600幾人」，「真心大癲！我以為去咗佢公司Annual dinner！」
她在帖文中嬲爆披露首日苦況，「做咩都要全部人（600多人）一齊做」，「餐廳洗手間完全超負荷！唔少人都去唔切洗手間！」
女事主今日（20日）凌晨在其個人社交平台Instagram及Threads發帖，表示現正參加本港一間旅行社的湖南團，團費3699元，她怒斥該團是「鴨仔團」「收600幾人...要一齊活動」，「又逼又趕，唔覺得開心！」
該湖南團共4日行程，在復活節公眾假期首日(18日)出發，並在假期結束當日（21日）回港，涉事旅行社在其社交平台聲稱「呢個長沙高鐵專列行程可以話係『香港首創』」，會為團友預留專區席座位，近距離欣賞煙花。
行程會前往長沙、瀏陽、衡陽，除「煙花盛典」，尚會參觀國家4A級旅遊景區、非遺項目、梯田及古桃花源等「人間仙境」等等。
「事先個個都唔知咁樣玩法，佢係等你上晒車先講」
該港女在帖文中批評旅行社隱瞞，未有在報團時告訴她們，直至上到高鐵才知道「原來係有十幾團，600幾人」，「事先個個都唔知咁樣玩法，佢係等你上晒車先講。」
她說本來預期四、五十人而已，但未料旅行社「狂收人」：「......都預咗幾十人一團，通常咪4至5團......600人齊上齊落真係冇諗過！」
她指出，旅行社「規定全部人一齊活動先大鑊，完全唔會食飯分開兩三間餐廳，或者景點分流或者分批去」。
600人齊上齊落真係冇諗過：菜全部凍上因為人太多
她表示，第一餐在高鐵食午餐，「啲菜全部凍上，因為人太多...600人...有啲團早咗，佢就開始上菜，所以擺到凍晒」。
她在帖文中再仔細披露首日苦況，「今日第一日，做咩都要全部人（即600多人）一齊做」。
「啲人完全搵唔返自己個導遊」
首個行程到博物館，「全部人塞係入面，本身個到又黑，地方又唔係大，啲人完全搵唔返自己個導遊。」
由於人太多，她們要「跑住睇」，女事主說：「我都唔知我睇咗啲乜！一味得個趕字！」
600人得3格女廁
到中午食飯時間，「又要全部人一齊，餐廳洗手間完全超負荷！唔少人都去唔切洗手間！」
她在回應網民提問時，談到數百人去洗手間的苦況，「600人，我就算當你三份一係女...都200人...但得三格女廁。」
她無奈表示：「你一個景點咁多人...都係忍一時...我係頂四日。」
「我以為去咗佢公司Annual dinner！」
到晚飯時間，她又要被「焗聽（該旅行社高層）感言」，「仲要我哋不停舉杯拍手，一係就不停賣廣告叫我哋join其他團！」
她批評：「你只係不停造勢要我哋配合你哋，有冇諗過其實搞到啲人好辛苦？」「真心大癲...我以為去咗佢公司Annual dinner！」
她形容這個團唯一的好處「係夠人多，可以包到（高鐵）專列，可以入閘快啲。That's all！」
團友多老人 網民：600人叫宋帝昺走難，何其壯觀
帖文引發熱烈迴響，不少網民驚訝竟安排600團友共同出團，而且一同活動：「600人那叫宋帝昺走難，何其壯觀。」「伏！」「600人真係太多。」「差啲以為你曲線講緊學校旅行。」
女事主回應表示：「我都係人生第一次跟團搞到咁。」她又交代該600名團友的背景：「係多老人...不過好多只係剛退休人士，亦有唔少中年情侶嚟玩，好明顯以為係hea團， (結果)中咗伏。」
？
