太陽報(昔日) SUN娛樂…本地娛樂
文： 音樂小組
12/06/2003
怒斥《壹週刊》間接殺死哥哥
阿梅維護霆鋒：係咪想逼死呢個細路！
謝霆鋒最近常與梅艷芳一同出席公開場合，被《壹週刊》指他搭上阿梅博宣傳。阿梅昨晚炮轟該周刊毫無公信力，是垃圾，又扯火大罵壹傳媒是殺手，間接殺死張國榮，她更以性命擔保，與壹傳媒誓不兩立！反觀霆鋒則拒談緋聞。
梅艷芳昨晚八時二十五抵達紅館，欣賞吳國敬演唱會，入場前阿梅主動向現場記者交代與霆鋒相戀的謠傳，期間阿梅愈說愈激動，並以自己性命作擔保，與壹傳媒誓不兩立！
記：記者 梅：梅艷芳
記：有冇俾報道嚇親？
梅：嚇唔到我，嚇親其他人。嗰本爛周刊冇公信力，好核突猥瑣，諗嗰啲人都要洗腦，我嬲嘅係《1:99音樂會》裏面嘅嘢，講到我哋好似有私人關係，抹煞咗做嘢嘅人，我喺呢個圈二十幾年，未驚過！不過咁對細路仔好唔公平，佢要面對咁多人。壹傳媒係殺手，係殺死哥哥（張國榮）嘅間接兇手！佢哋幾時會放過啲藝人？我用條命嚟講，同佢誓不兩立！所有嘅「壹系」！
「公道自在人心」
記：有冇同霆鋒傾電話？
梅：我同佢講清者自清，唔使嬲，又話畀佢重新做人，係咪要逼死呢個細路仔？（扯火）咩嘢社會呀，呢個係強權世界，《壹週刊》，呸！話畀你老細知，我同佢誓不兩立，哥哥嘅死，佢哋係兇手！
記：霆鋒唔開心？
梅：冇，我哋唔係上契，係結拜，係「壹系」寫先係契弟，做嗰啲係契弟，肥佬黎（黎智英）唔係契弟，（冷笑一聲）係乜就唔使講。
記：會唔會告佢哋？
梅：（愈講愈激氣）使乜告，公道自在人心！我唔係十八廿二，擺我上枱，我唔怕任何人，有本事叫佢（肥佬黎）出嚟，我今日嚟係咪又同阿敬（吳國敬）有嘢？即係我任何地方都唔使去，對任何人唔公平，對娛樂圈、對我嘅徒弟，對我就唔使講，對霆鋒冇公平過，其實我不屑回應，嘥氣！其實我唔想蓋過阿敬嘅演唱會，睇吓有冇人信囉！垃圾周刊，垃圾！
記：霆鋒都嚟睇喎？
梅：係咩？冇所謂，我係嚟捧阿敬場，我唔會因為呢件事影響我同霆鋒任何關係，佢只係小朋友，我孭得起，以後發生任何事，我都孭得起，我冇做過任何嘢，核突嘅係佢哋！
記：霆鋒成日同你一齊，你哋係咪好夾？
梅：又話畀機會佢重新做人，乜嘢叫畀機會，香港係自由社會，有畀人改過咩？我係幫佢。
馴服霆鋒唔容易
記：你哋交往好密？
梅：我開會係幫佢，我可能會幫佢拍MV，本來唔想講，我係幫啲要幫嘅人，唔係只係霆鋒，嚟緊有首歌幫佢監製。尋日（即前日）係喺屋企開會，唔通開P（派對）咩？
記：你好撐佢喎？
梅：搵到一個肯聽話嘅人，霆鋒脾氣係反叛，要馴服唔係咁易，報道又變咗另一回事，好惡心，我警告《壹週刊》，唔好再上我屋企，有幾架狗車（狗仔隊採訪車）喺樓下，入埋大閘上埋樓，我會當佢哋賊扮，我會用棍毆佢，用車車佢！打劫標參都會入佢數，唔識法律搵法律援助處，入私人地方係犯法㗎！
期間有記者安撫阿梅，當阿梅反問對方是哪間報館時，該記者表示是《忽然1周》，阿梅便說：「唔使講，唔會回應，叫你哋手足唔好行埋我度，我驚噤唔住脾氣。」語畢便入場欣賞阿敬演唱會。
你睇下自由之子嗰班 
