阿史近排睇新聞，見到有小朋友將幾層樓高嘅石壆當係滑梯咁「sir」，有網民大呼危險，亦都有網民話「童年回憶返晒嚟」。其實阿史以前細個都成日玩，貪呢啲「天然滑梯」夠高夠刺激。
「sir滑梯」我哋就講得多喇，咁究竟個「sir」字點寫？「sir」其實有音無字，「sir滑梯」正字其實係瀡滑梯，瀡讀作緒（seoi5），《玉篇》同《禮記·內則》都解作「滑」。古書入面，瀡經常同「滫」（音：手）字一齊出現，例如《覓燈因話》：「家貧，少營滫瀡，以養其母」，《鬼董》：「誰家贊中饋，滫瀡鳴金匙。」滫瀡可以解做淘米者，又可以係一種令食物變得柔軟、滑溜嘅方法。
#俗語大解剖