種牙 vs 杜牙根 vs 齋剝牙

小弟最近剝完下顎智慧齒之後發現智慧齒前面嗰隻大牙都蛀咗，牙齒建議補牙，不過補嘅時候都戴撚哂頭盔話因為蛀得太深，補完可能都會痛

補完頭一個月都完全唔痛，心諗今鋪大步檻過啦，仆你個街咁樣諗完之後第二日就開始痛

聽朋友講同上網見到種牙同杜牙根都有唔少失敗嘅例子，做完仲慘過唔做。而家喺到諗緊齋剝牙會唔會最好，但係又有d資訊話咁剝完下顎大牙之後上顎大牙會冇咗個承托 / 咬合唔正常

想問吓大家有冇類似嘅經歷？

杜牙根+做牙套

一樣情況 但我一黎就比牙醫叫左杜牙根 依家等上牙套

但我淨係剝左下顎一邊 另一邊未剝 牙醫話正常要剝埋上顎 唔係既話有機會佢會慢慢向下跌 會拮牙肉同埋會有條逢 有機會又會搞到易左蛀牙

智慧齒真係好撚麻煩

原來呢個情況好普遍，因為我就啱啱經歷完。
上年6月剝左下智齒，都係因為打斜生，所以頂到前一隻蛀牙，而且已經蛀得好深，我叫牙醫姑且一試照補，都係舒服左兩個禮拜又痛。
再睇牙醫就話，杜牙根都唔建議，因為程序上係鑽個窿先，但因蛀太深，驚隻牙結構上再開窿會可能散，雖則可落牙套，但都會無補於事。
加上見我牙肉都生左牙瘡，原來又係補唔到既地方有菌，結果一了百了，剝咗先講。
之後食8日抗生素止痛藥，今日係第十二日，暫時情況穩定

種同杜都試過 兩次都成功
Keep到隻牙就唔好種啦 可以杜就杜
大牙唔建議齋剝 應該會影響咀嚼
同埋啲冇左隻牙啲牙骨好似會萎縮（個牙醫咁講）
上次齋剝完因為covid遲左2年先種
個牙醫都話驚舊骨唔夠support啲粗啲嘅芯
建議你可以睇多幾個牙醫意見先決定 因為種左就一世

利申：都係聽我個牙醫up，唔知係咪100%岩

智慧齒同大牙條縫要用牙縫刷刷
牙線係無用清唔晒入面啲野，好易會發炎加蛀牙

好，咁都係睇吓杜唔杜到牙根先
上面有位ching話蛀得太深杜嚟都冇用，希望冇事啦

無論種牙定杜牙根，有啲醫生做得好，有啲得把口氹你落疊，講到尾都係個醫生有無料，同有無良心

痛就杜，我都杜左兩隻，用左8-9年都無問題，隻牙都算硬淨。整體而言，咀嚼個感覺同以前一樣，唔洗擔心。
不過要搵個手勢好嘅醫生，杜得唔徹底就手尾長。

牙醫話係慢性牙髓炎，隻牙本身蛀咗 入面牙髓會發炎，補牙材料會阻礙炎性滲出物排出，導致髓腔內壓力過大，引發慢性牙髓炎急性發作，搞到補牙後牙痛

我都係智慧齒頂到前面隻大牙蛀左
A牙醫話蛀得好深，不過都可以照補牙先
佢都有戴頭盔話補完仲痛就要杜牙根
隔左4個月，補過隻牙開始少痛
去睇B牙醫，佢幫我照x光
話大牙蝕蛀的程度未去到牙髓
一係繼續觀察，一係杜牙根
所以我都唔知呢家隻牙點解會痛