歡迎各位巴打、絲打，黎到今個星期既崇拜！
基督教連登堂2025年3月15日至3月22日主週崇拜
經文：出埃及記20:4-6
講題：唯獨你是不可取替
同工：Yellow, Laila, Isaac
歡迎巴絲打建議講題。
（一）祈禱
願毀謗既人冇盼望，願所有邪惡滅於一瞬間。
願你所有仇敵被速速剪除，願高傲都被連根拔起、打碎、消滅，好快係我地既日子當中降卑。
上主——你打碎仇敵，將高傲既降卑——你當受稱頌！
（二）讀經
出埃及記20:1-7
//1 神說了以下這一切的話：
2 “我是耶和華你的神，是我把你從埃及地、從為奴之家領出來。
3 “除我以外，你不可有別的神。
4 “你不可造雕像或任何形式的偶像，來代表天上、地下，或河海裡的東西；
5 不可向它們下拜，不可侍奉它們，因為我耶和華你的神是痛恨不忠的神；恨我的人，我追討他們的罪責，懲罰他們的兒子、第三代、第四代；
6 愛我、遵守我誡命的人，我以忠誠之愛對待他們，直到千代。
7 “不可利用耶和華你神的名弄虛作假，因為那利用他的名弄虛作假的人，耶和華不會免去責罰。//
（三）訊息
十句話(Decalogue)/十件事，通常稱為十誡，算係一段出名既聖經，連唔認識神既人都聽過。
今日簡短分享下，相對長既第二句話。呢一段入面，我會咁樣分：
第一句話：20:2-3
第二句話：20:4-6
第三句話：20:7
等等。
（1）重點係邊？
搵重點，通常有幾個方法：
a)一係最吸引自己去睇果樣（主觀領受）
b)一係上下文一直講緊既主題
c)一係重複既關鍵字
（唔建議用a)，因為咁係阻住自己睇b),c)。）
好多人一見到就聚焦係20:5下，去討論父債子還既問題（「恨我的人」又唔講），仲要去到三、四代，咁當然20:6就話神既忠誠之愛直到千代，向住愛佢、遵守佢誡命既人。相比之下，三、四代同千代，蚊髀同牛髀，當然冇得比。呢個係a) 既睇法得出既討論。
（2）從從（重重）複複
根據b），上下文都講緊上主。
而家根據 c）重新睇一次呢段經文。
有一個字，或者話係字母，連續出現左兩次，中文譯唔到出黎，收左係20:4 既「天上」入面。
呢個字係咁寫：ממעל (mi-ma'al)。
就算唔識字，都見到個字母מ (m)重複左。
呢個字母מ (m)係preposition，意思基本上係 「從、from 」，可以係from 一堆野揀其中、或者from 來源，或者away from ，等等。
至於על 'al ，就係「上」，之前睇燔祭（上升祭，利未記1章）既時侯就係咁出現。夾埋：
上面 על 'al
從上面 מעל ma'al
從從上面 ממעל mi-ma'al （20:4）
中文冇人咁講野，所以譯出黎「總之」就上面啦。（如果直譯英文，大概可以係 from among what is from (out of) above(出自上面既野既當中)，或者掉轉， from (out of) what is from among above（出自從上面當中既野）。我自己講完都覺得有D亂，總之就上面啦。）
（3）從背叛離開
既然有個唔太自然既重複，就值得深究。原來，有一個字係同音異意。
從上面 מעל ma'al (Strong Heb. 4605)
行事不忠/行事奸詐 מעל ma'al (Strong Heb. 4603)
離開（מ m, away from）不忠/奸詐既行為（מעל），係解得通既弦外之音。事實上，係出埃及既過程當中，以色列人一次又一次抱怨（15-17章），收取嗎哪食都唔聽話（16:20-28）。
神既說話（第二句）一矢中的。唯獨上主係以色列人既神，唔可以對佢不忠、奸詐。
（4）上天到下地
呢一節環譯比較譯意思，冇譯出另一個重複既字。
出埃及記20:4（和合本2010）
//「不可為自己雕刻偶像，也不可做甚麼形像，彷彿上天、下地和地底下水中的百物。//
「下」、「地」都講左兩次。呢個「下」，經文寫既係「從下」。
下 תחת tahat
從下 מתחת mi-tahat （20:4）
同一個「下」字，亦都有另一個意思，就係「取代、代替」。如上：
取替 תחת tahat
從取替離開 מתחת mi-tahat （20:4）
聖經暗示緊：唔好取代神，唔好取代神。冇錯，經文講左兩次。神既說話（第二句）一再叮囑。
（5）有咩取代神
邊度最容易搵到野取代神？天、地、水（河）入面，只有地講左兩次。地上面好多野都可以取代神既位置。
神係最終既倚靠，但係有人覺得有工有錢有樓先係。
神係最終既權威，但係有人覺得佢聽返黎既野先係。
神定義咩係「好」，但係有人唔理，自己做自己覺得好既事。
再數落去都蚊訓
自己好好係主入面反省下。
（6）痛恨不忠
呢兩個重複既另外解讀，同下文既「痛恨不忠」明顯相通。
神對於同人既關係，大發熱心，嫉妒如火（雅歌8:6），係呢段關係入面，唔可以有人背叛佢，唔可以有野取替佢，唯獨只有佢一個係屬佢既人既神。
（7）一追再追
我地睇埋下面。「追討」罪責，聽落只有負面，但係同一個字有好多唔同意思，包括「訪問、眷顧、懲罰、派定、計算、缺少」。當然唔係話上主眷顧罪，但係當人向佢犯罪，佢係好着緊。
唔知咁講有冇誇張成份：神用盡一切我地接受到既方法，引導我地離開不忠、離開取替，甚至去到後代都唔會冇左件事。
三、四代之後，當足早至15歲結婚生仔，七八十歲命（詩篇90:10）就係咁先，即係一生之久神都追住我地得罪佢既地方，等我地係仲有機會既時侯悔改。神緊張我地破壞同佢既關係，緊張到我地死果刻都唔會冇左件事。
雖然咁講，罪仍然係有沉重既代價，上主講明左會追討。必定要處理罪，唔可以當冇野。
當我地由恨上主變做愛上主，佢就用忠誠之愛恩待我地，直到千代。實在係幾咁美好既關係！好到我地估佢唔到，每每能夠對佢有新既認識，難怪大衛感歎，原來一生對佢窮追不捨既，係上主既美善同忠誠之愛！（詩篇23:6）
阿們！
