我個case有啲複雜
我跟兩柴跟到尾嘅 但佢教個揸車法太aggressive同上級向
佢見你錯/唔夠smooth快手就會係咁罵你 改進方法反而講得幾模糊不清
所以我上完前半期都冇乜進展 仲要俾佢罵到怕咗學車
之後仲要同屋企人嘈交 嘈到連學都唔想學
後半期我就自行搵咗唔同嘅source 搵唔同人問意見同爬文睇教學
再喺出面補咗一堂請教補鐘師父同做模擬考試問三柴意見
先發覺原來師父唔係教得唔好 係當咗你有經驗嘅咁教
最後一星期我就不停玩歐卡2練軚盤同長期駕駛
先至淨係俾考官捉判斷力弱同冇觀察交通情況輕微各兩次 軚盤控制一次 充份望鏡一次 車速一次
搵過嘅source,學習方法就係咁多:
-我跟開嘅師父(點揸得快又順又快手係佢教,算有啲用;不過考試最後入返大街唔小心跟咗佢嗰套,有對頭車都照高速攝入去,咁就俾人剔兩次判斷力弱兩次冇睇交通同軚盤一次)
-補鐘師父(俾信心我同捉我易肥嘅位,心理作用大過實戰教學)
-三柴(我捉住佢問嘅,佢就指我判斷力弱同點樣避免俾人剔嚴重)
-呢個post(我問過死車嗰陣嘅情況)
-FB學神page(爬文爬到啲肥佬位)
-Conquer driving(呢個最重要最好用,轉彎,優先權同過死車佢教得最好,我學車考試都係跟佢步驟做)
-其他香港師父影片(其他人推介睇佢哋,但個人覺得唔夠精簡實用)
-駕院路試影片(唔好用,佢俾咗個會肥嘅片出嚟)
-歐卡2(連登ching推薦嘅,確實轉向、望鏡、保持路線中間用佢練係幾好用。你可以用唔同角度檢查自己揸得夠唔夠直同正中,轉向同回軚會唔會太早太遲或者過咗龍。我用二手g923練,手感差啲但夠用)
-我老豆(我腳板有啲大,成日頂腳控得差。佢就推咗個斜角踩腳制油門嘅方法俾我,除咗隻腳要調嚟調去之外係好控制好多)
所以我係冇固定嘅學習途徑。
香港學車啲資訊同技巧都幾凌亂落後同唔流通。我幾建議睇吓唔同語言同國家嘅資訊會好啲。都有諗過會唔會不相容但最後證實可以引用。
