有一次上網無意中見到一個好靚既zippo，一個黑鋼色帶啲花紋浮雕既zippo。
第一眼望到佢既時候就已經比佢深深吸引住，相入面既佢影到好靚好靚，我即刻周圍問friend、周圍search佢既型號，終於比我搵到邊度有得買。
我既即刻9秒9 比我啲friend睇，問佢哋既意見。佢哋都話：「幾好睇呀，鐘意既咪去馬囉。」
但係我知道我冇咁多錢去買呢個火機，買完就要捱麵包，佢係一個日版既限量版zippo，接近1500蚊既價錢實在令我望而卻步。
但係我又真係好鐘意，就咁樣望左兩個幾禮拜終於下定決心去馬。係實體店見到佢嗰一刻，心裏面浮現左一個感覺：「就係佢啦。」，當然我啲friend都有笑我做咩要洗1500蚊去做水魚？我只係答左一句我覺得值。
我買咗自己人身中既第一個zippo。返到屋企望住個zippo，我覺得自己既眼光真係冇錯到。啱啱買完嗰排，攞住佢上手硬係忍唔住望到出神傻笑，連點着枝煙個感覺都唔同啲，我同自己講呢個zippo我要用一世。
過左一個月左右，攞係手既時候我已經唔會再傻笑、亦都比我發現左個火機上面有其他人用過既痕跡，雖然曾經都有過自己係咪做左水魚既諗法，畢竟1500蚊既價錢應該要係全新先合理，但係我諗一諗之後又覺得點解自己要執着係呢啲小事上面？而家揸住佢嗰個係我仲唔足夠咩？
之後一直用左幾個月，不時有friend 過嚟讚我個zippo靚，聽到佢哋咁講既時候，心裏面質疑自己既想法亦都弱左幾分。
當我用得越耐，撻火嗰陣既感覺就越淺，而且用zippo食煙會有一浸煤油味，亦都要每個禮拜入一次火油先可以繼續用。
到後來趕住出街唔記得入油而食唔到煙嗰陣真係開始覺得呢個火機有啲麻煩，點解啲油就唔可以留耐啲？點解其他7仔火機又唔會有呢個問題？雖然我知道係因為7仔火機同zippo唔同唔可以用一世，7仔火機好就好在你無時無刻只要附近有一間7仔就唔驚冇火機用。
7仔火機同zippo比我既感覺始終都係有分別，雖然有時候想用冇得用嗰下會覺得麻煩，我仍然好鍾意呢個火機。
直到有一次出去飲酒，我飲到好醉，好想食煙。係酒吧出面啲人見到我攞zippo食煙都望哂過嚟，個一下真係好爽。有幾個人過嚟借火，我亦都好豪爽咁借咗個zippo比佢哋。嗰晚我醉到差唔多斷片，搭的士返屋企之後就訓死咗係張床到，第二日當我想食煙嗰下先發現個zippo唔見左。
我反轉咗成間屋去搵，問我啲friend個晚有冇見到佢，結果總係令人失望，我就咁失去左人生第一個zippo，我亦都失落左一排。
啲friend同我講：「火機啫，世界上千萬個，何必只取一個用？」，我答佢哋呢個係我人生中第一個zippo，
「我明呀，人人都會有第一個zippo架啦，但係最終啲人都係會用返7仔火機，無事既，睇開啲啦。」我啲friend咁樣講。
錯，我啲friend唔明，唔明呢個zippo對我既意義，唔明我有幾鐘意呢個zippo，唔明我嗰刻既心情。嗰一排每當我食煙，腦海就會浮現出自己攞住zippo點火既畫面。
我問過自己，點解一個咁正既火機我都可以整唔見，可能其實我跟本就冇自己想像中咁鍾意佢，如果唔係點解我要周圍借火比人？可能我只係享受緊人哋投射落個火機既目光，享受緊佢哋既想要又得不到既渴望。
如果我真係咁鐘意佢，我就唔會去玩火，你永遠唔會知道邊個貪個火機靚就想偷左佢，我好矛盾，我知道自己係出於想比人知自己有個咁靚既火機既心先會周圍借火、周圍借比人睇。可能自己就單純係犯賤。
今日，我攞住個7仔火機食煙既時候，仍然會諗返起當日既zippo。啲friend問我點解唔買個新既zippo，我答佢哋冇咁多閒錢去做水魚啦，廢事哂錢等陣又整唔見。
可能我只係驚唔會再搵到比第一個zippo更加正既火機，又或者我係驚自己會冇咁鐘意第二個火機。
其實我只係驚用其他zippo嗰陣會諗返起呢個火機，驚自己又係到犯賤，我唔鍾意呢種隨時有可能整唔見野既感覺，唔鐘意我啲friend用老屎忽過來人既口吻勸我。
其實邊個煙鏟唔想有個自己既zippo？只係發現原來7仔火機已經滿足到自己。
到呢刻先發覺自己已經成為左啲老屎忽口中既人人。