可惜加富爾未能活着見證完PO之日，佢做咗首相三個月就因積勞病故，終年50歲。
意大利統一嘅難度唔會比德國差，而加富爾功不可沒。原名卡米洛·奔索嘅佢為貴族家次子，1810年生於撒丁首都都靈，當時嗰度正被法軍佔領。
佢因為生性反叛求學期間經常受罰，年少時成為維多·伊曼紐二世之父卡洛·阿爾貝托嘅侍從，亦同主子並不和睦。另外佢亦好鍾意賭錢，投機性格喺日後政治生涯中不時浮現。
當時意大利半島已經分裂咗千鳩幾年，除咗撒丁主要勢力仲有熱那亞、教宗國、塔斯卡尼、帕爾馬、摩德納、威尼斯、拿玻里。
由於勢力分散，半島長期淪為西班牙、奧地利
、法國嘅角力場。法國大革命後新生共和國成為所有正統君主嘅敵人，為咗牽制奧地利，法軍喺1796年由拿破崙率領入侵意大利。
因為半島上各國都勁唔打得，拿破崙僅以3萬設備簡陋嘅軍隊同幾個月時間就席捲意大利。如同英帝為印度打下統一基礎，地理名詞意大利喺法國軍靴下首次成為一個國家，1802年拿破崙成立意大利共和國自任總統，三年後更加冕為意大利國王，佢阿哥則被封為拿玻里國王。同時佢又引入拿破崙法典同進行各種改革。
法國人入侵令意大利人民族情緒高漲，反法祕密組織應運而生，當中最重要一個為燒炭黨(因成員匿喺燒炭山區而得名，亦有說係仿效中歐燒炭者秘密組織，反正主題內容與「自殺」無關)。
燒炭黨十九世紀初喺意南成立，早期成員主要係中產階級知識分子，後來亦有軍官、貴族、地主、商販加入。組織內有7個等級，因為反清復明係要殺頭嘅，所以成員有一套自己獨特切口同儀式，以識別對方身份。
熱尼亞人馬志尼1805年出生，父親係教授老母虔誠天主教徒。佢本來係一個律師，出於愛國熱忱同浪漫情懷喺1829年加入燒炭黨，但不久就因為拿玻里起義而被捕入獄，31年出獄後前往法國馬賽。
去到法國嘅馬志尼覺得成員三教九流嘅燒炭黨內部分歧太大，於是自己創立青年意大利黨，黨旨為「天主與人民」，主張意大利統一成立共和國，恢復古羅馬榮光。
加富爾同馬志尼分別係統一三傑中嘅外交同理論擔當，勇武方面就由加里波第負責。佢1807年生於尼斯，出身行船世家。佢因為工作關係喺俄國接觸到意大利民族主義，1833加入青意黨，翌年因為參與撒丁起事違反國安法，輾轉著草去咗南美，足足喺嗰度踎咗14年。
當拿破崙如龍捲風瞬逝，歐洲諸國為咗處理佢嘅殘局而召開維也納會議。奧地利代表梅特涅極力反對剛萌芽嘅意大利復興運動，主張恢復舊邊界。
於是倫巴第威尼斯等地被組成倫巴第-威尼托王國，由奧地利皇帝擔任國王，塔斯卡尼、摩德納、帕爾馬亦由奧地利人掌控。南方嘅拿玻里王國由波旁王朝復辟，改稱兩西西里王國。撒丁被視為法奧之間嘅緩衝國，熱那亞亦都撥咗比佢，係當時唯一獨立勢力。
拿破崙雖敗，但佢已經徹底改變咗呢片土地，意大利將迎來翻天覆地嘅變化。
