曼聯準備大清洗 艾摩廉只留兩球員 球會再裁員200名職員

曼聯今季成績令人失望，根據英國《曼徹斯特晚報》爆料，領隊魯賓艾摩廉計劃今夏大清洗，將會出售多位球員，籌集資金收購符合自己戰術需要嘅新兵，據悉呢位葡萄牙名帥只會留用2位同胞般奴費南迪斯、達洛治。

英國傳媒指魯賓艾摩廉接手執教曼聯3個月以來，刻意同球員保持距離，唔想建立任何友情，皆因佢早已計劃進行1場「無情清洗」。歸根究底由於前曼聯主帥坦哈格上年夏天豪花2億鎊收購5位球員後，會方難以再「開水喉」買人，所以艾摩廉必須先出售現有球員，先至有資金簽入心頭好。

魯賓艾摩廉上月承認，自己唔會同球員建立密切關係，似乎唔想受私人感情影響買賣球員決定。英國傳媒指艾摩廉現時只係同般奴費南迪斯、達洛治屬於「朋友關係」，一般估計就算佢進行大清洗，呢2位葡萄牙國腳應該都可以留低。

曼聯計劃再進行裁員，將解僱大約200名員工，希望節省開支，減輕財政壓力。引起唔少網民批評，指會方向表現欠佳嘅球員提供巨額薪酬合約，卻向小員工開刀，實在無良。

英國富商拉特克利夫1年前收購曼聯27.7%股份後，積極採取開源節流政策，上年7月已經裁員250人，佔當時球會超過20%員工，其後甚至「炒埋」前傳奇主帥費格遜，冇得再做球會大使。拉特克利夫仲嫌未夠，將會再炒多大約200位員工，勢必進一步打擊球會內部士氣。