【短篇懸疑/鬼故】UST LG2探險係我個莊嘅傳統，點知死咗人

（代友出）
一、
「喂Tomy，你有冇聽講過LG2嘅傳說呀？」

Issac無啦啦陰陰濕濕、哄到好埋咁問我。條友喺OCamp講鬼故講到我哋呢啲組仔女全部都瞓唔著覺，我一諗起嗰個喺防盜眼見到一片紅色嘅故仔，爭啲當場lur返口裏面嚿叉燒出嚟。

「喂咪搞啦，食緊飯呀大佬……」

「笑死。你咁沙膽，唔整蠱你整蠱邊個呀？嗱，見你咁yo得先益你咋。今晚我帶隊落LG2探險，有冇興先？」

LG2？點解頭先搭𨋢落嚟嗰陣好似唔見有呢個制嘅？

「LG2有…有乜咁特別呀？」

我對筷子喺手度震到擦擦聲，Issac抿嘴忍笑咁話：「你今晚嚟咪知囉，成隻鵪鶉咁，係咪男人嚟㗎？」

我反咗個白眼，同時努力克制自己嘅手震，勉強食埋兜叉燒飯。

二、

夜晚九點，我喺三樓走廊行緊返common room。

唔知邊個調到呢度嘅冷氣咁鬼凍，我一路行一路覺得有浸涼風係咁扇落我背脊，唔知打咗幾多個冷震。

條走廊伸手不見五指，淨係得幾盞燈仔，每行兩步就打直照落我個頭度。我行得越嚟越急，隻手越嚟越多汗，望住自己地下嘅影子滑過、滑過、滑……屌做乜後面有腳步聲嘅？我即刻毛管戙，一路望住地下拔腿狂奔。喂痴L線，後面嘅人都跟住我跑喎！

突然，有一隻手捉住我右邊膊頭。我一嘢甩開佢，瞬間玩撞機酒game嘅勇氣飆咗上嚟。咩牛鬼蛇神，嚇……嚇下佢點都得掛，我擰轉頭急口大嗌：「屌你老母！」

pk，原來係Issac。

「我屌你先啱呀！約咗八點半你去咗邊呀？跑得咁快擺明想甩底啦？」

「嚇死我咩，食M記等得耐咋嘛，依家咪嚟囉。」

我心裏面大嘆一口氣，但係仲帶住狂跳不止嘅心臟跟Issac返到common。

一打開門，Jason即刻一手掃走檯上面分成一張同三張嘅一百蚊紅衫魚。

「喂呀你上嚟做咩呀？我賭你唔嚟㗎嘛！」Amy勁嬲咁𥇣住我。

「咪係囉，明明OCamp聽個鬼故都嚇到瞓唔著，等陣小心嚇死你呀！」Ella怒目圓睜咁警告我。

Sofia乜都冇講，淨係望住Jason手上嘅錢悵然若失咁。

「Ey bro就知你唔係咁細膽嘅人，我哋有福同享有難同當，呢一百蚊你嘅！」Jason笑口噬噬咁將張一百蚊拍喺我心口度。

「好在我冇賭啫，爭啲輸一舊。條友啱啱先見到我仲準備著草囉！唉見你肯嚟，放過你啦。齊人咁就出發啦。」

三、

行到出火雞，我覺得有啲唔對路。

「唔係話LG2嘅咩？點解要行出嚟嘅？」

「呢啲神聖嘅地方梗係冇咁容易入啦，入口喺嗰邊嘅停車場度呀。」Issac一路答，一路揈手上部電話，示意我哋開住電筒行。

呢晚落毛毛雨，去停車場條路又有幾盞燈壞咗，日頭綠意盎然嘅小徑儼然變成陰森詭祕嘅窄路。我成身騰騰震，分唔清係因為落住雨凍得滯，定係我已經驚到控制唔到自己身體。

嚟到停車場，我哋入咗部𨋢度。

LG2。

呢個陌生嘅樓層，喺呢部𨋢度出現咗。

出返嚟之後，Issac帶我哋去咗個鐵絲網前面，然後唔知喺邊度摷咗條鎖匙出嚟，開咗鐵絲網門上面一個鎖。我哋五個詫異咁望住佢，佢只係平淡咁解釋，係一個師兄留俾佢嘅。

然後，佢帶頭行上側邊半米高嘅石壆牆上面，左手扶住鐵絲網咁碎步往前。佢同時吩咐我哋睇住上面有冇人望落嚟。我唔覺意向下一望，原來右邊就係一個三米高嘅罅。雖則跌唔死，但係跌斷腳應該不在話下。

行多五米，我哋相繼跳咗落一個平台到。Ella重心不穩，落地嗰陣屈身雙手撐咗喺地板度。

「嘖，咦好污糟呀！」佢一邊用港女嘅語調嫌棄，一邊將手上嘅灰拍落Jason度。

「喂贏咗你一舊水啫，使唔使咁呀？」

我將電筒照去遠處，燈光照亮嘅淨係得近處塵土飛揚，但係到達唔到黑暗嘅盡頭。我再四周圍照下，突然照到個白色反光嘅波。

波..？

Ella突然間尖叫，起勢揈甩手上面嘅灰。

我望真啲，原來係個頭骨。寒意瞬間注滿咗我嘅脊椎。

「驚咩吖，你慌你手上面嗰啲係骨灰咩。之前啲soc落嚟開Halloween party瀨低啲道具喺度咋嘛。」Issac不慌不忙咁解釋。

Jason冷笑一下，用戲謔嘅口吻話：「呵，話唔定真係骨灰。」

Amy好似𥇣咗佢一眼。

「前面大把嘢睇呀，行啦仲望。」Issac冇理到Jason，繼續向前行。

四、

我一路行，一路思考Jason頭先講嘅嘢係咩意思。唔經唔覺，Issac帶我哋行上一條石樓梯。

咦？點解呢度會有條鑿得咁靚嘅樓梯嘅？依家諗返起，頭先沿路都好似都有啲修築過嘅痕跡。

我實在按耐唔住好奇心，開口問Jason佢知道啲咩。

「老竇同我講過，呢度本來應該係一個望海嘅廣場。不過唔知點解自從有個地盤佬跣腳跌咗落山之後，啲鐵樁打極都打唔入，後尾又陸陸續續死咗幾個，先迫不得已放棄呢層，就咁連住LG1同3。佢話本來好鍾意呢個design㗎。」佢跟住話：「你以為呢度啲人成日跳樓真係因為壓力咩，怨氣重咋。」

我聽佢講嘅嘢有啲哽耳，Amy好似越嚟越嬲，就嗌佢尊重下啲先人就冇再追問落去。佢聽到之後只係一臉不屑。

我擰轉頭望，Ella同Sofia竟然唔見咗。

我即刻大嗌佢哋嘅名。好在即刻有Ella嘅回音。我跑到過去，見到Sofia抱住自己嘅頭，成身震緊。

「佢冇咩事吖嘛？」我問Ella。

「佢可能血糖低啫，你哋行先啦，我哋等陣追上嚟。」

五、
Issac帶我哋行到去一個好空曠嘅空間。嗰度有張大檯，上面有好多酒樽、啤酒罐同玻璃碎。

「都話啲人成日嚟呢個秘境開party㗎啦。」Issac講。

但係，我嘅注意力喺一埲遠處嘅大牆。上面有幅紅色嘅…畫？我行緊少少望真啲，好似每一筆都係由手掌抹上去咁。

「哇呢幅嘢如果搬得走，肯定拍賣到唔少錢！」Jason兩眼發光咁望住嗰埲牆。

百思不得其解嘅係，畫嘅兩邊係好大嘅正方形窿，根本冇位俾人企住畫嘢上去。

呢個時候，Sofia同攙扶住佢嘅Ella都嚟到啦。

「你哋過嚟望下，估下呢六個大窿喺攞嚟做咩嘅？」Issac問我哋。

Ella行過去最近嘅窿，向下望咗一眼，跟住話：「一眼睇得出啦，咪最後冇用到嘅𨋢槽囉。」

我都過咗去第二個窿觀察。呢個漆黑而深不見底嘅窿，彷彿有種吸引力喺度拉緊我落去。所以我企後咗兩步，費時失腳跌咗落去。

呢個窿嘅深處，詭異地令我著迷。但係當我望住佢一分鐘之後，忽然好似有浸鐵鏽味慢慢滲入我個鼻。

當我準備攞部電話照一照個地底嘅時候，我feel到有人輕輕地用手掂住我背脊。

我強作鎮定，用微弱顫抖嘅聲線話：「仲唔知你籠嘢咩Issac，放開隻手啦。」

但係事與願違。

背後嘅人一嘢用左手揞住我個嘴，右手箍住我心口，推我去隔離個坑度。

我勉強擰頭望去Ella嗰度，見到佢眼神空洞咁望住地面，僵硬咁伸出右手發吽哣。企喺佢前面嘅，係擺緊啲一百蚊紙入自己衫袋嘅Amy。Amy面上一絲惡笑，我覺得……佢好似變咗另外一個人。

喺我後面嘅的確係Issac。佢推緊我去凝視緊深淵、雙目無神嘅Sofia度。

點知Issac突然出力拉起我右手，伸去Sofia嘅背後。

發生緊咩事啊？！

等陣，Jason呢？

我用力掙扎，望去Ella嗰度，淨係見到佢癱坐喺地上面，望住個窿。完全定格嘅佢，眼神複雜咁望住我。

下一秒，我隻手掂到啲嘢，軟軟哋有啲冰冷。

碰。

砰。

Issac喺我耳邊低語。

「還咗四條，仲爭最後兩條。下年嘅Dicky同Alison…


靠你收數啦。」