秋日，陽光落在咖啡店外的露天座位上，那裏坐着這樣的一個女子，她名叫沈玥，黑色的秀髮隨意地蟠踞在她頭頂，有著一雙劍眉和薄薄的唇瓣，面容雖然姣好，卻盡顯疲態，試圖以遮瑕膏掩蓋的黑眼圈仍清淅可見。
只見沈玥對着筆記型電腦打了十來分鐘字，偶爾停頓，撅嘴，又狂按刪除鍵。
正當她提起杯子想啜飲一口時，才發現杯子內的咖啡早已見底。
沈玥不耐煩地合上電腦，目光瞥見鄰座的男子，便心生奇怪：那人在她來之前便一直坐在那兒，至今已逾半小時，他面前放涼的咖啡卻一滴都沒有變少。
他身穿素色的白T，不時望向手錶，似乎在等待着誰，只是對方明顯遲了良久，他臉上卻不見慍色，仍在悠然地看着風景。
看見這幕，她心中不禁對他產生了一絲同情，曾幾何時，她跟他一樣，坐在咖啡廳裏呆等了半天，只為見那人一面，但付出了真心卻換來了寂寞，苦苦思念的那人終究沒有出現。
「咦？請問你係？」
忽然，一把女聲將她從回憶中拉了出來。
「你好，你係Mary呀可？我叫Josh，係你男朋友請嚟嘅。」男子爽朗地說，平靜的語氣令沈玥一時三刻反應不來。
「長話短說，你男朋友想同你分手，但又唔知點樣開口，所以先請我過嚟同你講。」
「吓，呢個係咪啲咩整蠱節目？一啲都唔好笑囉。」Mary從愕然轉成憤怒。
直到男子從口袋中掏出了一條手鏈，Mary才開始相信他的說話。
「阿威覺得佢睇唔到同妳一齊嘅未來，既然目標唔同，都行唔到落去，咁不如——」
話未說完，Mary拿起桌上的咖啡便往男子潑了過去。
「你兩個都係仆街嚟！」Mary破口大罵，將紙杯摔在男子身上便憤然離去。
只見男子渾身濕透，白T染成了啡色，髮絲還滴着咖啡，他卻不慌不忙地抽出紙巾抹臉，似乎已對此習以為常。
「你⋯⋯冇事呀嘛？」出於好意，沈玥還是向男子問道。
「冇事冇事，畀人用咖啡淋都係我工作嘅一部分。」他爽朗地說，臉上掛着的燦爛笑容與一身狼狽的樣子毫不相襯。
見沈玥一臉疑惑的表情，他不慌不忙地從錢包裏拿出一張卡片並遞給對方。
「我叫陳洛言，正職係『告別師』。」男子如此說。
「即係幫人分手？」沈玥緊皺眉頭，「你唔覺得咁樣好仆街咩？」
「點解咁講？」
「拍拖係兩個人嘅事，點解要由外人嚟界入？仲要係三唔識七嘅陌生人，你有冇諗過被分手嘅人嘅感受？如果連分手都唔肯自己面對，咁嘅人仲有乜資格拍拖？」沈玥也沒有意識到自己越說越激動，聲量提高了不少。
「妳知唔知道喺古代寫信都係一個職業？」陳洛言平靜地問。
沈玥呆一呆，似乎沒想過對方會反問自己，只搖了搖頭。
「喺古代，識字係一項奢侈嘅技能，係有錢人專屬嘅權利。窮家子弟想寫信畀分隔異地嘅父母或者戀人，就只能夠僱用識字之士代筆，先可以同故鄉嘅親人溝通。」
「而我，就係故事入面嘅代筆。現代人唔識得面對離別，但無奈，當離散成為了必然，如何得體地告別就成為咗呢代人嘅課題。」
「於是呢個時候就係我哋『告別師』出埸嘅機會，不論生離定死別，我哋都可以『言人所未言』，幫你作出一個得體嘅告別。與其不辭而別，好好地交代唔係仲好咩？」
「不過通常我都唔接分手case，因為唔係畀人淋就係畀人打，但無奈，呢類case數量最多，搵嘅錢都最多。」陳洛言聳聳肩，談吐之間盡是沈玥未曾聽過的事。
比起「告別師」是怎樣的一個職業，她更感興趣的是——
「咁你哋包唔包埋幫人辭職？」沈玥雙眼發光地望着陳洛言。