[康樂高球北地烈馬] 二月九日田草十一場賽日討論區 I

香港馬王「浪漫勇士」上月揚威杜拜，兩星期後挑戰沙特盃，Danny沈集成務求準備做到200%，今日率先飛去當地，跟手「浪漫勇士」由杜拜到埗，Danny咁緊張，係因為「浪漫勇士」將會轉用類似釘鞋，有抓地作用嘅蹄鐵出戰，但穩陣起見，會畀隨行「浪漫風采」試咗先，睇過OK，先畀「浪漫勇士」用，由於稍後仲要轉操練模式，Danny此行會一路留到賽後先返港，未來五個賽日遙控出擊，就靠晒班馬房兄弟喇！

「浪漫勇士」準備用嗰個沙特專用蹄鐵，係Danny上月向沙特馬會高層，探討後特別訂造，主要係蹄甲底前方多咗一小塊鐵，拎返港一心畀同主「浪漫戰神」，於泥地彈閘測試效果，親眼看過確定良好，先畀「浪漫勇士」用，但香港馬會基於安全理由唔批，Danny唯有等去到沙特，畀「浪漫風采」先試。由於沙特盃強敵林立，Danny打算晨操提升「浪漫勇士」速度，以免跟唔上食沙影響發揮，諗到咁細緻，已經係成功第一步。

沙特盃（1800米泥地G1)，將有14駒列陣，總獎金2000萬美元，除香港馬王「浪漫勇士」之外，還有去年杜拜世界盃盟主「月桂河」，以及上月勝出麥通挑戰賽的廄侶「星大道」，另外四匹日本賽駒，分別是「青春永駐」、「盈寶奇嶽」、「盈寶威神」和Ramjet，而在麥通挑戰賽跑得季軍法國馬「送達駒」亦在陣，至於美國馬「小村白馬」雖然仍在名單之上，但日前已宣布退出。