為何香港無法孕育撼動世界的創科鉅企？

以下係我過去十年對香港創科環境既啲觀察。
好多人成日問：點解香港出唔到好似Steve Jobs同Elon Musk既科技強人，又或者出唔到Apple同Tesla呢種級數既科技公司？

首先要更正一樣事實：唔止香港，其實全世界大部分國家都出唔到呢啲級數既創科鉅企。要孕育出創科精英同企業，係要天時、地利同人和，而美國過去一百年就係同時掌握到呢三樣元素，先可以成就呢堆創科鉅企既誕生。

喺解釋何為天利、地利同人和之前，要了解科技行業既基本運作。

創科公司主要分為三類：
破壞性創新：呢類公司好多時都係單靠一個創新意念就足以顛覆整個市場，譬如Apple既iPhone，佢徹底改變咗人類對手提電話既認知。目前所有智能電話基本上都係跟隨元祖iPhone既設計不斷改良。又或者佢地既產品同方案解決到人類社會面對既問題。

替代挑戰：呢類公司唔係創造一個全新意念，係靠推出更強或者更平既替代品去搶佔市場，例子有Samsung既Galaxy，佢從初代既Galaxy S到依家既Galaxy S25都係嘗試透過功能同價格(早年個個都當Galaxy S係iPhone既平價替代品)挑戰iPhone既地位。

輔助同供應：呢類公司主要係供應上述公司既零件，又或者提供一啲服務，例如生產智能電話同電腦晶片既台積電，提供電腦系統、軟件同雲端運算平台既Microsoft。

以上三類未必相悖，佢地可以係同時呢兩到三類公司：Tesla同Dji就係好好既例子，喺佢地冒起之前都有電動車同航拍機，但技術未成熟到受市場歡迎，佢地只要解決到技術問題或者有相宜既價格，加上政策既推動，就可以成為市場既領導者。

而地利，顧名思義即係可唔可以提供合適既土壤令初創公司成長
美國同日本可以出到咁多科技鉅企，係因為佢地既消費市場可以容納到形形色色既產品同人。

以日本既動漫市場作比喻，日本連釣魚都可以成為動漫題材，有一班穩定支持者。仲有百合、BL、偽娘呢啲次文化題材都可以喺動漫市場生存。

喺美國同日本無論你讀咩科，都可以發展自己長處，搵到自己既位置。
讀書唔叻，畫畫叻或者有音樂天斌，都可以出嚟畫漫畫、整遊戲同玩音樂，有自己既Fans同收入來源；唔讀工程走去讀物理同化學，喺美國同日本都可以入到當地既材料同化工企業做研究開發。然後將產品賣去其他地方。

仲有另一樣野就係成本，喺香港買材料都貴大陸一大截，加上土地成本高，喺香港搞創科註定係滿途荊棘。

但喺香港，就算你可以頂住家庭同社會壓力行自己既路，市場唔夠空間容納你，你好快都會因為收入壓力而放棄。

呢個就係地利既重要性。

咁試下搞全港絕育

最後就係人和，香港好多人一講人和，講嚟講去都係話香港學生數理唔叻，所以出唔到好似Steve Jobs同Bill Gate咁叻既人。

我想講如果你喺香港讀理工科，你就會發現香港數理強既人比你想像中多。雖然NDS係好勁，但最頂尖嗰班仍然係班本地學生。問題係呢班精英畢業之後有幾多人會留喺呢行發展。

有能力有熱誠既人，佢地會諗與其留喺香港單打獨鬥，不如出國發展，起碼出面容易搵到志同道合既人，市場又夠大。唔單止香港，好多國家既精英選擇都會去美國發展。

而有能力冇乜熱誠既人，佢地會覺得自己有能力做大公司大機構薪高糧準，點解要冒咁大風險搞創科？一陣搞衰咗咪被人恥笑？

於是呢班學生畢業之後頭也不回轉行做金融，又或者入大公司打工。

剩返就係有熱誠冇能力同冇熱誠冇能力既人，就算佢地肯留喺呢行做都好難行到發展初創以致成熟呢一步。

咁到底呢班學生可以點做？
好多人話雖然Steve Jobs半途輟學，但佢入到Stanford證明佢讀書好勁。
但我覺得呢個唔係Steve Jobs成功既原因，如果讀書叻係主要原因，讀書叻過Steve Jobs既人大有人在，點解成立Apple既係Steve Jobs而唔係佢Stanford既同學？總有地方與眾不同佢先可以突圍而出。

而我認為佢地對其他範疇既理解、對人類社會同技術既觸覺先係佢地成功既原因。
Steve Jobs未成立Apple之前都去旁聽書法美術既堂，同埋去印度遊歷。我認為係呢一段經歷訓練佢既觸覺。
我唔係話要成為Steve Jobs就一定要去學書法美術同去印度。只係想帶出一個人既經歷先係一個人成功與否既主要原因。

好多人缺乏對社會既觀察能力，甚至可以話佢地對身邊既事物毫不關心。
創科好多時都係為解決社會難題而生。如果你冇留意身邊發生既事物，你根本唔會知原來呢個世界仲有好多問題等住我地去解決。

譬如老人家行動不便，出行要拎拐杖推輪椅，有冇方法可以令佢地老年行動得方便啲？可以諗外骨骼或者其他方案。
又譬如巴士站想整實時到站同交通資訊，可以點解決供電同監察問題？可以裝太陽能板供電同物聯網收集實時交通資訊。
以上已經有公司做緊，我只係想舉個例，好多idea都係源於對身邊事物既觀察。

我認為一個地方要搞到創科真係要集天時地利人和，其實我見到香港都有好多有志之士搞緊創科，只係普羅大眾暫時未知佢地做緊乜野。

希望佢地將來會成功。

high tech = hi 野
low tech = 撈野

思維問題

因為HK NO IT

個個project目的都只係搭雞棚cap水
如可撼動世界?

因為香港人怕創新

對所有創新科技/ 技術乜都say no

新一代想試創新

但坐擁資金同經驗嘅老屎忽一成不變

新一代創新失敗就踩到你一文不值

就算成功創新都係比班坐享其成嘅老屎忽獨領風騷然後行返條舊路

創條撚咩

土地問題初創第一步都已經fail

Idea人人都有，你有能力做出嚟先？
然之後你有冇決心去失敗去搵生意先？

spacex話要做回收火箭呀，係有決心呀嘛，你有冇決心啊？冇得把口鍵盤戰士。

Sorry我既決心剩係夠我出嚟撐住頭家

香港人既價值觀係金錢至上殺雞取卵
完

7科5**個個做醫生，次次話搞科技次次d錢去曬房地產，書店有關科技教學既書越黎越少、寧願擺d濕尻退休政棍回憶錄都唔整d新科技，點玩？

點解香港要有創科鉅企

其實係，我只不過分析下點解啫

你講個啲係技術性角度，但現實話俾你聽而家一間創新科企已經唔係以前車庫改變未來嘅玩法。

當你有一個核聚變技術改變世界，首先你要錢研發，哪裡有錢？就要有風投。香港唔係一個風投盛行嘅地方，你返大陸/去美國反而容易搵到資金，呢個就係原因。

然後有風投啦，見你技術有啲前景，就會想食你公司，ABC輪融資之後發現，你可能得返30%控制權，一係你開波就識玩AB股，但你玩得AB股人地又未必肯投你。

咁你遇到呢啲情況，仲會唔會有心想搞科企？

而家搞創科需要好大投入
就算你揾到班天才
都係要駛好多錢先出到成果
仲要可能回唔到本
有咁多錢真係攞去炒樓好過

多謝補充我認同你既講法

不過香港創投既環境已經好過以前好多

咁講真水清則無魚

總有人係混水摸魚打算Cap一筆就走人

創科唔岩香港人 高成本高風險 射幾百粒發明舊野 1個月內比大陸抄左再賤賣打殘你 你果幾百粒就渣都無

啱啱係另一個post 答過類似問題

主要有幾個原因

1.香港冇咩依賴科技嘅大公司，所以冇人投資呢方面
冇製造業 唔係走it路線 冇買手就冇人行呢方面路線

2.香港唔太需要競爭
ai同晶片某程度上算係軍備競賽

3.香港政府做嘢一般都係慢慢試水溫 除非受刺激 一受刺激就會夾硬亂嚟

所以好多科技相關嘅政策 唔可以話佢冇做 不過成果就...而且更加難批錢。
特別係投資需要有回報，香港冇咩變現能力，所以相關審批會用減法 每個遞上去正常都唔會話自己舊嘢冇用 ，一般只會揀啲官理解到 又唔係好多錢嘅嘢課金

4.特別係華人社會嘅階級文化，貪腐同人情問題，當老細要求向一個唔有效或者唔可行方向改進個陣，有幾多人會say no? 無非外行指揮內行，好多供應商同採購部門都有食夾棍，當採購只睇成本，人情，同枱底嘢，然後老細只睇成本，忽略實際，壓縮成本之後可以交到啲咩？
所以點解好多香港嘅app 寫得咁唔實用.

同埋始終香港得七百萬人，政府資金有限，基於人口基數，按比例出嚟嘅人材都會有限
可能香港每年有x個好好嘅人材，大陸同美國每年可以出30x個，唔好話真正人材只需要一個，就算有天才idea都要好多中層同底層人材分擔一部分工作。

租金貴，令所有項目成本大增，對於盈利要求更加貴，回報周期縮短，而香港得七百萬人口，咩項目可以回收成本？

一係最頂尖令目標客戶唔可以唔用，一係大部分人都用得上，前者相關成本唔會低，後者要同大量其他國家相關產品競爭。

因為香港人low囉
炒嘢搵快錢就叻
要耐性嘅嘢就不了