如果要好簡短咁評價第2輯，我會話係盪氣迴腸。第2輯明顯比第1輯想探問嘅嘢更加要深層次，第1輯係都市愛情，帶些許光怪陸離，第2輯就係探問人嘅存在意義同價值。基於我對存在主義一竅不通，以下只係個人睇劇嘅感受，有講錯歡迎屌柒同指教，可能唔關存在主義事
第2輯嘅好睇在於佢想問一個問題，人嘅存在目的係咩。世界一開始只有將臣，佢唔知咩係寂寞，直至女媧出現。即是話世界只有一個人嘅話並唔存在寂唔寂寞，只有兩個人先會有寂寞，亦即係引伸到人嘅存在意義係他人給予嘅（"愛"都係）。當將臣見到女媧嗰陣心跳得好快，佢唔知喱種感覺係咩，直到女媧消失為止已經過咗千千萬萬年。一個人活咗千千萬萬年，第一次有想去做人嘅念頭（1939年），亦正係喱個念頭令佢真正成為一個人。佢喺馬叮噹身上搵到愛，我睇嘅時候不斷問自己，究竟將臣有冇鍾意過馬叮噹，有就一定有，因為係叮噹令佢明白咩叫愛，當初第一次見到女媧心跳得好快其實就係愛。
愛係咩？喱個係套劇想問嘅第二個問題。講愛就一定要講況國華同馬小玲。上個PO見有巴打問小玲鍾意嘅係國華定係佢個孫天佑，可以好肯定咁講小玲愛嘅由始自終都係國華。咁天佑又點解釋？喱個問題就要歸去宿命論嘅問題。天佑嘅死係必然，由一開始佢就唔屬於命運嘅一部分，佢嘅死唯一嘅作用就係令國華出現，去令劇本如常進行。
小玲同國華嘅愛始於秦朝，可惜未能共偕連理，因為佢哋本來就係兩個對立面嘅人，殺生與救贖。一個雙手沾滿鮮血嘅人同一個淨化生命嘅人，令我諗起TVB嘅刀下留人。最後中棠先殺靈兒後自盡，靈兒亦留下詛咒，家族女性不能留下一滴眼淚。喱滴眼淚代表愛，因為愛係馬家女人嘅弱點，感情唔應該存在喺馬家女人，但人唔可能完全理性，咁樣只係一嚿木，人嘅七情六欲係構成人之為人嘅本質
