曹永廉（阿廉）向來有「冰封俠」外號，初入行做歌手就是靠童顏，隱藏真實年齡長達15年。現踏入60歲花甲之年，曹永廉外表依然沒老態，最近與幾位兄弟合組男團「Hey Brother」，自言「幾十歲冇嘢可以輸」。走過人生半路，曹永廉經歷過家道中落捱窮住木屋區日子，在TVB事業起起落落也不容易過，今次訪問阿廉坦承最難承受還是兒子剛出世時，因擔心養不起頭家而患上情緒病，一度萌輕生念頭，確實是男人最痛。
$3,600底薪入TVB感屈辱
曹永廉是一個真性情的人，失掉歌手合約，大哭一場；加入TVB，也大哭一場。沒有了歌星光環，曹永廉拍過VCD及客串電影，但幾組戲收入始終不穩定。1999年，他把心一橫經一位經理人搭路加入TVB，但聽到月薪即在電話中爆喊，「佢話『$3,600一個月啫』，我嗰陣時真係覺得好慘、好屈辱啊，嗰陣時做開嘢可能唱一場show都有2、3千蚊，我喺電話嗰陣時喊囉，但都冇辦法，我覺得呢個價錢，當然啦我嗰陣時唔係好識諗，點解會畀一個咁嘅價錢，臨時演員嘅價錢嚟，但你亦都要明白大家係互相幫嘅啫，佢又未同你合作過，我而家識諗，咁但係都要㗎啦。」
30餘歲仍欠落十多萬卡數，直至演出《妙手仁心II》向眾仁一角，讓曹永廉嶄露頭角，他亦多次感激邵美琪，願意與自己用情侶檔姿態登台，助他在短短一年還清卡數，決心將4張卡剪剩1張卡。
照顧家庭壓力大想過尋死
訪問中，曹永廉多次提到「高高低低」，過了一關還有另一關。2007年，他與姜大衛和李琳琳的長女姜依蘭結婚，二人是奉子成婚，有指當年他迎娶太太時沒有給予分毫禮金，原來當年亦是他人生低谷，一度萌生輕生念頭。
「男人點都要諗住將來頭家，嗰陣時（太太）又有咗，記得人工係1萬鬆啲，老婆同我講有咗喎，年紀大家都大，冇可能有咗又唔要，咁就結婚啦錢啦，養嘅前景啦，唔係淨係錢，因為你生個仔仲要諗住點養。」壓力如山大，腦海一瞬間閃過「死」，「當然有個小朋友係開心，但自己困埋就好煩，瞓唔到覺，跟住下個月我又係賺呢份人工我唔夠㗎喎，奶粉各方面都要畀錢。我就喺度煩，有段時間係諗過好想揸架車大嗌，撞埋山呀好想，撞埋山咩都唔使煩。」
很多事情只是一念之差，曹永廉很快便醒覺情緒出現問題，求醫但卻難以負擔900元一次的高昂診金，最後還是靠向朋友傾訴，加上兒子出世後事業漸見起色，拍多了廣告，逐漸走出陰霾。
