成為新一代「最強小三」的五索似乎不是完全無名無份，過去拍片常以「少奶」、「豪門闊太」自居，而她與馬清鏗拍拖9年期間更五年抱四，生了4個小朋友，地位早已穩如泰山。去年12月10日是「純官」鄭家純娶新抱的大日子，其孻仔鄭志亮（Christopher）小登科，在家族旗下的瑰麗酒店（Rosewood）舉辦婚禮，城中高官富商個個畀面出席，包括特首李家超、財政司司長陳茂波、保安局局長鄧炳強，羅康瑞朱玲玲夫婦、梁錦松和太太伏明霞、「大劉」劉鑾雄一家和「細劉」劉鑾鴻等等，而當日馬清鏗疑帶埋「小三」五索一起出席婚宴，二人相戀多年，相信已是富豪圈公開的秘密。
五索在鄭家婚宴翌日，即12月11日拍片談論香港人「仇富」問題，指當日因城中富二代結婚，致尖沙咀一帶的交通淪陷，透露自己亦有份參與婚宴。她說：「琴日呢就係一個城中富二代結婚，成個尖沙咀嘅交通都淪陷咗啊，呢個時候我只可以離兩條街嘅地方落車，行過去Rosewood。喺街度有一個中年男人異常地激動，『唓，有錢人大晒啊？結婚做乜阻Q住晒呀！』我話畀你聽，有錢人真係唔係大晒，九成九啦，至少佢結婚會令到成個尖沙咀淪陷咗啦，你結婚唔會囉，冇人知囉。」五索更教路見到有錢人要「擦鞋」，愈有錢愈擦，十倍、廿倍、卅倍擦上去，有一日終於會擦到自己變成有錢人，叫香港人別太仇富。
