最近洪嘉豪被傳與COLLAR成員Ivy So（蘇雅琳）發展地下情超過一年多，日前Ivy So貼出多個「No」字的限時動態，疑似否認戀情，今晚（18日）洪嘉豪出席賀歲片《祥賭必勝》時首度回應事件，直言不問世事的阿爸亦有留意，他表示：「希望大家唔好亂諗。」被問到會否有發展空間，他又坦言：「唉，唔好搞我啦。」
洪嘉豪今日現身回應與Ivy So的戀情真假，先提到知道新聞已街知巷聞。他說：「我知道呢件事都受到好多討論，多到連一個不問世事嘅我阿爸，無啦啦都send條link過嚟，但又唔講嘢，我就知一個連時事都唔睇嘅老人家，佢都留意到，咁即係好多人討論呢件事喇……」
洪嘉豪提到二人被指地下情，緣於早前《困獸鬥》的片段。「其實我真係亂嚟，而我亦一早知入面嗰個係WinWin（楊安妮），為咗綜藝效果我先講（Ivy So），導致有咁嘅揣測。而呢一兩年佢加入咗商台廣播劇，本身我係成員之一，咁唔知係咪因為咁令大家有呢啲想法，希望大家唔好亂諗。」被問到會否有發展空間時，洪嘉豪立即落閘，直言：「唉，唔好搞我啦。我覺得呢件事都好似影響咗對方同好多人！唉，唔好搞啦，好攰。」
不少網民認為其歌曲《黑玻璃》中歌詞「接吻接到無法公開」，正是說出他與Ivy So無法公開戀情的寫照，洪嘉豪則表示歌詞由陳詠謙填寫，只是對方所想，又強調現時自己沒有對象。至於Ivy So早前貼出多個「No」字的限時動態，他就表示不清楚對方是否回應緋聞，所以不方便代答。
