貴為人氣王的姜濤，現仍不時會在維園打籃球，日前被網民捕獲，網民隨即舉機錄下姜濤打籃球的英姿，片中姜濤素顏上陣，戴了口罩，全身黑色服飾包到實，與波友一起在射波，並展示其純熟的運球技術，期間有傾有講，看上去神情輕鬆，但網民竟留言：「喺球場見到文祖和先生，不過條友好寸，叫佢文生都唔睬人。」並標籤：「冇嗌佢」。
粉絲們即出聲「維護」，紛紛留言：「唔明你個tag 話無嗌佢，又話佢唔睬你。龍門任你擺。收咗工嘅私人時間打波，放過佢啦。」、「不可以的，也不方便，姜濤本人不喜歡私人時間被騷擾」、「請尊重藝人私人空間～姜市民打籃球是他最喜愛活動」、「佢打藍球，大家只會圍觀，不會打擾他，會尊重他。吾好意思。」、「佢私人時間！請勿打擾希望你原諒」。
博主見群情洶湧，即解釋內容只是搞笑，「內文純粹搞笑，大家認真了，點敢嗌佢」，並表明是「香港潮文」，事緣2013年的時候，有市民在Facebook公開與許志安的合照，卻表示：「 喺球場見到杜德偉先生，不過條友好寸，叫佢杜生都唔采（睬）人。」似乎當事人將許志安誤認成杜德偉，一度成為網絡熱話；而相信博主今次也只是想用姜濤新劇《無用的謊言》中的角色名（文祖和）搞「爛Gag」，卻觸發了部分粉絲神經，其實換個角色去諗，博主都是為姜濤宣傳啫。
