欣賞你既畫面創作有種少女漫既夢幻味,用色都好舒服自然,好奇係呢種背景設定下會走向少年或者少女向既發展
基於你係以條漫既形式創作,最好考慮埋用手機閱讀既用戶體驗,確保字體大細既下限都足以係手機睇清
(可以參考人氣條漫既對白大細同擺放)
係分鏡上,你既思維偏向頁漫(但同時大細格鋪排欠缺固定邏輯)
條漫作為新一代+面向大眾既產物,通常會更著重考慮減少一個範圍內既訊息量,令讀者更容易吸收同消化
(新型媒介通常為商業+大眾化而生,訊息量往往比舊有媒介更少,如經典小說>流行小說,漫畫>條漫,電影>劇>網路片>brain dead tok)
漫一般會係約略範圍內只有一個關鍵訊息(如手機框﹑PC網頁全螢幕閱覽下既~21:9),其中只有一至兩格分鏡,然後根據節奏增加分鏡之間既留白
條漫亦都比較少會用到細細格(考慮手機讀者+細格係視覺上反左條漫既簡潔主義)
劇情鋪排上,出於網路上既選擇過多﹑專注力慣常被分散﹑同上面提及既訊息量問題,係一開頭就描述背景/帶出大量需要由語言說明既內容,讀者好大機會略過(直接下拉搵有無吸引到注意既內容),或者好快厭倦
呢種鋪排只適用於電影同正劇等,預期觀眾會一開始就坐定認真吸收一段時間訊息既媒介
(除非你既背景設計極之獨特而且可以係一兩句/一兩張圖內吸引到人注意)
所以可以思考下自己既故事開頭有咩容易靠圖像吸引人既要素,擺係最開始,然後再逐步些少帶出其他要素,建立正回饋循環,同波峰波谷式咁牽引讀者情緒
以下係我簡單思考後既大致鋪排策略(當然故事創作係冇絕對,我既諗法唔一定代表比較好):
由雙胞胎破殼而出作開端(唔需要文字,引起讀者好奇點解兩個人係蛋爆出黎?)
然後母親好普通咁互動,呢段同原本差唔多,但BB暫且唔需要出現內心獨白去表現(明明由蛋爆出黎好奇異,但母親互動方式又好平凡既奇異感)
之後,突然BB用一段有笑點/好爆既內心獨白/話語去表現自己其實係轉生,再回憶自己係被核彈炸死
呢個時候讀者就會好奇點解係核彈?咁正正就係提及未法之世設定既時機,隨之視覺可以轉到神觀察緊呢個嬰兒,再繼續補充蛋既起源,等解釋到蛋既時候,視覺再轉番番去
「歡迎你們來到這世界」呢一幕適合擺係結尾,能夠比人即將展開既幻想同餘韻,呢幕分鏡亦都比較好睇
另外一段時間內介紹既新人物愈少愈好,否則讀者一般只會去記最容易記個一兩個,剩低既變成多餘訊息
所以老豆老母暫時唔講自己個名都冇所謂,可以放係下一集(加上一般故事最早出現既名係主角比較好)
祝你得到滿意既成果
（點解明明係部落，但係間屋咁中世紀？去睇第2集你就知
） 
比心機 唔好最後搞到袁生咁
