話說香港因為衛生環境好嘅關係，好少會有人生蟲，所以平時我都唔會期望會喺工作上遇到啲乜嘢特別嘅寄生蟲。但估唔到畀我前排遇到呢一隻被譽為世界上體型最大最長嘅人類寄生蟲屬 (Order)，叫做裂頭絛蟲（英文係Dibothriocephalus，以前叫做Diphyllobothrium)。 而今次呢隻嘅品種係Dibothriocephalus nihonkaiense，一般稱為日本絛蟲（Japanese broad tapeworm）。特徵：
呢張圖會見到條蟲好似扁意粉咁樣
裂頭絛蟲可以有2-15米咁長，而人類感染到嘅裂頭絛蟲最普遍係廣節裂頭絛蟲(Dibothriocephalus latus, formerly known as Diphyllobothrium latum) ，但今次呢一隻係日本絛蟲。佢哋兩者嘅外型極之相似，唯一比較細微嘅分別就係日本絛蟲體型比較細長度比較短。由於過往寄生蟲嘅診斷好多時都係依賴觀察佢哋嘅外表特徵，因此以前啲case好有可能會將日本絛蟲同埋廣節裂頭絛蟲撈亂。但而家有咗基因排序（Sequencing）就可以更加準確咁診斷到。
圖裏面可以見到呢條蟲相當之長，差唔多有兩米。但其實佢真實嘅長度應該唔只咁少，而且喺呢個標本度都搵唔到條蟲嘅頭，好大機會個頭仍然響個病人嘅腸入面。因為裂头絛蟲個頭有吸槽（Bothria）呢個結構，佢哋就好似吸盤咁樣令裂頭絛蟲個頭可以吸實腸壁，咁佢哋就可以長期穩定咁樣住喺條腸入面而唔會被排出體外。
所以呢個標本其實只不過係佢斷開咗出嚟嘅身體嘅一部份。大家可以見到佢嘅身體係一節節，佢地最多可以有3000-5000個節片（Proglottid）。每一個節片都同時擁有一組雄性同埋雌性生殖器官。節片成熟之後會產生大量嘅卵，然後節片會脫落，連埋啲卵一齊排出體外。
呢兩張圖可以見到當我整爛咗啲節片之後就有大量嘅蛋湧晒出嚟
https://wcvm.usask.ca/learnaboutparasites/parasites/diphyllobothrium-species.php
呢兩張圖係喺網上面搵嘅裂头絛蟲頭部特寫，而頭上面可以見到有兩條吸槽。
生活史：
其實我哋可以了解下佢哋嘅生活史。簡單嚟講佢哋嘅宿主同埋生活史係咁：
https://www.cdc.gov/dpdx/diphyllobothriasis/index.html
呢張圖係喺美國嘅Centers for Disease Control and Prevention (CDC)搵嘅圖講述咗裂頭絛蟲嘅生活史
如果太多字唔想睇嘅話就睇呢個我整嘅簡化版嘅圖啦
簡單嚟講當卵經過糞便排出宿主體外後，卵會喺水入面發育成熟然後釋放鈎球幼蟲(Coracidia)。當鈎球幼蟲被橈腳類（Copepods）食咗之後就會發育成原尾幼蟲（Procercoid larvae）。當體內有原尾幼蟲嘅橈腳類被魚食咗之後，原尾幼蟲就會喺魚發育成長尾幼蟲（Plerocercoid larvae）。當人或者一啲會食魚嘅哺乳類同埋鳥類呢啲最終宿主食咗有長尾幼蟲嘅魚之後，長尾幼蟲就會喺最終宿主嘅腸發育成成蟲然後產卵。
感染及預防：
雖然佢嘅幼蟲有唔同嘅階段，但只有最終階段嘅幼蟲，即係長尾幼蟲先會感染到人類
換言之就算我直接將啲蟲蛋吞落肚其實都唔會有事
因為幼長嘅成長階段係牽涉到橈腳類同埋魚類。而長尾幼蟲只會喺魚度搵到。
慎防大家唔知乜嘢係橈腳類，Gif入面嗰隻就係橈腳類嘅幼蟲，而兩張圖入就係橈腳類嘅成蟲。橈腳類係喺海水同埋淡水極之常見嘅甲殼類動物，不過佢哋好細，大約得1-3mm，幼蟲會更加細，幾乎肉眼睇唔到
其實唔同種類嘅裂頭絛蟲嘅長尾幼蟲可以喺唔同嘅魚身上搵到，而今次呢一條日本絛蟲嘅幼蟲就主喺三文魚身上搵到。當然人工飼養嘅三文魚就相對安全，但如果係野生嘅話就有機會會遇上呢啲寄生蟲。要將魚肉入面嘅寄生蟲殺死有兩種方法，一個係將魚肉以攝氏55 °C或以上烹煮至少5分鐘，另一個方法係將魚肉冷藏喺-8 °C 12個鐘或者-10 °C 6個鐘。
診斷：
喺診斷同埋寄生蟲鑒定方面，節片嘅結構其實都可以畀到線索我哋。
最常見會感染人類嘅絛蟲包括豬帶絛蟲（Taenia solium）、牛帶絛蟲（Taenia saginata）同埋裂頭絛蟲，而呢三種絛蟲節片嘅結構都有所不同。其中一個方法就係將墨水（Eg. India ink）打入去節片入面嘅子宮度然後觀察子宮嘅結構。
呢張圖可以睇吓唔同種類嘅絛蟲嘅子宮結構。牛同豬絛蟲嘅子宮都可以見到好多好長嘅分支，而裂頭絛蟲嘅子宮就係呈玫瑰花瓣形狀。呢三隻絛蟲嘅頭部結構都有所不同，呢張圖可以參考吓，但因為今次拎到嗰條蟲係無頭的，所以用唔到頭部做鑒定。
用針筒打完India ink 入節片子宮之後可以見到個子宮係呈玫瑰花瓣形狀，所以可以判斷佢係裂頭絛蟲。
而用其他染色方法其實都可以觀察到佢哋子宮嘅結構，例如下面呢三幅圖就係用咗Mucicarmine stain 去染：
用咗Mucicarmine stain就可以更加清楚咁見到佢哋花瓣形狀嘅子宮結構。
不過我都唔知點解我會染成咁，書上面染出嚟啲製成品都唔係呢個樣不過睇到就算咁另一個診斷方法就係觀察糞便裏面有冇蟲蛋。佢哋嘅卵係鵝蛋型，55 - 75 µm x 40 to 50 µm，卵嘅頂部有卵蓋（Operculum），作用係等卵成熟之後幼蟲可以打開卵蓋走出嚟。而卵嘅底部有機會見到結節（Knob）。
呢兩張圖就可以見到呢條蟲排出嚟嘅蟲卵嘅樣都係同裂頭絛蟲蟲卵吻合。至於牛同豬絛蟲嘅蟲卵個形狀就好唔同，蟲卵會呈圓形或者少少橢圓形，直徑係30 - 35 µm，卵殼比較厚而且有條紋。
不過好可惜嘅係雖然透過睇節片子宮結構、睇頭部同埋睇蟲卵可以判斷到佢係裂頭絛蟲，但係並分唔到到底係裂頭絛蟲嘅邊一隻品種（Eg. 節裂頭絛蟲 vs 日本絛蟲）。唯有透過基因排序嘅方法先可以準確咁分辨到佢哋嘅品種。
Target gene: COX1 gene
如果萬一真係感染到呢隻寄生蟲嘅話只要去睇醫生食藥就可以醫到了。通常會使用Praziquantel嚟治療。
如果唔治療嘅話條蟲可以留喺條腸入面幾十年都得
