準備開始追櫻啦
襯仲有時間，同大家做下心理輔導
預測唔使盡信，上年個post睇到大家眼都突埋
二月暖，三月頭凍，三月尾又暖，啲花期錯晒
關東以東遲開，關東以北早開，好似得四國同九州叫差唔多
天氣變幻莫測，氣温時高時低，好難做的
櫻花分好多種，花期唔同，由一月尾開到五月
預測網站只會以幾棵標本櫻花樹做預測，多數估染井吉野櫻
同品種嘅櫻花，喺唔同地方，唔同氣候嘅情況下都會唔同時間開
就算同一地方，高度差幾米都可以開得唔一致
預測機構會定期更新，由而家到五月，應該會做十幾次
所以個時間真係唔太準，唔好擔心太多
甚至乎去到開前一日都估錯
如果天氣情況許可，櫻花可以喺兩三日內開齊
開花幾日後(5日內)就滿開，滿開幾日後(7日內)就櫻吹雪
花期極限係個幾星期
但花好脆弱，一旦翻風落雨，好快就落晒
追櫻開心有三個可控條件：信心 信念 信仰
兩個不可控條件：天氣 運氣
一個唔知可控定唔可控條件：期望管理
上年辭職後就由四國追櫻追到北海道
同大家追得好開心
不過今年太忙，應該去唔到睇櫻花
只好喺呢度等大家po相
Anyway祝大家好運
