（四）訊息，續
今日（兒童）主日學果時做左張類似咁既野：
唔好睇小呢類練習，呢樣實在係睇聖經非常之重要既技巧。
（１）你要造(28:31) vs 他做了(39:22)
呢個係好正常，因為28章係吩咐，39章係照做。
但係特別既位在於 39:24 個「他們做了」，係複數既「他們」。呢個字引起左我去諗落去，點解突然之間轉用複數人稱？
比較32章既金牛事件前後，「他們」本來要被滅絕(32:10)，摩西求情(32:11-13)，上主先回心轉意（同一個字 וינחם wa-yinnachem 另外既翻譯：「後悔」）。後來摩西叫屬上主既去佢度，竟然冇，淨係得利未人(32:26)，結果摩西命令利未人，「人人都要殺掉自己的兄弟、朋友、親人！」，殺左 3000 人 (32:27-28)。
呢D唔去同上主企係同一陣線既以色列人，就係「他們」(39:24)。
咁問題就黎喇，係祭司外袍提起「他們」，有咩意義？
未答呢條問題之前，先討論另一個較為相關既差別。
（２）金鈴(28:33) vs. 純金的鈴(39:25)
金，令佢地（「他們」, 39:24）諗起咩？
出埃及記32:19-20
//19 摩西走近營地，看見那頭牛，又看見有人跳舞，摩西就動烈怒，把那兩塊版從手裡摔下去，摔碎在山下。
20 他拿了他們所做的牛，用火燒毀，磨成粉末，撒在水面上，叫以色列人喝。//
金，係摩西烈怒之下質佢地飲落肚既野。
39章講金鈴既時侯，特別加左個「純」字 טהור tahor。（呢個字亦都好多時用係「禮儀上既潔淨」，相對於「禮儀上不潔淨」טמא tame，即係有某方面「唔純正」。）
個「純」字對於佢地係好敏感，正正就係因為佢地對上主既心唔純正，只係想求其有個帶領者，唔見摩西就整左隻包金牛像出黎。唔洗諗我有冇講應用架喇，自己心照，如果諗住心想事成，你願你既旨意行係地上，如同主既旨意行在天上，呢件袍上面既「純」金既鈴就係審判。
（３）亞倫服侍既侯(28:35) vs. （無）
造外袍既經文，除左同以色列眾人（「他們」）講野，亦都同亞倫祭司講。係西奈聖山，上主既面前，亞倫應該做咩？(28:35) 佢實際上又做左咩？
出埃及記32:1-6
//1 人民見摩西遲遲不下山，就衝著
亞倫聚集，對他說：“起來，給我們造一些可以走在我們前頭的神明。因為把我們從埃及地領上來的這個人摩西，我們不知道他出了甚麼事！”
2
亞倫對他們說：“把你們妻子、兒子、女兒耳朵上的金環摘下來，拿來給我。”
3 眾人民就把他們耳朵上的金環摘下，拿來給
亞倫。
4 [亞倫]從他們手裡接過，用雕刻工具雕刻，造成一頭包金牛像。他們就說：“以色列啊，這就是你的那些神明，曾把你從埃及地領上來！”
5
亞倫看見了，就在牛像面前築了一座祭壇。
亞倫宣告說：“明天是耶和華的節日！”
6 次日，他們清早起來，獻上一些燔祭，又帶一些平安祭來；然後人民坐下吃喝，起來玩樂。//
尤其係32:5，特登夾埋講左5次亞倫個名。
猶太傳統解經入面(Exodus Rabbah 37:2)，理解亞倫咁做係為左拖延，話摩西落到黎見到亞倫手山拎住個鎚仔打造緊個像，摩西覺得亞倫同佢地夾份敗壞，上主就向摩西講左一個咁既故事：
從前有個王子，好自大既，佢攞左個鑿，想鑿冧佢父王間屋，個王子個老師就同佢講喇：「唔好整到自己咁攰啦，你比我，等我幫你鑿冧佢。」個王望住佢，就同佢講：「我知你既意思係想點。只要你仲活著，我係唔將王宮比你以外既人管。」
事實上，咁樣解都好符合經文，亞倫係叫人（男人）問佢老婆仔女攞晒D金環。呢樣可能已婚男士容易D理解，問自己個老婆攞錢有咩難度。而亞倫就叫晒全部以色列人咁做。好可惜，拖極都未拖到摩西返黎。
我要強調，呢個係解經而有既傳統。
申命記9:20 始終都講明左，上主嬲埋亞倫，要滅絕佢，摩西為佢祈禱。
留意聖經將比亞倫既教導（聖衣點造）放係金牛事件之前。
講左咁耐，而家就講埋個教導喇。
（４）免得破裂（28:32, 39:23）
明明係找不同，兩節都有呢句，有咩不同？
原來原文用左好多一語雙關，唔直接睇好難講到，咁就慢慢逐隻字睇下兩段點講。我唔期望大家聽過呢類教導，所以比埋 parsing 工具／原文字典條 link ，邀請大家自己睇真D，睇下我講既係咪真係符合聖經。格式：
希伯來文（拼音，直譯）
表面意思／可聯想既理解
出埃及記28:32 (
https://bible.fhl.net/new/parsing.php?graph=1&engs=Ex&chap=28&sec=32&mode=3&m= )
וְהָיָה פִֽי־רֹאשׁוֹ בְּתוֹכוֹ （w-hayah pi-rosho b-tokho，佢個頭既口要係佢當中）
外袍頭果個位要有領口／百姓既領袖既說話要係百姓當中
שָׂפָה יִֽהְיֶה לְפִיו סָבִיב （safah yihyeh l-fiu saviv，唇要作為口既四圍）
領邊要圍住領口／個領袖要有說話，作為四圍（既人要聽）既說話
מַעֲשֵׂה אֹרֵג （ma'aseh oreg，編織既作為）
用編織既方法／編織咁既作為
כְּפִי תַחְרָא יִֽהְיֶה־לּוֹ（k-fi tachra yihyeh-lo，好似鎧甲既口去到佢）
佢要有好似鎧甲既領口／當憤怒既說話臨到佢
לֹא יִקָּרֵֽעַ׃（lo yiqqarea' ，唔會撕裂）
唔會撕爛／唔會撕裂（衣服）
有兩點要先補充。
「鎧甲」תחרא tachra (
https://bible.fhl.net/new/s.php?N=1&k=08473 ) 既字根好似「發嬲」 חרה charah (
https://bible.fhl.net/new/s.php?N=1&k=02734 )。
撕裂衣服，係心情激動既表達，基本上指哀痛（創世記37:34）、自卑（列王紀下22:19），但都可以有其他情況，例如：列王紀下11:14 ，亞她利雅被篡位，撕裂衣服大叫「反了！反了！」；民數記14:6，探子事件之後，約書亞、迦勒係以色列全會眾怨果時，撕裂衣服遊說佢地唔洗驚。
如果用表面意思理解，就好似譯文咁。
如果用相關既意思，咁就係好特定對祭司既指引：祭司係全會眾既領袖，佢要代表上主講出上主對百姓既吩咐，好細心好有條理咁講好似編織咁，連佢／其他人嬲果時都唔可以將情緒表現出黎，要謹守崗位。
出埃及記39:23 (
https://bible.fhl.net/new/parsing.php?graph=1&engs=Ex&chap=39&sec=23&mode=3 )
וּפִֽי־הַמְּעִיל בְּתוֹכוֹ （ufi-ha-me'il b-tokho 而外袍既口，係佢當中）
而外袍既領口係外袍中間／當不忠奸詐既說話係百姓中間
כְּפִי תַחְרָא （k-fi tachra 好似鎧甲既口）
好似鎧甲既領口／好似發嬲既說話
שָׂפָה לְפִיו סָבִיב （safah l-fiu saviv，唇作為四圍既口）
領邊圍住領口／說話作為四圍（既人要聽）既說話
לֹא יִקָּרֵֽעַ （lo yiqqarea' ，唔會撕裂）
唔會撕爛／唔會撕裂（衣服）
再補充下：「外袍」（מעיל me'il，
https://bible.fhl.net/new/s.php?N=1&k=04598 ），字根原意係「遮住」，呢個字根另一個方向引申既意思係「做遮住（唔見得光）既事」，即係行為奸詐，再引申到對人／神不忠（מעל ma'al，
https://bible.fhl.net/new/s.php?N=1&k=04604 ）。
「編織既作為」呢段都有，係上一節。同上面果段唔同既，係「喺佢當中」既野唔同左，並且冇左「臨到」(28:32)，改左次序。
同樣，如果用表面意思理解，就好似譯文咁。
但係如果用相關既意思，咁就係另一個對祭司既指引：當四圍既人都對神不忠，行為奸詐，怒氣沖沖咁去到個祭司度，佢仍然要講出神既吩咐，並且唔可以用激動既情緒回應，做好中間人既職分，為佢地向神代求。
呢樣仲難過上面，當對住唔講道理既人（例如講得出「果個摩西都唔知去左邊」既百姓），唔係咁易處理，作為神既代表，對神既不滿都會發洩埋係自己身上，唔單止要食死貓，仲要為左「佢地」代求。有咁樣既質素既人，就做到合神心意既祭司。
彼得前書2:9
//9 然而你們是蒙揀選的族類，是君尊的祭司，是聖潔的國家，成為神特有珍貴產業的子民，為要叫你們宣揚他的美德——他召你們離開黑暗，進入他奇妙的光明。//
冇錯，講親祭司，都包埋我地每一個。
比較返金牛事件前後，上主首先係件事發生之前提醒，再係之後好針對咁再教導。今日既我地，如果肯聽從，神都好樂意提醒、教導。
（５）主耶穌既榜樣
我地一開始睇緊路加福音入面既耶穌 BB ，路加既用字寫到好似形容會幕咁，今次就詳細睇左會幕既其中一樣野——祭司既聖衣，其中件外袍。
其中既教導，我地係主耶穌身上睇到幾多？
佢點樣將父既吩咐同教導（包括聖經）講出黎同活出黎，無論係佢自己嬲（馬可福音3:5），又或者係詭詐既說話當中（路加福音11:54），定係當佢好痛苦果時（路加福音22:42-44），讓我地都照學。阿們。
感謝神
阿門
