我係男，今年25。年幾兩年前同我老婆結婚，結咗婚後同老豆，呀妹，仲有老婆住。結咗婚無幾耐就發現呀妹有骨癌，加上呀妹仲細，宜家先得17歲，所以一路都花咗唔少時間照顧呀妹，所以搞到我老婆話我唔關心佢。我都好少會話翻佢轉頭，因為我都承認自己某程度上真係會因為呀妹嘅事而忽略咗佢。
事實上我知佢地兩個一早已經有不和。我同我老婆係喺英國讀大學嗰陣開始拍拖嘅，出左嚟做野就結埋婚。未結婚嗰陣帶佢翻屋企食飯，都意識到佢地兩個個氣場唔係好啱。我老婆係比較痴身嗰種，而我呀妹係比較獨立嘅。有時我呀妹會睇唔過眼我老婆成日樣樣嘢都要依賴我幫佢做咁，而我老婆就覺得我呀妹好cool，份人好臭串。到老婆搬咗入嚟之後，佢地兩個都好少傾計，間中仲會有口角。呀妹入咗院我老婆都好少會去探病。而呀妹喺屋企抖嘅時候我老婆都好少會主動關心下佢，仲會有時三句唔埋兩句就嫌我呀妹呢樣嗰樣，又話佢麻煩又話佢似異性，但我就會叫我老婆把口唔好咁衰。佢次次都會話我咩都幫住曬個妹，同個妹結婚咪得囉，洗鬼娶佢翻黎。
到宜家醫生話呀妹唔係剩返好多時間，而家做到嘅野就只有令佢唔好咁辛苦。咁老豆就問呀妹我地有咩可以幫佢做，佢就話自己只係唔想再留喺醫院，想翻屋企住。跟住醫院嗰邊都話可以安排到，就只係睇我地會唔會帶到呀妹翻屋企。問題就黎喇，我老婆死都話唔可以俾呀妹翻屋企，係咁話自己唔想喺間死過人嘅屋度過世，又話帶佢翻黎咪又係要麻煩曬所有人睇住佢，又話間屋死過人就唔值錢，總之係咁搵藉口等我地唔帶呀妹翻黎。
其實我都唔明佢做乜鳩，又唔係叫佢抹屎抹尿佢咁抗拒做乜，加上呢度係呀妹屋企，點解要唔俾呀妹翻自己屋企？咁我同老豆就理撚得佢啦，咪照樣安排呀妹翻屋企囉。點知佢知道咗之後就嬲到仆街，跟住自己搬咗翻娘家住，話我唔顧佢感受，留喺度都無用，不如離婚。
其實我真係好嬲。見佢成日屌鳩我擺太多時間落呀妹度，我問心都做咗好多野去彌補，同埋都費事令佢唔開心，所以好多野都讓佢幾步。但佢就越嚟越衰格，本身拍拖嗰陣個人都唔係咁嘅，宜家就衰格到攞呢件事黎要威脅我。其實佢成日都係咁，攞d野黎借題發揮，目的都係想我擺曬全部心機落佢度，或者係想我跟佢意願去做。以前拍拖佢已經成日話我無點樣點樣，佢就要同我分手。以前俾佢攞嚟威脅嘅事都唔係咩大事，我都仲可以忍，但我真係覺得佢今舖玩大咗，真係好有衝動同佢離婚。其實反正大家都係廿中，離咪離囉。但又諗到大家都一齊咗成七年，就咁離婚好似好小氣咁
呀妹翻到黎問我佢喺邊，我都唔知點解釋好
大家點睇？
離啦仆街
睇定d先啦
你心目中都有答案啦 個妹陪左你17年架啦
仆街 唔好到阿妹過左身你先黎後悔 珍惜下啦你同你阿妹有血緣架 呢件咁既公主命
到你老豆老母有病又趕走 再到你有病直頭搶埋間屋踢你走呀
垃圾女人！
