鄭伊健早前與MIRROR成員Ian陳卓賢拍攝電影《久別重逢》，近日他忙於為新片宣傳，更接受曾一同主持《430穿梭機》的譚玉瑛訪問，於新城電台節目《QK玉瑛室》中分享與老婆蒙嘉慧的相處細節。2021年鄭伊健與蒙嘉慧移居日本，有指鄭伊健更打本給蒙嘉慧在日本開設房地產公司，不過鄭伊健在節目中透露，最近蒙嘉慧已回流香港。
蒙嘉慧居日3年回流
蒙嘉慧2021年定居日本福岡，在當地開設房地產公司，更學習日文。早前蒙嘉慧復出接拍ViuTV旅遊節目《呢度住吓 嗰度住吓》，分享於褔岡的生活。她的老公鄭伊健近日受訪，透露蒙嘉慧已回流香港生活，他表示：「佢唔做㗎喇，學習完就算，咪又係游手好閒囉！」
鄭伊健大爆蒙嘉慧沉迷打機
鄭伊健與蒙嘉慧興趣相近，最喜歡是打機，不過鄭伊健大爆原來老婆打機比他更沉迷。鄭伊健說：「睇吓咩機啦，佢有少少沉迷，我係試玩，Keep住試，但佢唔係，佢一定要打爆機，鍾意玩就會係咁玩，直至有一日唔想玩，佢本身性格好男仔頭。」鄭伊健更透露在家中沒有話事權，「冇權話事㗎！但我哋兩個想法好接近，夠用就得，已經好開心。」鄭伊健指與蒙嘉慧人生觀一致，大家亦有共識不生育，「你而家開電視睇吓啲新聞，哇……唔好搞喇呢啲……可以預料到呢個世界……」譚玉瑛追問：「而家嘅新聞啫，但你生仔個年紀唔係而家呀嘛，你係再早啲去諗。」鄭伊健表示：「唔係……你都一樣㗎！」同樣沒有生育的譚玉瑛笑指：「呢條問題由我嚟問真係激氣。」
鄭伊健曾投資失利
譚玉瑛在節目中與鄭伊健話當年，她指當初認識鄭伊健已覺得他為人乖巧、正氣，而且非常孝順，曾向她透露要買樓給父母。不過鄭伊健卻指早年正因為買樓當投資，最後物業變負資產，鄭伊健表示：「點知一買樓市就冧，可能買多咗，變咗負資產，已經唔記得蝕幾多，總之我就明白一句說話，就係『無事一身輕』，點會諗到好畀心機工作，但無啦啦多撻瘌，好彩仲有得做，慢慢填晒啲氹。」
