第一章 •《富士大廈遊記》
「喂，有冇聽過富士大廈呀？」碧咸問。
「冇喎。」我皺住眉擰一擰頭回應。
我叫金仔，問問題嘅呢位係我由細玩到大嘅朋友叫碧咸。相傳係因為佢老母好鍾意碧咸，所以幫佢改咗個英文名叫David，從此就個個都叫佢碧咸喇。
「早兩個禮拜我個中同帶咗我去，食完飯帶你哋去行下呀，包你兩個樂而忘返。」
我由小學識佢識到而家，由佢毛都未岀到而家成日帶我去學壞。我第一次食Shisha，第一次落club都奉獻咗俾佢。今日，睇嚟佢又要帶我去一個新嘅地方俾我學壞。
雖然我未聽過富士大廈呢個名，但以我對碧咸嘅認識，應該都唔係咩好野嚟㗎喇。
「富士大廈？做咩㗎？」我身旁嘅呀Sir追問。
呀Sir係另一個我哋由細玩到大嘅朋友，而佢之所以叫呀Sir係因為佢真係好撚煩，乜柒都要管，好似學校D呀Sir咁。
冇熄電腦喇，電視太大聲喇，係房食野喇佢都會話我一餐，講緊嗰間係我間房嚟㗎喎！
「點呀，呀Sir！」
自從有一次佢話完我之後我忍唔住咁樣應佢，我哋就以後都叫佢呀Sir喇。
「睇你兩個個樣都冇撳過鐘仔㗎喇。」碧咸笑淫淫咁回答。
「撳鐘仔？啫係叫雞呀？」我問。
「撳鐘仔係撳鐘啫，唔一定要入閘嘅。之後D女咪會著住個bra呀，性感內衣走嚟開門，你睇啱嘅咪入去囉。」
「不過事先聲明呀，我係唔鼓勵大家叫雞㗎。我都唔係太習慣同一班呀伯share同一個窿，仲要駛我幾舊水添。不過食飽飯去行下，消化下又唔駛錢嘅。當然你睇完慾火焚身嘅我咪係樓下等你囉，睇你哋兩個個樣都唔會要我等好耐㗎啫。」碧咸續道。
「我驚你要等到聽朝呀。」呀Sir回應。
「下話，你帶夠錢至好呀，我唔會攞錢嚟贖你㗎，等你叫霸王雞上報紙囉，你估你真係呀Sir呀？」
「有時有D鬼妹仲會乜都唔著咁開門添，點啫？去唔去呀？」碧咸追問。
對於碧咸呢個提議我有D期待，有D緊張，但同時間亦都有D驚。雖然我個人未叫過雞，亦都冇試嘅打算，甚至連去都冇去過呢D地方，但去見識下，睇下又無壞嘅，只係唔知點解個心硬係有D囉囉攣咁。
「你去我去囉。」呀Sir望住我講。
佢哋兩個嘅目光一下子投放哂係我身上，令我有一絲嘅不安。
「會唔會俾我條女知㗎？」
驚俾Tiffany知道應該係其中一個令我囉囉攣嘅原因。
「去行下啫，又唔係真係叫你去叫雞，冇事嘅。」循循善誘嘅魔鬼碧咸道。
「去…囉。」
或者豬朋狗友就係講緊佢哋兩個。
如是者，食完飯之後碧咸就帶住我哋一行三人由銅鑼灣向西進發，前往呢個男人嘅天堂——富士大廈。
「有冇帶夠錢呀？駛唔駛撳定先呀？」行到半路途中，碧咸突然指住一部ATM同我哋講。
「你實帶夠喇，到時緊火問你借咪得囉。」我回應。
「我冇㗎，我好清楚我去行㗎炸。要扑野我去蘭桂坊喇，都唔駛五舊水。」
「唔撳就行㗎喇喎？」碧咸續道。
「撳你就撳，行喇。」
我好清楚我只係去見識下㗎炸，我絕對唔會做D對唔住Tiffany嘅事㗎！
好快我哋就嚟到一個比我想像中靚同企理嘅入口，成個大門雖然好窄好細個，但呢到嘅裝修同佈置俾到我少少宮殿嘅感覺，或者代表住只要你俾得起錢每個入到嚟嘅男人都可以有皇帝式嘅享受？
我抬頭一望入口上方俾金色框圍住，會發光嘅四隻大字。
「富士大廈」
第一次嚟呢D地方嘅我始終都係好驚會俾人見到，於是我吸咗一口氣，好快就跟住碧咸入咗去喇。
「呢D賽後『包膠』緊喇。」碧咸指住門外幾個食緊煙嘅男人講。
穿過入口之後，眼前即刻就係一條樓梯，而人龍已經排到去接近樓梯底嘅位置。
「嘩，咁多人嘅。」我不禁驚嘆。
「唔係點搵食呀？成棟樓都等緊接客喎。」碧咸回應。
「通常D人都直接搭到上頂樓，然後逐層逐層咁掃返落嚟。見到啱嘅就記住佢幾多樓，行哂之後味上返去幫襯囉。」碧咸續道。
「咁總共有幾多樓呀？」呀Sir問。
「廿…好似廿二呀。」
「行廿二層樓梯？」我聽到都有D腳仔軟。
「你行到落嚟就會覺得好快，想再要多幾層㗎喇。信我喇。呢個會係你人生行得最快嘅一條樓梯。」
碧咸搭住我嘅膊頭，微微笑住好肯定咁點咗一下頭。
等咗幾架𨋢之後，終於輪到我哋企係𨋢門嘅前邊。睇住幾個男人笑笑口好滿足咁係左手邊嘅樓梯行到落地下，令我對今敞嘅旅程開始有D期待。
「嘩，架𨋢咁撚細嘅，唔怪得等咁撚耐喇。」我道。
我哋三個入咗𨋢之後，基本上已經霸咗一半嘅位。碧咸撳咗廿二樓之後，就向後行咗幾步，嘗試騰岀一D空間俾後邊嘅幾位「老細」。
入多幾個人之後，電梯嘅空間已經所餘無幾。𨋢門前嘅一個呀叔經過幾番思量之後，決定一個箭步踏前，將僅餘嘅空間都填滿埋，令到原本已經擠逼嘅𨋢變得更加擠逼。
焦急如焚嘅呀叔冇浪費到任何一秒，隻手撳完8字之後，就連環撳落閂門嘅制幾下。我相信佢就係碧咸所講，已經行完一轉揀啱咗，有特定目標嘅人。
「果然好緊火呀。」
我係心入邊自言自語，不受控嘅嘴角微微咁向上揚。
碧咸，呀Sir同我六目交投，大家嘅面上同我都掛住同一樣嘅笑容，我相信佢哋同我一樣，都係諗緊同一樣野。
男人始終會理解男人嘅諗法嘅。
我抬頭望住𨋢入邊嘅顯示器由地下一路上到20，21，22。𨋢門打開嘅一刻，睇住大家都好雀躍咁行岀𨋢，再次勾起我嘅好奇心，令我好想快D探索一下呢到嘅神秘魔力。
！
等到我
