每年叱咤投票都會引起唔少風波，JFYT成員床哥日前開live，提及Edan明禎甜蜜遊夜市一事，呼籲脫粉爵屎過檔，將叱咤票投俾YT周殷廷同JFYT，引嚟姜濤留言直指床哥無品，出聲力撐Edan，其後床哥再出story暗串！
MIRROR今日全體出席活動，姜濤接受訪問時就表示好尊重每一個音樂單位，琴晚嘅留言係就住床哥嘅片段抒發感想，唔認同床哥嘅拉票做法 。
佢指睇完條片後：「係咪要用呢個方法去爭取票數呢？我覺得呢件事係值得討論嘅 。係我心目中嘅價值觀，身為公眾人物，一言一行其實都好有份量，大家都係同行，（希望）將心比己多啲囉 。」姜濤指公眾人物講每句說話，都可能有追隨者模仿：「所以我地講每一句說話都要思考過，我覺得唔係一句講笑就可以無事，因為你可以講笑，但有啲人可能會俾你無意中嘅玩笑傷害咗都唔一定 。我覺得我唔回應嘅話，唔知下次會唔會有第二啲嘢，都用咁樣嘅方式去做 。」
而風波另一主角Edan就感謝姜濤嘅保護，指平時都有留意JFFT，指床哥好聰明好有諗法，好respect佢地，覺得佢地嘅言論唔係有惡意，相信只係開玩笑：「可能都會無意中傷到其他人，都可以理解嘅，最緊要都係互相尊重，希望事件唔好演變做對立層面 。」佢指YT大哥琴晚都send msg俾佢講唔好意思，又向爵屎大派定心丸，事業永遠排第一，會用作品報答佢地嘅應援 。
