（封筆前最後遊記）由北海道到廣島，用單車橫越1300公里，暫別連登。

今次冇AV女優。
今次冇AV女優。
今次冇AV女優。
麻煩大家著返條褲先

大家好，我係新東寶

首先想同大家講下少少近況，因為最近俾admin ban發言ban咗幾次，最近一次直頭講到明叫我以後同AV有關嘅po要開返喺成人台所以以後喺公海應該都唔會再點樣見到我出現同AV女優event有關嘅遊記同新聞po都要停一排喇

當然大家有咩同AV女優event有關嘅疑問，都歡迎入嚟成人台搵我同其他巴打問，大前提係我仲未俾人永ban

再簡單啲嚟講，而家我就好似啲AV女優咁，要休業一段時間喇所以呢篇係一篇同大家告別嘅遊記

喺短暫封筆之前，我想喺旅遊台呢度再留低少少自己嘅腳印，想做一啲短時間內都冇人咁易做到嘅嘢，嚟同大家告別聽起嚟有啲中二病，但一諗起庸庸碌碌幾十年，每日都係倒模形式嘅返工放工，到老咗先發現想行都行唔郁，做咩都有心無力嘅時候，想做就已經太遲趁而家行得走得，屋企又冇咩包袱負擔，做啲自己想做同鐘意做嘅嘢，我又覺得冇咩唔啱嘅地方

於是，我開始計劃呢一個聽起嚟有啲大膽嘅旅行。

我要踩單車，縱貫日本。


（喺去尾道嘅途中影低嘅，背景係新尾道大橋。）

先講少少我自己喺踩長途單車呢方面嘅經驗同背景，大概8年之前同朋友試過一次由大阪踩去東京，仲記得當時因為要趕住返香港做黎生另外幾個朋友可以遲一日先返香港，我就要將最後兩日嘅路程縮到一日完成，結果當年最後一日我喺靜岡出發，喺一日之內足足踩咗160km先去到東京，由朝早7點踩到夜晚12點，中途仲淋雨淋咗大半日，單車衫都換咗兩套，最後喺唔想著住濕衫褲嘅情況下，係著住牛仔褲嚟踩


（八年前淨係揹一個背囊就行得）

嗰日個經歷簡直係畢生難忘，我仲記得嗰晚閤埋眼瞓教，都仲見到啲街燈同路牌嘅殘影可想而知成個過程係幾咁深刻。


（前往浜松當日經過嘅一座大橋。）

大家可能以為我係喺日本租車完成今次嘅旅程，但其實呢兩次嘅旅程我都係抬埋自己部單車過去，我嘅單車係8年前買嘅Giant TCR Advanced 2，係一部公路車，型號上係俾一啲踩咗一段時間嘅半新手使用點解要帶自己車？因為我覺得呢種單車旅程唔用自己嘅車嘅話，會冇咗個意義，再加上其實大部份航空公司都接受託運呢啲運動器材，俾多300蚊左右就搞掂，既然係咁就不如用自己架車去完成呢件事


（宇都宮朝早嘅天色。）

行李方面，我買咗一個放喺單車後面嘅馬𩣑袋連背囊，三個袋可以扣埋一齊好穩陣咁放喺單車後面，兩個馬𩣑袋一邊一個，一個裝單車衫同維修裝備，一個裝日用衫同其他日常物品，因為今次要去攝影會，背囊仲有電腦同相機另外仲有一個裝單車用嘅單車袋，因為日本嘅規定唔同香港，當你要上地鐵上火車嘅時候，唔係就咁拆咗個前轆就俾你上，係需要你裝入一個單車袋先至可以上車，所以我另外仲有一個單車袋掛喺前面嘅把手，就係for應急嘅時候要上火車都唔會出現唔俾上嘅情況。



（入咗袋大概就係咁嘅樣，因為有啲酒店樓下冇位俾我泊單車，所以喺某啲地方我都係要pack起架單車拎埋入酒店房。）

最後成架單車連埋行李，大概有20kg，就係拎住呢20kg，我就由香港出發，開始展開呢個我決定一生人一定要做一次嘅日本縱貫之旅。

經常去日本玩嘅朋友又好，間唔中去日本玩嘅朋友都好，我諗大家都唔會鐘意喺廉航客機上面坐多過四個鐘，我直頭係抗拒得好緊要嗰種所以今次我並唔係選擇直飛北海道，而係先飛到東京成田機場，喺機場附近嘅酒店瞓一晚，再坐第二朝嘅內陸機去北海道。

去到北海道嘅新千歲機場之後，我打算由機場踩出去札榥，作為今次旅程嘅一個小小嘅熱身；內陸機價錢都唔係好貴，連埋託運架單車夾埋都係$600左右，又可以瞓一晚補充體力，又可以解決唔駛坐太耐飛機嘅問題，一石二鳥。


（成田機場附近行路10分鐘就到嘅酒店，都係一般商務酒店嘅感覺，一晚大約$400。）


（最大嘅挑戰其實係5點起身去機場...）

就係咁，我喺旅程嘅第二日上晝9點半，就嚟到北海道嘅新千歲機場，機場附近有專為單車人士而設嘅單車架同砌車嘅地方，相當貼心。


（架單車咩行李都未裝嘅時候就係咁嘅樣。）

由於都太耐冇掂過架車，再加上唔係熟手嘅關係，我都搞咗大概兩個鐘頭先開始出發。由新千歲機場踩出去札榥，大約只係40km嘅路程，但我足足踩咗三個幾鐘先去到，因為喺沿途架單車出現咗唔少問題：
- 掛喺車頭嘅單車袋經常刮到個前轆
- 兩個馬𩣑袋因為同行李架嘅size唔夾，而且因為太重，導致個行李架歪埋一邊，有一邊嘅馬𩣑袋不斷刮到個車轆
- 行李架亦因為承重太重嘅關係，有一邊完全夾唔實個車架


（札榥某個路邊。）

由於成個旅程都只有我一個人嘅關係，所有問題我都要自己一個人去面對同解決，嗰種人在外地遇到問題時候嘅徬徨同無助，我相信經歷過嘅人一定會明我嘅感受。我一路踩一路諗，點解我咁on9要自己攞苦嚟辛舒舒服服去旅行唔得嘅咩，托架單車過嚟，又要整又要盛，仲要自己踩，有車唔坐新東寶你係咪傻撚咗！？

旅程嘅第一日，認真，我已經想返香港。


（最後千辛萬苦先踩到去札榥市中心。）

原來巴打都有踩開

喺北海道嘅第二日，其實心情都一般，一嚟發覺到今次嘅旅程冇諗得咁簡單，單車嘅問題唔係咁容易就解決到，二嚟係當一次過一堆問題擺喺你面前，等緊你去解決，你個人嘅旅行心情都唔會好得去邊成個旅程就係為咗過嚟踩單車，而而家最緊要嗰架單車有機會成為你呢個旅行嘅阻礙，咁應該點？喺北海道換過架車？即刻寄晒啲唔用嘅行李走？定係執埋啲嘢搭飛機返香港？呢啲都係我有諗過嘅方案

最後我都係決定俾自己散下心，喺札榥坐火車去到小樽，行下街睇下風景，俾自己分下心，話唔定就會諗到其他解決嘅方法



（小樽運河。）

坐咗大概一個鐘頭嘅火車就嚟到小樽，係一個中間有一條運河嘅城市仔，都係啲遊客嘅熱門地區之一，間唔中都聽到廣東話；食個咖哩飯，整返杯北海道牛奶雪糕，喺15 16度嘅海邊吹住海風聽住啲雀仔喺度叫

我望住一望無際嘅大海，有一刻覺得自己真係好渺小，連帶我嘅問題都一樣咁渺小，真係踩唔掂咪搭車囉；個袋刮到個車轆，咪試下再綁過囉；中間加條繩拉住，話唔定就解決到個行李架歪埋一邊嘅問題呢

咦，好似又唔係諗得咁悲觀，架車同埋我，好似仲有得救。


（喺小樽水族館影出去嘅海景。）

喺小樽行咗大半日，日落之後我就返到札榥。要解決焦慮，最好嘅方法就係面對你嘅焦慮喺100円店同超市買咗啲需要嘅材料，我就嘗試幫架單車改裝。將個單車袋調轉綁，將側埋一邊嘅馬𩣑袋用繩拉向前，已經解決到刮轆嘅問題仲有淘寶貨不愧係淘寶貨，用唔夠兩日個行李架啲螺絲就開始滑牙，順手一口氣換晒佢；解決咗大部分問題之後，成架單車即刻順暢咗好多，亦都令我對跟住落嚟嘅旅程，有返唔少信心。



（札榥市中心嘅夜景。）


（中間拉一條繩拉向seat位，再喺行李架綁兩條繩隔開馬𩣑袋同個轆，係就係肉酸啲，但至少解決到個問題先。）

嚴格嚟講唔能夠算係踩開

Lm

屌 樓豬好撚型 睇到我濕曬

做黎生邊有咁多時間/精力 keep到體能得閒黎個大trip我覺得就叫對得住自已

就係咁，喺北海道一共停留咗3日，我又開始我嘅單車之旅，我要先由札榥踩去一個叫苫小牧嘅地方，夜晚搭船去仙台，再由仙台繼續踩落東京

其實我心目中最理想嘅路程，係由札榥踩到去函館，坐船落去青森，再由青森踩落去東京，但咁樣就要再用多大概5日嘅時間，睇返自己嘅日程我要喺20/10去到東京，所以最後唯有放棄呢個方法。

但我同自己講，終有一日我會返嚟補完返呢段路程



架單車改裝過之後，雖然外觀上明顯冇之前咁簡潔靚仔，但比起第一日嘅時候就順暢咗好多，由札榥去到苫小牧大概60km，我用咗大概3個鐘頭就完成，連我自己都嚇親。

苫小牧碼頭有一艘定期每日都會開去名古屋嘅郵輪，中途會喺仙台停泊，一晚就去到，夜晚6點上船，第二朝10點落船。呢架郵輪除咗裝客同裝貨之外，仲可以裝貨櫃車私家車電單車，甚至仲可以入埋我呢啲單車，跟住船公司安排嘅次序，我跟喺啲電單車後面，一齊駛入去甲板等泊車。

同班電單車一齊排隊上船，個感覺好奇妙。




（裝車嘅甲板就係咁嘅環境。）

呢架郵輪有大概6層，我架單車就泊咗喺3樓嘅甲板，5-7/F就係客房同埋俾遊客活動嘅地方，設施都一應俱全，可以睇到海景嘅大浴場、夾公仔機、每晚都有表演嘅大舞台、自助餐等等，除咗收唔到電話訊號之外，船上面嘅設置基本上都唔會令你悶。


（瞓嘅地方當然都有分class，我呢個係二等床位，最平可以瞓三等嘅榻榻米，最貴可以瞓靚靚獨立房，我呢個二等床位嘅船飛+單車上船嘅費用，一共大概係$700港紙。）



（船艙入面大約就係咁樣。）


（夜晚可以聽人唱歌，之後仲會播電影，我嗰晚係睇Barbie，睇到一半頂唔順太悶）

食完飯，我走咗上7樓嘅甲板吹下海風，喺船入面唔係太feel到隻船嘅移動，但出到嚟望住啲浪花，同聽到啲浪聲風聲，就feel到隻船其實都行得好快。



我有少少畏高，唔太敢行得太埋船邊月光映射落海面，成為呢個晚上唯一嘅亮光，我望住漆黑一片嘅大海，又一次覺得呢個旅程好奇妙，好多嘢我冇預計到會發生，但同時都令我得到好多難得同難忘嘅回憶。

如果我喺札榥嘅時候就放棄，今晚我就睇唔到咁靚嘅月光同景色。

我係一個鐘意順應天命嘅人，既來之則安之，就繼續我嘅旅程啦

lm

喺東京逗留咗大概5日，都係每日去event同攝影會見女優，因為我每日都有upload踩單車嘅近況上Twitter，所以好多識得嘅日本人都有喺event度問候我今次單車之旅嘅情況，再一次令我感受到日本人嘅溫暖而逢親同啲女優講起我今次嚟係踩單車，仲要係由北海道踩到落大阪，個個都O撚晒嘴，不約而同嘅係每一個都係同我講：

「新東寶你踩還踩，最緊要注意安全，一切都要小心」


（喺東京出發之前去拜個神）

喺東京吃喝玩樂完，休息夠又開始上路。由於真係每一日都只係踩單車，都冇咩太多特別嘢可以同大家分享，我儘量舉少少特別嘅事件出嚟：

由秦野去靜岡嘅嗰一日，落好大雨，嗰日只係踩咗30km就頂唔順去搭火車，亦係我呢個旅程唯一一日喺逼於無奈嘅情況下坐火車完成。


（最後喺橫風橫雨嘅情況下喺御殿場上火車落靜岡。）

喺靜岡住嘅酒店，個酒店老闆好鐘意睇書，將原本係浴場嘅地方改裝成圖書館。


（仲有一張懷疑係手動嘅按摩椅。）

喺浜松食咗當地好出名嘅鰻魚飯。




喺名古屋住嘅民宿好簡陋，不過一晚都唔駛$200， check out係扔條匙落去條消防喉入面就走得





去近江八幡嘅路程，中途要穿過一條4km嘅隧道，我人生第一次覺得一條隧道係我行極都行唔完，隧道入面好黑，望極都望唔到出口。踩落馬路就太危險，只可以踩上路肩, 稍為大動作少少我就會跌出馬路俾車撞最後我足足踩咗20分鐘先出到嚟。想像唔到用腳行嘅話，要行一個鐘先出到嚟係咩感覺。



（中途仲俾一隻波鞋kick到差啲反車，到底咩人先會喺隧道入面扔低一隻波鞋...）

到達近江八幡嗰日好早，我去咗附近嘅一個郊區景點，食咗一個好好食嘅年輪蛋糕同近江牛蛋包飯。





（好舊好舊嘅抽水器。）

最後，我用咗六日時間由東京踩到去大阪，大概踩咗520km。

大癲

留名一身蟻

推

上面都有提過，大阪係我對自己今次旅程嘅最低要求，暫時一切都同自己嘅預計差唔多，單車狀況同自己體能上都仲可以繼續，於是我決定繼續向西出發，踩多4日，睇下最後自己可以去到邊度。

神戶係我成個旅程入面，唯一一次因為亂泊單車而收到警告告票嘅地方，不過冇罰錢，只係叫你快啲搬走架車。



夜晚嘅姬路城。





六年前因為去event嚟過岡山，六年後我踩單車嚟到岡山。



人中之龍6嘅其中一個取景地方，廣島縣嘅尾道。






最後，喺31/10，由大阪踩多大概300km嚟到廣島，我完成咗我今次嘅單車之旅。由北海道踩到東京，再到大阪，最後去到廣島，全程1300km。


（廣島嘅原爆遺跡。）

然後第二日，買咗一張我暫時咁大個仔搭過最貴嘅一程火車，重返東京。


（由東京踩落廣島用咗十日，搭新幹線返去四個半鐘就到）


（秋葉原先係我主場整返件蛋糕先）

冇睇開你d av post but支持

Respect 你

寫到呢度，本來諗住打啲心靈雞湯，同大家講下啲咩做人唔好輕易放棄嘅人生哲理，但寫寫下發現，其實旅程嘅每一日我都想放棄冇咩好特別嘅心得可以分享到俾大家呢喺三個星期，我發現自己係一個淨係識死頂嘅人

今次呢個旅程，出現咗好多我冇預計過嘅情況，係一個令我再一次重新認清楚自己有咩不足嘅旅程嚟。成個過程好多日都好辛苦，點會冇諗過放棄？日日都有諗，好想即刻pack起架單車去坐火車去下一個目的地，但每日踩到去住嘅地區，望到個車站牌，我又會諗，好彩我頂埋落去。

好傻，新東寶就係一個咁戇居嘅人，諗返呢幾年，睇AV打飛機咪算，寫咁多嘢打咁多字去咁耐日本做咩，又嘥錢又嘥時間。
但而家我望返自己呢六年，我又會覺得，好彩我頂埋落去先有機會認識到大家，感染到大家，豐富我人生嘅景色。

死頂，可能真係唯一一樣我覺得算係自己嘅優點。
但都奉勸大家唔好學我咁死頂做人開心舒服，先係最緊要



多謝大家一路以嚟嘅支持，我要唞返一排了，但放心，未來我會返嚟繼續死頂嘅
各位巴絲打，有緣再會

新東寶翻譯製作
17.11.2024

睇咁多av都咁好體力

cls, 佩服

點解唔揀行路呀