呢個係咪一個普遍現象？但係我冇咁嘅感覺
我甚至有啲唔鍾意香港，覺得呢個地方好瘋狂
睇返以前屋企人留低嘅相，或者以前香港電影，最近又睇返《小時候》，見到以前嘅香港，用小龍係真係好貼切，未來一片光明，細個雖然未見過世面，乜都唔識，但係隱約feel到大家都對香港人呢個身份好自豪，所以都覺得自己出生係香港係件好事
但係慢慢大個啲，識多啲野，又有youtube可以認識外國嘅文化，覺得香港好似冇乜自己嘅文化，冇其他地方咁叻或者多元化，確實香港勁人都有好多，但係文化唔係只靠神人去支撐，例如音樂，男女團，電視劇，飲食，建築，文學等等，你都唔會搵到一個方面嘅文化係可以用香港嚟做代表，係最有特色或者係世界上數一數二好，除咗一樣嘢，金融或者賺錢
但係呢個就係我覺得瘋狂嘅位，就係太過物質，我唔係話錢唔重要，但係香港就係得呢樣嘢叻（以前，宜家就生意好呀
），其他都唔係好得，但係生活係咁樣嘅地方真係會開心咩？ 我唔知點樣表達呢種瘋狂，但係我就係唔應該係咁，見到大家會討論去日本玩，去大陸玩，又泰國玩，去歐洲玩，就會有一種「就算香港呢個地方係呢個地球上消失好似都冇乜所謂，留低嘅只係住喺香港嘅人，而唔係有香港文化嘅人」嘅感覺，我諗亦都係因為咁，所以先守唔住某啲地方文化嘅入侵同被遺忘於是帶住呢個感受，我想要知道點解你鍾意或者唔鍾意香港，有冇咩故事可以分享下，唔好自爆
