近日報紙不斷報道低價成交，令到大多數人誤會樓市很差，但在咁差環境下，新盤不斷一Q清袋，這根本很難想像，唯有用地產商解釋蝕本賣樓。老實說，殺人生意有人做，蝕本生意又點會有人做，蝕本賣樓只是托詞而已。
有一個事實報紙沒有報道，就是在特首宣布取消逆周期措施之後，多了很多人睇樓，不少小型地產代理重開，如果唔了解實情，以為樓市仍然下跌，到醒覺時，所有荀盤都俾人買哂，最後只能買一些又貴質素又差的單位。
打算買樓的人要有前瞻性，如果等報紙講樓市已經轉勢，到那個時候，想用較合理的價錢，買較好的單位都很難，所以，如果見睇樓的人多了，就應該知道樓市很快就會止跌回升，反之如果睇樓人數下降，樓市想唔跌都難。
金管局雖然已經放寛逆周期措施，但銀行仍然不願借錢俾人買樓，冇銀行支持，樓市要反彈仍然有難度，就好似小店明知道有很多人會幫襯，但老闆仍然唔願意請多一兩個廚師應付，生意又點會好。
原文鏈接：湯文亮專欄丨多了人睇樓 樓價唔升都唔會跌 from 橙新聞
https://www.orangenews.hk/special/1243744/?utm_source=newscopy&utm_medium=referral
