轉貼
呢張相之前 Post 過,懇請兩位管理員姐姐容許我 Post 多一次⋯⋯
呢張相係我手機內將近十年,張相來歴已經唔記得,有時睇返呢張相時,會令我想起 90 年代一段往事⋯⋯
90 年代讀緊中三下學期時,有一次行經一間百貨公司內精品店時,見到一位年輕女職員,應該是學生兼職,佢個樣好靚好清純,頭髮長長笑起黎很吸引
於是每日放學,都去精品店度睇野,順便望下佢,嗰時真係唔知點解,要離遠望下佢先安樂,記得自己仲死慳死抵兩個幾星期,儲左二百幾蚊,終於有一日膽粗粗咁,放學後去到精品店,當時佢係度,我係店內揀左隻白色熊公仔,佢面露微笑行過黎接住隻公仔,仲幫我搵左隻新公仔
佢問我係咪送比人,我嗰時緊張到唔識出聲,佢見我唔出聲再問我,係咪送比心中最重要嘅人,我話係,佢聽到就話幫我揀張花紙,仲話對方一定會喜歡,佢包起隻熊公仔時,我嗰時個心一直卜卜咁跳,待入好膠袋,付款後張收據放入膠袋內,我接過後我同佢講:我其實係送比妳,希望妳喜歡
我將裝住熊公仔個膠袋交左比佢,佢雙手接住後,好愕然咁望住我,我仲好記得掂到佢隻手,大家呆呆咁互望左十多秒,我嗰時勁緊張到急速離開
等自己冷靜左幾日,放學去到精品店時以經見唔到佢,之後一日、兩日、三日⋯⋯過左一星期⋯⋯依然無再見到佢,我可能我真係⋯真係嚇親佢⋯⋯
完成中三後,過左暑假到十月左右,行經百貨公司時,無意中見到請人廣告,就入去寫字樓見工,仲成功獲聘,入職後被派去到精品店同層附近部門度工作,而精品店有職員認到我,話佢當時收到我送比佢嘅禮物後,整日唔出聲,佢收工有帶走禮物,可是佢第二日返黎辭職⋯⋯
係我試用期內差不多第三個月,接近聖誕節檔期,有一日我放完例假返黎,有同事同我講,話琴日有個女仔黎搵我,話佢長頭髮斯斯文文,問我同事我會返幾點,我直覺覺得係佢,而精品店職員都話佢黎過,仲轉交左一盒朱古力比我,盒朱古力原本攝住一封信,但封信佢最後抽起左
仲話佢之前一直有返黎行下望下,有時佢會離遠望向你部門,有時仲係收銀處附近,甚至係你面前,你可能多客時太忙無留意先見唔到佢,聽完後我嗰一刻嘅心情⋯⋯
而嗰次之後,無再聽到佢嘅消息⋯⋯
每次因工作需要經過精品店時,都會諗起送禮物比佢時嘅情景,而每日返工落到貨場,都希望可以見到佢,可惜事與願違,直至我轉工離開公司前最後一日,都無再見到佢⋯⋯
當一個人獨處,飲住啤酒想起呢段往事時感受很深,而呢段 33 年前往事,永遠⋯永遠藏在心裏⋯⋯
中三就咁咸濕