森美攜妻日本旅行
慘遭中介通知 臨時取消酒店預約
漏夜拖喼迷失大阪 差一步要瞓街
連環拍片投訴：中介人信唔過
#森美 與太太最近拍拖去 #日本 旅遊，原本前日（11日）仲開開心心展示「求生欲」，自嘲一班車友組團在日本公路風馳電掣，自己只可以陪太太踩單車慢遊京都，到昨晚旅遊心情突然直插谷底，拍片在IG出放負表示：「我而家夜晚十點幾，喺條街度拖住個喼行緊，原因係咩呢？我訂咗 #酒店，下晝5點鐘搭火車由京都返嚟 #大阪，途中收到email，訂酒店嘅網站話我聽，我間房冇咗喇！」
他強調一個星期前已經在email中確認，但仍然慘遭臨時取消預約：「係冇得refund嘅booking嚟，即係畀咗錢，亦都confirm咗喇啵，但而家嚟到就冇。」他稱經過爭論了兩個鐘，酒店仍稱無見到森美booking。
他指全晚搵勻日本、香港網站都冇酒店，苦中作樂說：「而家喺街上面挑戰人生，估唔到嚟日本旅行，大阪都嚟好多次，shopping就試過，探險都係第一次。唯一搵到嘅酒店，喺奈良！」森美言語間不時皺眉嘆氣，但仍勉強擠出笑容講笑：「重點係…連我老婆都開始唔睬我喇，希望今晚搵到地方瞓啦！」
之後森美一小時內連出3個story交代搵酒店進展，多次對突然被取消booking表達不滿，「人生總係咁，你永遠都唔知道喺網上面confirm晒所有booking，都可以無端端話你知，你冇confirm到，畀咗錢佢話退返畀你」、「網站畀晒confirmation，Letter有confirmation number，錢都畀埋，突然之間唔畀房我。」而他心情亦隨住幾次搵酒店房間失敗，越變越焦躁：「連網吧都冇，瞓街都似喇今次！」
大約一小時後，森美在的士上拍片，透露有朋友在香港幫手搵到房間，正趕過去check in，又得知原來日本當地三連休，撞正旅遊高峯期。他與太太最終在拍片求救兩小時後，在一間不遠處的酒店的最後一間房落腳，森美多謝朋友幫忙：「多謝各位朋友，感激每一個關心每一個電話每一個短訊，好多人平時冇見冇傾但係都拔刀相助，世界有愛。」他又得到教訓說：「下次book咗房真係要再自己send email去酒店confirm先至好出發，網上網站、#中介人 信唔過。」
#娛壹
