［國際賽冇波睇］曼聯終極FF轉會窗暨吹水區 [2871]

DarrenWatkinsJr 2024-10-13 16:34:24

【曼聯前助教 Benni McCarthy 專訪 – 重點整合】

前言：本文內容依據 SuperSport 專訪影片，訪問以對談形式進行，以下為省略「碎咀」後之內容翻譯及整理，並非直譯，但求整合說話原意、次序及重點

1. 「啲人話，第三季啦，仲要繼續俾時間呀？如果啲人明白曼聯以往嘅成績，同近年嘅低潮相比，完全係神檯跌落來一樣。

你一定要由最低開始，係非常唔容易㗎。

利物浦用咗幾多年？阿仙奴用咗幾多年？」

2. 「你睇吓阿仙奴。雲加年代，每一季佢哋都肯定有歐聯資格，然後艾馬利來到，失敗咗。

阿迪達嘅成績係非常優秀，但係佢哋呢幾年贏過啲咩先？佢第一季嘅成績都係嚇死人㗎，而家阿仙奴踢得好好，啲人就唔記得之前有幾難捱。」

3. 問：坦克成日話 “Stick to the plan”，到底個plan 係咩？

「個plan……我唔可以話而家係點啦，因為我已經走咗。但我仲係助教嘅時候，個plan 就係佢任期內，將曼聯帶返上前列，唔想英超繼續由曼城獨大，同利物浦、阿仙奴、車路士有得競爭。

當然，個時間係比預期長，但係我哋開始捧杯，希望接落來會越來越好。」

4. 「坦克第一季已經捧杯。你諗吓，當時預咗曼城贏聯賽，同時阿仙奴踢得好好、利物浦都係，我哋以為佢哋會贏聯賽杯、足總杯。

但最後係我哋捧走聯賽杯，入埋足總杯決賽。

球隊開始知道要乜嘢心態先可以捧杯，但係球員都要持續有好表現，唔可以一時好、一時差，呢個先係重點。」

5. （談及摩連奴嗰套喺曼聯點解唔work）

「我哋嗰個年代點識咩叫『mental health』呀？領隊會用好多方法刺激你，越話我唔得，我就越要證明俾你睇。半場喺更衣室，領隊會屌人，咁點呀？硬食囉。

而家年代唔同，你講每句說話，都要考慮球員感受、佢屋企嘅狀況等等，你唔可以太直接。

摩連奴會同球員講，你要咁做、要企呢個位，而家嘅球員過一陣就唔記得，佢哋要反覆問返領隊，領隊要用電腦整張圖、坐低開會解釋……所以，而家做領隊唔可以太直接。」

6. 「我對華舒福講嘢好直接、而佢都好受落。其他人會用啲糖衣包裝，講啲佢想聽嘅嘢，叫佢 “Rashy”，我唔係㗎，我直接叫佢 “Marcus”，會直接話佢知有咩做得唔好。

我覺得佢生命中，唔係有好多好似我咁嘅人，會直接話佢知佢『需要聽嘅說話』，而係不停講啲『佢想聽嘅說話』。

福仔好尊重我，所有嘢都會問我意見，唔單止係足球，到今日我哋都仲有聯絡。」

7. 「我同Casemiro 同 Bruno 關係都幾好，佢哋都同波圖有密切嘅關係，卡斯踢過波圖、Bruno就全家都係波圖球迷。

我會話Bruno係 Captain Fantastic。」

8. （作為曼聯助教嘅日程表）

「我好早就起身。6點就起身，7:15am 就到達卡靈頓。 7:30am 領隊就會集合晒我哋，開技術會議。會上我哋會傾吓訓練內容、傷兵有幾多人、邊個可以參與訓練。

傷兵其實要早啲返到卡靈頓，然後醫療部門就會話我哋知幾多人可以練波。

朝早8 點，我哋就準備訓練嘅嘢，球員陸續返到來。佢哋會先去做gym，activate 個身體，跟住踩草，一直到完成上午嘅操練。」

9. 「好喇，正式操練完成之後，啲『慣犯」』--- Bruno、福仔、馬天尼斯、卡斯美路、海倫，佢哋會自己加操、比賽。我就負責做傳波、駁腳嗰個。」

10. 「然後，就食lunch。之後我哋會睇返操練片段，我會逐個同佢哋講，有啲咩你做得唔好、邊方面可以做好啲。」

11. 問：你睇住佢哋練波、你知道球會運作，咁到底有啲咩出錯？

「呢條真係百萬富翁最後嗰一題。我真係唔知，我覺得冇嘢係『錯』。

喺訓練嘅時候，你會覺得每一個球員都好優秀，絕對係歐聯水平，可以贏世上任何一隊波。

但係一上場比賽 --- 嘩，我哋喺後面嚇死咁滯。可能係心態、壓力、想法，總之就係差一塊最後嘅拼圖。」

12. 「所以我明白坦白一定係好沮喪。你睇住隊波訓練咁好，然後落到場咁嘅表現。

佢係一個好努力嘅領隊，非常著重細節、會做好多分析……佢會凌晨2點send message 俾分析師、叫佢睇吓場波嘅嘢 --- 如果我係佢老婆、我一定會離婚。

佢每日都係4、5 點先瞓，跟住我哋7點就返工喇。Erik係一個非常勤力嘅人，足球就係佢嘅生命。」

13. 「球迷成日都想『問責』，但係事實上你見到佢哋訓練嘅表現、坦克嘅努力……啲人話換領隊，我真係睇唔到有邊個領隊好得過佢。

除非Pep 由曼城轉去曼聯，否則我都唔知邊個係更好人選。

我會話，曼聯波衫，的確係一件好重嘅波衫。」

------我係分隔線------我係分隔線------我係分隔線------

14. 個訪問全長55分鐘，為咗方便大家理解，我一共睇咗4次，用咗幾乎5 小時去整呢篇懶人包。如果大家滿意呢篇長文，歡迎去 ko-fi 小額支持，謝謝。

#奧脫陳春福 #曼聯 #ManchesterUnited

👹緊貼曼聯深度報導、外媒翻譯及比賽數據
Like / Follow ⬇️
奧脫陳春福 Old Trafford Chan (ig 已開🔥）

葵新伍 2024-10-13 16:49:08