終於打爆曬全部三作，連續成個月一次過打爆曬三款惡魔城好攰呀！
同以往的故事唔同，今作貝爾蒙多一族鬼忍左，打倒老德的責任交左比教會負責。要打倒老德就必須用上三個刻印，但中途被哥哥阿魯巴斯搶走左，變成左「被奪去的刻印」。
除左搶走刻印外，阿魯巴斯仲捉走曬所有村民。因為救曬全部13位人質先可以達到真結局，所以要周圍跑圖、去最隱藏的地點尋找村民。
不過哥哥好好人，自己Handle唔到D刻印會分一D比我地。
屌！原來刻印係七傷拳，超高傷害但用完會瘋狂扣血自殺！
後來亦得知三大刻印其實係老德魔法的一部分，教會諗住以毒攻毒去消滅老德。
第二刻印係老德招牌大火球，睇嚟哥哥無講大話。
不過既然刻印係老德的力量，唔係個個都有咁強扺抗能力。阿魯巴斯強行吸收刻印之後就立即黑化，惟有忍痛親手殺掉哥哥。
哥哥死後變返正常，原來哥哥之所以去捉村民係因為想利用貝爾蒙多後裔的血液去控制刻印。不過無主角威能，當然失敗啦！
最後一個刻印係上Buff，同樣係瘋狂掉血。當然你可以選擇係咁食藥水背水一戰啦！
老德刻印實力深不可測，如果將三個刻印結合的話可以打出四位數字傷害。不過實際上係自爆技，只能用係打老德時的最後皇牌。
返到教會廢老神父叫夏洛雅立即用上自爆技，咁夏洛雅當然拒絕啦。而呢個時候廢老立即反面想搶走刻印。
最後一直養育我地的教會其實係奸的，三大刻印除左可以用來消滅老德亦都可以用來復活老德。不過其實個封印非常脆弱，只需要一條廢老的生命老德就立即復活，惡魔城打到遊戲後期先扣到題終於出現啦！
今作老德第二型態係少數無變成怪物，繼續保持人身，只係大搖大擺咁行埋嚟起飛腳！不過無聖鞭攻擊老德揼極都唔死，惟有用上最後皇牌自爆技消滅老德。
成隻game最感人的一幕，呢個遊戲係唔會好似其他惡魔城咁有BBQ大團圓結局。夏洛雅用上自爆技，夏洛雅不死的話就只能用上阿魯巴斯的靈魂做祭品。最終惡魔城倒塌後只餘下夏洛雅一個孤獨生存下去
。如果係來須蒼真的話早就已經失控黑化變老德了。
遊戲同以往的惡魔城唔同，以往的惡魔城係圍繞著成個惡魔城大地圖逐步探索。但今作反而本末倒置，完全捨棄惡魔城系統，變成普通闖關模式，逐關小地圖一個一個完成，去到最後先打惡魔城。不過惡魔城本身都閹割得好緊要，地圖仲細過迷宮迴廊。
除左地圖系統破格外，遊戲亦都竟然無得裝備武器，而係透過打怪、石像、奇怪場景甚至搶奪去收集各種刻印，好似小櫻收集古洛卡咁。而因為攻擊係用刻印召喚術變出來，所以所有攻擊都會消耗MP，連續攻擊時會無曬MP有Cool Down需要回魔呢點比起其他惡魔城更麻煩要值得注意。
除左常規武器外，呢隻game仲可以裝備使魔，使魔可以升到上3Lv。咁當然同蒼月一樣唔係收集三個刻印就畢業啦！呢隻game最乞人憎就係將前兩作最肝的系統無限放大去折磨玩家。蒼月都只係收集九個靈魂就畢業，而呢隻game係離譜到要收集三十三個刻印先至升滿畢業
，好彩實際上得四個使魔先需要不斷打怪刷機率掉落刻印，而且遊戲仲有其他地方比刷使魔仲肝。
呢隻game最肝的地方係熟練度，作用同迷宮迴廊一樣，熟練度愈高，攻擊力就算唔升Lv亦都會不斷升高。不過之前迷宮迴廊的熟練度都只係每個副武器1000多點好快刷滿，而雖然遊戲只係要刷七個屬性，但誇張到要刷五位數字65535點熟練度，剩係刷熟練度都折磨你幾日
！但刷滿之後你有三倍攻擊力加成，就算鐮刀無屬性剋制普通攻擊都可以扣成501滴血。老德得9999血20斬就一分鐘爆機了
！
最後就係阿魯巴斯模式，佢係所有惡魔城額外模式中第二安全的人物(第一安全係迷宮迴廊兩姊妹)。因為係遠距離神槍手，所以根本唔洗點走位，就咁直接匿埋係牆角瘋狂無腦掃射。特別係機關槍攻速極高，攻速可以媲美迷宮迴廊斧頭兵向上舉斧頭，但斧頭兵都仲係需要冒險衝前行去大佬到，而阿魯巴斯就唔洗，好多時個大佬都未行埋我到就已經被機關槍射死左啦
！
但機關槍唔可以對空，後期大佬弱點高過阿魯巴斯就唔可以打中，要切換成陰陽彈。陰陽彈可以對空，適合打神父、死神、老德等大佬，而且仲要係光屬性可以屬性剋制。係刷Lv過程中有不斷出陰陽彈練熟練度的話，傷害同機關槍一樣恐怖。阿魯巴斯一發就已經打成684滴血仲癲過夏洛雅，9999血15粒就人間蒸發下世再來，直頭連三大刻印都唔洗出，佢把手槍根本就係第四刻印
。總結嚟講呢隻game比起迷宮迴廊更有突破，直頭係將以往固有的系統打破。大地圖惡魔城變成Mario闖關小地圖。主角又戰士變成魔師，即使出普通攻擊都會有唔夠MP的問題。屬性剋制影響更為嚴重，一旦屬性唔啱傷害甚至可以得返個位數字變拗痕，難怪會比人視為最難的惡魔城啦！但同時刷能力亦比以往作品更肝更農，五位數字熟練度直頭離譜反人類。我磨個七個熟練度走去不斷打成萬隻大骷髏仲悶過我係蒼月刷九粒靈魂
。但因為三倍攻擊力太破壞平衡性令到隻game又Hard Mode變成Easy Mode，實在太過誘人，就算唔全部刷滿都最起碼將最實用的兩個物理屬性同我刷爆去
！！！