質問我點解而家對佢哋咁差 係咪受人指使
咁多年嚟含辛茹苦養大我但咁樣對佢哋
但我真係好難原諒佢哋
由細到大佢對我造成嘅創傷真係數都數唔完
中學嗰陣學業壓力好大 經常做功課做到三點 時不時佢就會因為我遲瞓覺影響身體健康打我
當然有陣時我都唔乖 夜晚會熄燈扮瞓覺玩手機 佢就會開我房門睇我係咪真係瞓着 一發現我玩手機就打我
直到中三都一直唔俾我有手機 每日趁我返學巢晒我間房嘅所有野 一發現有手機就整爛佢 meanwhile有幾部都係朋友睇到我咁唔忍心俾我嘅舊手機 佢都照抌爛
零用錢一個月$600 平均每日連lunch都冇錢買 更加唔好講啲同學仔約去op迪士尼嗰啲我可以有錢去
初中有玩排球隊 佢覺得會阻住我讀書逼我quit隊
嗰陣真係每個禮拜都會嘈一次 而且我係會反駁嘅嗰啲反骨仔嚟 變相越嘈越誇張
好記得我去到頂唔順就會衝入房唔出聲喊 佢都係好似而家咁不斷喺門口大聲鬧我 一鬧就係一兩個鐘 呢個狀態嘅佢已經係定時炸彈 只要佢自己一個突然鬧到情緒激動 就會破門而入打到我仆街
打到衣架爛晒 再鬧我係因為唔乖所以先整爛啲衣架
威脅我以後瞓客廳 間房都值好多錢應該租比人 唔應該俾我呢個倒米嘅女住
有時會叫我點解唔去死 夠膽就報警拉佢嗰啲
covid嗰段時間係最慘 每日都要留喺屋企上網課
每日都俾佢打 去到中六呢個情況先好啲
而老豆嘅角色主要都係老母講咩佢就跟住做 佢自己都同我講覺得好唔合理 但淨係一味淨係識叫我乖啲 叫我忍佢 但我真係覺得自己好慘 而家諗返起都仲係好想喊
中六去到yr 1嗰陣同佢哋關係好咗唔少
因為少咗嗌交 但都仲係對我控制慾好強
會入我房巢我啲嘢 開我啲信 遲過12點返屋企一定係每個鐘一通電話
仲係會睇我幾點瞓覺幾點起身 一遲瞓就屌我唔健康
一齊食飯一定會逼我食佢鍾意嘅菜 我話唔要都要照食
我讀文科 但佢哋同社會脫節咗好耐 今日就叫我做律師 後日就叫我做護士
得閒就同啲三姑六婆傾偈 同我講邊個邊個嘅女/仔嘅career path好成功 叫我照抄佢條路
我估去到畢業佢哋會好難接受我嘅人工同工種
不過so far我都唔想佢哋知 呢段時期
心底裡對佢哋其實仲係有憤怒 只係冇再嗌交咁解 我都唔想舊事重提 我都嘗試溝通過 佢哋都只會覺得好小事 叫我唔好咁小氣
yr 2有得住hall 基本上係我最開心嘅時光
唔使再受控制 我都發現冇佢哋嘅「教育」我依舊過得好好 仲開心咗唔少 至少個人冇咁自卑
住完hall返嚟之後有對比 我更加接受唔到佢哋嘅控制 漸漸想避開唔同佢哋講嘢
因為開口埋口都係講錢 講嫁老公應該嫁個點嘅人 講我應該做老師護士律師（lol） 講我呢排有咩做得唔好
然後都冇再做灰姑娘時間一到就返屋企
我都有自己嘅朋友自己嘅生活 有時都會遲返屋企
但佢哋覺得我係俾人帶壞咗先咁 最衰都係住hall
開始情緒勒索 話我不孝 話佢哋好難過 bilibala
我聽到都唔好受 佢哋係好用心盡父母嘅責任湊到我大
但我仲係好記恨以往嘅創傷
佢哋唔知嘅係我諗住畢業草夠錢就即刻搬出去住 劏房好點都好
我都覺得自己對佢哋冇感情呢件事好對佢哋唔住
但我同佢哋維持關係要遷就佢哋犧牲自己嘅自由社
唔維持嘅話佢哋會傷心 但我會開心好多
我係個自私嘅人 我只係想好好過餘下嘅人生 唔想再比佢哋束縛
