【千字文】【袋鼠皮boot系列介紹】人大左，發覺揀波boot都係舒服最重要

細個揀boot得兩個準則
1) 價錢
2) 巴閉囉 英雄主義 疊馬
著出黎就好似邊個邊個球星會上身咁 ，唔識分係貼腳定夾腳，總之就係要型

而家揀boot真係希望可以搵d著得舒服又踢得舒服，著完第二日返工唔會腳痛的boot 但係而家d boot黎黎去去都係adidas nike puma, 對對都有咁輕得咁輕，有咁貼腳得咁貼腳，仲要好鬼貴......叫我呢d腳掌又闊又厚的窮拎情可以堪

之後幾年前撞棍買左對tiempo袋鼠皮釘boot之後就走進袋鼠皮呢條不歸路，所以我決定要寫千字文介紹下，希望踢晒你地落火坑

第一篇: 袋鼠皮boot的背景
第二篇: 袋鼠皮boot的好處
(上): 傳統拉線厚皮
(下): 新世代薄皮
第三篇: 袋鼠皮boot vs 人造皮boot (短篇)
第四篇: 市面常見的袋鼠皮boot (短篇)
第五篇(上): Mizuno袋鼠皮釘boot簡介
第五篇(下): Mizuno袋鼠皮平底boot簡介
第六篇: Puma，New Balance袋鼠皮釘boot簡介
第七篇: Asics袋鼠皮釘boot、平底boot簡介
第八篇: 其他隱世高質袋鼠皮boot簡介


各位巴打如果有咩袋鼠皮boot的知識、意見、問題的話，歡迎一齊交流下



先自貼自己果3對波boot

第一篇: 袋鼠皮boot的背景
袋鼠皮係一直用黎造頂級波boot用的材料，好多鞋廠都係用袋鼠皮黎造頂級波boot, 好似adidas, nike, mizuno, puma, umbro......大家最熟識的一定係adidas predator, nike tiempo呢兩款，之後隨住咩保護動物定唔知咩原因，d大牌子開始話要停用/減少用袋鼠皮，取而代之就係人造皮，佢的好處係可以係塊皮度注入高科技同埋加插型格的設計。

大廠的優勢就係疊水，有資金科水去搞創新......驚你班友唔接受咩? 日日賣廣告，搵埋代言人賣行廣告影晒沙龍。個個開始轉晒去買某幾款鞋，塊餅愈黎愈大之際就係其他廠做唔住之際，於是淡出香港。

商家們又點會識分你係人造皮定係袋鼠皮丫，總之而家邊個牌子邊款鞋最好賣就入貨返黎賣，唔好賣的全部out !

所以大家會發現點解d大型運動鋪甚至足球用品專門店都係賣黎賣去果幾款鞋，選擇看似好多但其實唔多......四大受歡迎牌子，每個牌子大約有三個系列，每個系列有高中低階、石地草地之分，咁就成就左半間波boot鋪頭嫁喇
(琴晚發夢周公話我知)

講咁耐...好! 下篇入正題

第二篇 (上): 袋鼠皮boot有咩好?
1. 舒服、貼腳
2. 耐用
3. 保護性相對較高


而家的袋鼠皮基本上可以總括成兩大類:
第一類: 傳統式厚皮拉線boot
第二類: 薄皮

第一類的boot多數都係無咁輕身，用皮會比較厚，拉線設計，禁落去會見到有皺紋，踢耐左d紋會愈黎愈多







呢款的袋鼠皮boot著上腳開頭係會比較硬身，因為d皮仲好新。當你踢得四、五場或者你狠心d踩下佢屈下佢之後，d皮會愈黎愈軟，愈黎愈貼合你對腳。就好似你坐皮梳化咁，一開始就一定係無咁軟熟同舒服，但慢慢坐耐左個質感就會完全唔同晒 。另外，呢款袋鼠皮會有些少的記憶功能，當你著得多的時候，塊袋鼠皮會習慣左你隻腳個形狀，咁你每次一著boot的時候就唔需要再去同對鞋磨合就可以搵返貼腳的感覺。

除左舒服之外，呢款的袋鼠皮用拉線的設計。我唔知大家有無聽過話呢d拉線係可以令到你cur個波的時候會準d的說話啦 ，準唔準我唔知，因為我未準過 ，但係拉線設計就可以提高耐用性，因為每當你去做急停轉向的時候，前掌的邊位係會特別受力，果d位係比較容易會爆；但當用左拉線設計之後，果幾條線就可以幫手頂到你果度力，減低爆口的機會。仲有，因為皮造的鞋著得耐撐得多其實係會鬆，拉線的作用就可以回定返個形，唔俾佢過份地撐大。

講到保護性，首先唔洗諗腳趾尾會痛的機會會少好多，因為袋鼠皮本身鞋籠個空間係比較闊，大眾化的程度高好多。

好多時點解會話腳趾公/尾痛呢?
一係就買錯size，一係就買錯款
買錯size的唔洗講，你連自己隻腳的size都唔知我幫唔到你
買錯款其實係極之常見的事，呢d情況多數都係
1. 長度岩，但闊度唔岩，窄到夾腳
2. 闊度岩，但長得濟，影響斬波射波做急停
以上兩樣都代表緊呢對鞋其實好似唔太適合你腳型。

你可能會話，唔係wor，呀邊個邊個球星都係咁著，好多球星都係著緊呢對，咁佢地之間的腳型總會有分別嫁... 係! 無錯! 係有分別，不過人地有得度身訂造，有自己的鞋模，確保一定岩腳型一定貼腳
而我地市面買到果d，有90%都係根據歐洲人的大眾腳型去設計，而亞洲人腳型比較闊同厚，所以唔係個個都岩著。

講左咁多，關袋鼠皮咩事呀
頭先都講過，袋鼠皮鞋的鞋籠空間比較闊，會較適合偏闊腳型的巴打；另外，袋鼠皮boot話明係真皮，著耐左其實係會撐鬆，即係你買boot的時候可能鞋係比較貼腳，或者可能會夾腳趾尾tim，呢個時候你只要塞d野keep住撐開個鞋籠一個星期，個問題好大機會已經消失，唔會有腳趾痛出現


另外，袋鼠皮boot的後踭位會比較厚身，包得實你後踭個v字位，鞋墊多數都有層薄薄的cushion，當你跳起落地的時候個緩震力相應地會提高左，減低受傷的機會。

人廢踢咩都廢

人廢踢咩都廢

真

人廢踢咩都廢

想問依對咩牌子

人廢踢咩都廢

事實

你都幾得閒

想問依對咩牌子

呢對鞋個牌子叫athleta, 係間日本專造波boot同埋運動服飾的廠

LM, 支持

Lm

好殘忍

第二篇(下): 薄皮BOOT


講到薄皮，大家都可能會諗平時MERCURIAL果D都夠晒薄啦，仲有得再薄 有呀! 比MERCURIAL再貼腳D都有! 睇圖!





市面有一款薄如布一樣但又好鬼軟熟的BOOT，用袋鼠皮造，比傳統果隻薄一半有多；同樣都係袋鼠皮，薄皮呢款就好似著白飯魚咁貼服，但同時又有袋鼠皮的質感，摸上去平滑好多，無拉線的設計，所以會比傳統袋鼠皮再貼腳D!

不過佢的壞處就當然係無咁耐用同埋個保護性無咁高啦。你諗下薄成咁俾人唔小心踩落黎就一定食到應一應 ；做急停轉向又有機會撐鬆撐爆；同埋係市面上呢D款都真係少之有少，只有PUMA EVO TOUCH J PRO/J1系列先會見到，香港市面我曾經都有係FUTBOL TREND見過仲要賣緊$2600蚊，值唔值就真係要你自己試過見知喇


太厚又唔岩，太薄又唔想......新科技幫到你! 唔講咁多，去相





呢幾塊都係比較新D，融合左袋鼠皮的舒適同埋高科技配合；皮的厚度方面會係傳統同薄皮的中間，唔會薄到似用緊0.02，但又唔會似用緊持久裝，厚度黎講佢我諗用杜記金裝黎形容好似最適合，恰到好處 。

放棄左傳統拉線設計，用廠房自己研發的科技加入對鞋度，取代舊有的方式，令對鞋感覺更貼近潮流更CYBER，希望可以取悅波友歡心

另外，鞋底的設計會更著重個支撐性同埋靈活性的平衡，最傳統的鞋底係一大塊平板，D鞋釘大大粒痴住係上面



而新款D的鞋，係鞋底設計上面多花左心機，會有唔同坑紋提升靈活性，方便你做唔同的動作；用料上面多左用纖維，夠輕身又夠承托力 。




著慣靚野的巴打可能會話......呢D野一早已經出現啦，有咩咁值得吹奏

其實袋鼠皮同人造皮唔同，因為袋鼠皮的纖維係好複雜，先會保持到咁軟熟同輕身。正正因為佢的結構複雜，所以要注入外來的技術同埋設計係相當有難度。科技發展一日先里，真係唔知D廠點樣可以保持原有舒服貼腳的優點，再將傳統單調的設計創新成時尚高科技的型格波BOOT，呢個由0變1的轉化其實係唔容易

想問依對咩牌子

呢對鞋個牌子叫athleta, 係間日本專造波boot同埋運動服飾的廠

好似幾好，邊度有賣？

對asics平底 評價如何

想問依對咩牌子

呢對鞋個牌子叫athleta, 係間日本專造波boot同埋運動服飾的廠

好似幾好，邊度有賣？

係唔差嫁呢對 除左鞋踭鞋底位唔係袋鼠皮，其他位都係
不過呢對香港無得賣，巴打如果有興趣可以telegram我
https://t.me/footballcaddy

對asics平底 評價如何

Asics平底前掌位用袋鼠皮，係常用易磨損的地方用左rhyno skin技術提高耐用性；鞋底佢用gel底，緩震力幾好
著上腳都幾貼腳，腳內側近腳弓果個位cool得比較緊，後踭位比較厚，包得穩；好處就係保護性高但唔好處就係減低左近腳踭位的靈活性；著咁耐都未試過腳痛

第三篇: 袋鼠皮BOOT VS 人造皮BOOT


袋鼠皮的好與壞
- 袋鼠皮會隨時間而變得軟熟、貼腳
- 袋鼠皮比較厚身，保護性都會高d
- 因爲佢係天然皮，著得耐會軟身d鬆d，比適合腳掌闊的波友
- 比較耐用 - 相對較重
- 落雨或濕地使用時，鞋會吸水變重
- 濕左難乾
- 價錢大約$800-$2000左右


人造皮的好與壞
- 明顯地輕身
- 設計極之貼腳，方便腳腕、腳掌做轉向、屈曲的動作
- 因爲係人造皮，所以設計可以較多元化，更可注入不同技術
- 透氣快乾
- 耐用性較低，最多頂到一兩季
- 因爲佢唔會隨時間變軟，腳掌闊的波友未必適合
- 價錢由幾百蚊到$2500都有，睇下你揀咩版本

各有各喜好，其實又無話袋鼠皮好D定係人造皮好D，最重要係符合到自己要求。

當然，好似上一篇都提過，各大品牌為左配合大家市場趨勢，都有新產品的出現，希望可以係保持到用料上盛舒服之餘又不失時代感
。
但係當你講到性價比黎講，我又覺得袋鼠皮好似抵玩D 千零蚊已經可以買到頂級版MADE IN JAPAN的鞋，分分鐘可以頂到兩三年都未爛 (我果對著左差唔多三年 )。對於我地呢D打工仔黎講，一個月先得兩三場衛生波開心下，有時忙起上黎一個月都踢唔到一場，著得舒服又抵玩都真係幾重要。

巴打好正 g持

第四篇: 市面常見袋鼠皮BOOT

眾所周知，市面上的頂級波BOOT離不開以下幾個牌子
1. Adidas
2. Nike
3. Puma
4. New Balance

雖然袋鼠皮野無咩人識，但都總會有市場既 所以廠方都會放返一兩款袋鼠皮鞋出黎俾客人揀，不過我諗大家其實都講得出佢地個系列名
Nike: tiempo legend
Adidas: copa 17.1
Puma: evo touch j pro







詳細唔介紹咁多喇，大廠野可能大家比我更熟 同埋巴打們可以爬返文就會分得出佢地係屬於邊一類的袋鼠皮鞋，特點大致上都係差唔多，分別就只會係個牌子的獨有技術。

黎緊幾篇的介紹都會主要介紹返d香港市面少見甚至係無得賣的boot，有d連pds/kamo你都未必會見到的鞋 而家就講住個牌子、系列名俾大家知先啦，想睇下圖知多d就留意住我下篇文喇

Mizuno:
Rebula Series
Morelia Series
Monarchida Series

ASICS:
DS LIGHT Series

PUMA:
Evo touch j pro/j1
Paramexico MIJ
King


New Balance:
Visaro K-lite

先介紹住咁多先，仲有D隱世正野遲D再同大家SHARE。

大家睇到以上有D鞋款寫住”MIJ”，究竟咩係MIJ?



MIJ = made in Japan
咁究竟MIJ有咩咁吸引，值錢之處係邊?

黎緊我會出一篇號外篇講下MADE IN JAPAN的吸引之處同埋日本波BOOT香港波BOOT之不同，希望咁多位巴打多多支持

樓主我等緊你