打爆一個，剩下兩個！
劇情延續曉月，主角隱藏自己係老德的身份繼續溝女，不過總係有人唔識死去踢館，想做新一代的黑暗魔王，用黑暗的力量支配打機界！
今代的假黑暗魔王好核突，最終戰係進擊的巨人，一個screen裝唔曬，要又上又落咁打佢。
老德終會重臨人間，但絕對不是來須蒼真你！
遊戲系統同曉月一樣，都係紅藍主動魂同黃色被動魂。
不過同曉月最大分別係曉月只需要刷一個魂就可以畢業，但蒼月除左只有1Lv(通常都係黃魂)的魂之後，其他2、3、5、9Lv魂全部都要刷滿9粒先可以畢業。
隨著收集得愈來愈多魂，攻擊模式亦都愈來愈華麗，例如擲骨頭變得愈來愈大，而唔止係單純增加攻擊力。不過就算係1Lv魂都已經夠強勢，例如尖叫Mandragora同Erinys天使替身。要刷9粒魂先升滿的魂，可以考慮Axe Armor無腦擲斧頭用到最後。
好彩無限MP戒指只需要求每個怪物至少刷1粒魂，唔洗迫你刷夠9粒。不過刷魂真係折磨身心，我自己都頂唔順訓左幾次，建議大家要有強烈心理準備先好刷魂，以免自己失去理智黑化變左老德。
刷魂除左可以用來輸出外，今次遊戲的終盤武器竟然唔可以係大地圖拾獲，而係要利用1粒靈魂去幫武器升級。當然升級完武器之後，靈魂的確係會被消耗，所以又要重刷多一粒靈魂。不過遊戲最仆街的地方在於短劍、大劍同斧頭呢三種武器係需要用上大佬靈魂去合成。因為大佬打死完後無得復活，變相合成完後就會中伏，無得係第1輪攞無限MP戒指，要玩第2輪。
遊戲除左刷魂擾人外，最為人詬病就係打死完大佬之後要畫鬼畫符。如果手殘畫錯左之後大佬會回血再打過，搞到D人玩到嬲嬲豬改版將個畫鬼畫符刪走去。今次因為隻game會係埋XBox同PS出，所以Touch Screen畫鬼畫符變左禁制，因為鬼畫符位置對應按鍵位置，所以畫鬼畫符變得容易好多，無咁容易手殘要重打。
打完主遊戲可以打尤里烏斯模式，NDS的額外模式同GBA唔同，今次連額外模式都有等級系統，比你可以屈上加屈。尤里烏斯就係典型的吸血鬼獵人，皮鞭、斧頭、回力標、聖水，仲有大技十字死光，除左尤里烏斯無左高跳無得完全開路之外，根本就係萬能角色，我又頭到尾的大佬都係用佢鞭死。
然後仲可以玩係主線毫無作為，只係用來看門口的魔法少女洋子。標準的火、冰、雷黑魔法，其中冰魔法打塔頂的雷電大眼怪有奇效可以秒殺。不過因為尤里烏斯太強勢，所以除左用來刷雷電大眼怪練Lv外，我根本就無用上佢。
而神秘人有角幻也的真實身份亦都解開，其實就係老德個仔阿魯卡(Fuck You Konami，幾時將月下port上Steam比我地玩呀？)。技能只有一個，就係佢老豆的小型火焰三連發，至少好過洋子招短距離火焰彈。不過阿魯卡係惟一可以高跳同變蝙蝠的人物，加上雖然攻擊力比尤里烏斯低但攻速比佢高，平時我都係用阿魯卡開路，去到打大佬時先切換成尤里烏斯。
同以前的額外模式唔同，今次最終大佬唔係主遊戲裏面的進擊的巨人，而係黑化左的來須蒼真。
來須蒼真同以往的老德唔同，第一形態唔放火球而係fing大斧頭，只要離開攻擊範圍就好容易回避。
第二形態又係大家熟悉的大怪物，除左招牌噴火之外，仲會噴埋一堆飛蟲出來。但噴火同飛蟲只會針對畫面下方，阿魯卡變蝙蝠向上飛到頂端可以完全回避到。
惡魔城亦再次倒塌，尤利烏斯亦到成功對現到同來須蒼真的承諾。今作的老德係我玩過最垃圾的老德，動作慢、出招明顯易回避，仲要有死角位變蝙蝠向上飛到頂端可以完全回避。以為主角黑化後會變得特別強，點知反而改弱左。果然額外模式係純粹用來爽game的。
總結係一款優秀的惡魔城作品，但因為靈魂系統比以往更農所以玩遊戲時要有心理準備(因為大多數靈魂都係華而不實，可以針對實用魂同武器合成魂去刷)。而且畫鬼畫符依然無刪除，每次打死完大佬之後都要禁制都係好麻煩。可以將呢隻遊戲試作為血咒的跳板，如果連今作的農靈魂都接受唔到的話，咁樣就咪鬼玩更肝更複雜的血咒碎片系統了。
