樓市持續下跌，好多高位買入物業業主指出都係自住，所以樓價跌並唔驚。
自住不驚建基於長升不跌
自住不驚概念，建基於過去三十年樓市大牛市，啲樓升緊，利率又低，一路升緊梗係冇乜嘢好驚。但係周期轉得慢，唔代表冇升跌，升足三十年，跌三年，樓價已經回落到2016年水平。
買樓一般佔大部份人絕大部份嘅投資，物業嘅比重一定多過晒港股美股定存，等於進入資本主義頂峰嘅投資市場，呢個世界等同結界，同出面世界好唔同，例如平時街市買菜會投訴佢貴，進身樓市後會日日呻點解又平咗。
一般嚟講，投資三大心理難關：
1. 冇份贏慘過輸（Fear of missing out）
2. 望返家鄉（重返買入價）
3. 人家恐懼我掟貨（低位止蝕）
高位買樓業主起碼中頭兩項，所以首先驚執輸高位買，繼而渴望重返家鄉。
至於3會唔會大規模出現，則要睇美聯儲減息後，樓價升返定繼續跌，畢竟鮑威爾係好多香港業主現時嘅洋菩薩，日拜夜拜佢減息。而佢9月幾乎肯定會減息。有效可以話符合市場預期，如果冇效等於差過市場預期。本地撤辣作為大招已經無效，美帝減息就係最後一根稻草，本欄主觀意願當然係潛在買家依家忍手，等減息第二日搶住破頂價買樓。
借按揭樓價跌 如供死會
新業主多數有按揭，有按揭而樓價下跌，等於供死會。自住唔驚嘅盲點係，人係有想像力，只要稍為諗吓原先供空氣嘅錢，可以好奢華咁每個月去日本住五星級酒店，因為樓價下跌而要帶飯返公司食，原本一年去五次日本改咗去深圳，又或同想像一筆資金放定存，每個月有幾千蚊收吓。的確會造成心理壓力。
退一萬步，就當係一個多年前已經供滿樓、冇按揭嘅業主，因為樓價曾經見過高位，係真實嘅成交價，即係你曾經紙上擁有嘅財富。一般上車盤同高位比較閒閒哋唔見100萬港元，好多上一代業主仍然保留好慳儉嘅生活，例如開水喉滴水、拎個爛環保袋去銀行見RM， 100萬港元嘅紙上財富唔知要滴幾多百年水先至圍返條數。
平凡是福，如果以「我唔知、我唔信、我睇唔到」嘅態度生活，又可能接近自住不驚嘅心態，當然佢層樓可能跌完都仲坐緊幾球帳面利潤，同新業主處境唔同。
所以對樓價下跌冇感覺，需要近乎得道高僧嘅修為，再加上冇乜物慾，先有資格講出口。如果真係心境如聖人、樓價如浮雲，當初又點會走去買樓呢？