早前傳出曾執導《踏血尋梅》嘅翁子光導演，將以七十年代轟動一時嘅「紙盒藏屍」案拍成電影版並擔任編劇及監製；而該片就會由《正義迴廊》編劇之一譚廣源執導。該片將命名為《法迷藏》，並由Edan呂爵安、譚耀文、梁洛施同內地演員張頌文等主演。
而另一單同樣轟動嘅林過雲案，最近亦有公司宣布開拍電影《雨夜屠夫》，並會由前「微辣」成員霍哥（霍俊邦）首次擔正飾演林過雲，並由林耀聲一同參演。電影將由鄧東明執導，將於星期六舉行發布會。霍哥自己都有share發布會消息，唔少網民認為搵霍哥演林過雲十分恰當，取笑佢「做返自己」、「唔需要演技」、「搵唔到第個代替」，就連霍哥都留言話「導演見到我嗰刻…佢都講：係你啦！我唔知開唔開心好」。而電影公開嘅部份劇照都見到霍哥目露兇光，猙獰到得人驚。
林過雲案發生於1982年，的士司機林過雲半年內先後殺害及肢解多名夜歸女子，更將部份殘肢拍照，後來因為將菲林送到晒相店沖晒而被店員發現有可疑，並報警求助。林過雲到晒相店提取照片時被捕，佢被控4項謀殺罪名，翌年法官判全部罪名成立，依例判處死刑，後改處終身監禁。
