論近年香港冒起得最快的創作單位，相信很多人都認為是試當真。由 2020 年 10 月開始營運至今，其風格之獨特、內容之多元，以至紀律之嚴謹，都讓人印象深刻，成為極具時代意義的一間文化山寨廠，也因而俘虜不少粉絲的心。
一如所有成功的文化工業，伴隨而來的是無窮無盡的質疑與爭議。昨晚試當真的謝票場直播尾聲，四個開台元老游學修、許賢、蘇致豪、火柴並肩分享自己對公司發展的心情，其中明顯半醉的游學修（他補充自己是酒醉三分醒），提到自己及試當真所受的批評時，多次流淚。
他半醉說出的這番話，未必所有人會同意（特別是談 hater 的部分），卻值得一記：
＊＊＊
（由 3:39:00 開始）
「我覺得香港人真係好唔開心（X 2），好有原因地好唔開心，佢哋要搵對象發洩，佢哋要搵對象來憎，我係好理解。我覺得唔緊要，唔緊要，但我都有我脆弱的時候，我都有我頂唔L順的時候，我真係頂唔Ｌ順（X 3）。
（賢：太忙喇，忙得滯呀你可能真係）
「香港人呢…香港人太辛苦喇，香港人受太多苦喇，香港人見到人哋成功呢，佢就唔開心，我係好理解。因為佢哋都唔成功，佢哋點會想見到人哋成功啫。DLLM，個社會咁變態，咁 L 差，咁 L 有問題，佢哋唔想見到有人成功，『你成功，我失敗。你成功，一定係有問題。如果唔係好人好者，我點解會失敗？』
「我係盡我的能力，盡了我最大的同理心去理解，但我都係一個人，我都好 L 辛苦，呢啲嘢唔應該在公海講，下不為例。但你問我，我想的是，香港人…而家有幾多人睇緊（直播）？2500 人睇緊……我想的是，我哋呢度在座每一位也好、睇緊的觀眾也好，我們是好少數，但每個人都受緊好多好多苦，喺香港地好多好多苦。
「當你受到委屈，受到一些問題，受到一啲不公義嘅嘢，你要提醒自己，每個人都受緊好多好唔公義、好有問題嘅嘢，每個人都好努力生存緊，我哋要體諒每一個身邊的人，每一個身邊的人，每一個身邊的人。
「（向火柴）你咪成日上網睇，啲人話報應呀，（然後覺得他們）自欺欺人，無報應呢回事。但你問我，我相信的是，未必在這一世，但好人會有好報，喺呢個咁扭曲的時代，咁扭曲的世界，唔好迫自己做一個壞人（X 3，漸細聲）……盡你最大的努力去善良。
「係好多唔公義，係好多唔公道，盡自己最大努力去做一個善良的人（X 2）。同埋多啲體諒身邊每一個人，多啲體諒呢個社會每一個人。『嘩佢哋做乜 L 嘢呀，買個麥當勞、搭程巴士，做咩對我咁呀，你咩態度呀？』
「（試著）提醒自己，佢都好辛苦，受好 L 多苦。正如我本人，『DLLM 成日開 PO 屌我，又搞 9 我，我做錯乜嘢？』，但我要提醒自己，佢都好唔開心，每個人都好唔開心。
「大家盡你的最大努力去善良（X 4，一句比一句細聲）。」
（前略，到 3:58:00）
「唔理試唔試當真，唔理係咪游學修都好，我想大家生存得喺呢個地方，生存得喺呢個時代，唔該你，唔該你，請相信呢個世界仲有好人，請相信你要做一個好人，請唔該做一個好人。無論人地點對你，無論世界點對你都好，唔該你做一個好人（X 2），我想講嘅係咁。」
（4:05:30）
「我想同呢 2900 人（觀眾）講，唔好咁 harsh 啦，對香港人唔好咁harsh 啦，大家都係香港人啦。你好痛苦，我好痛苦，大家都好痛苦。唔好咁 harsh 啦（X 2）。」
