安樂死呢個決定

貓貓13歲，心臟功能差好容易令到有肺積水，覆診時我同醫生提出左比貓貓早啲解脫，我自己內心好自責，到底我呢個決定係有冇錯，親眼睇住佢係打完針後短短一分鐘就離開左呢個世界，直到呢一刻果個畫面都係我腦海一直存在。

其實你點揀都會後悔
安樂咗，你又會覺得佢可能仲想生存，好似親手殺佢咁
唔安樂死，你又覺得延長咗佢嘅痛苦

心臟功能差好容易令到有肺積水

即係其實冇短期嘅生命危險
俾著係我會睇多幾個醫生先決定

13歲算係咁

你試下長期肺積水再講

「好容易令到」 呢幾個字好模糊
樓主乜春都冇講
如果隻貓貓當時狀態係食得玩得瞓得
我會睇多幾個醫生 聽吓建議 搵多啲方法
睇吓生活上有咩轉變可以改善到
例如飲食 保健食品 令佢冇咁容易發生囉
而唔係直接話幫佢安樂死
但如果佢當下已經毫無精神
瞓住喺度 郁都郁唔到 我先會考慮安樂死

‘好容易’即係有肺積水末
有肺積水即係唞唔到氣 會好辛苦
如果每隔兩日要抽一次水，我會安樂

我已經睇過好多醫生，最後經手係心臟專科，醫生好早已經講過心同腎都有事，我地冇乜野可以做到，一日三餐要靠人手餵食，餵藥，全部我一個人經手，而且貓貓都日漸走下坡，所以覆診果時我同醫生商量過就提出左呢個決定

每日要食兩次1.5ml去水藥，但係已經越黎越難餵，覆診照x光果個肺果個範圍係好多白色，代表肺積水好嚴重，貓貓已經每一次呼吸好困難

冇錯，理論上每個月花費過萬醫藥費去維持生命可以直到貓貓自已走，但係呢段時間將會好難過

好羨慕貓狗，有安樂死嘅機會

最起碼佢最後嘅時光係有你係身邊
總好過你返工嗰陣時佢走咗
連最後一面都見唔到

咁不如你直接講你負擔唔起 窮又要學人養貓 真係用唔到咁多錢去醫貓貓 所以先決定幫貓貓安樂死囉
即係貓貓當時其實並未嚴重到需要行到安樂死呢一步？
係你自己主動提出 早啲殺死佢？
你說服自己 咁樣佢就唔洗咁辛苦 對佢對你都好
實情只係你銀包唔洗再咁難受?

你講得岩

任何決定都有兩面
最緊要唔好後悔

謝謝你

咁辛苦就放過佢

你岩呀起碼用過百萬全世界搵名醫睇過哂就，定應該拎過億好似+x哥咁投資研發醫療科技救返佢條命。負擔唔起就唔好學人養貓啦

養之前就應該要知嘅嘢，養寵物本身真係唔難、唔貴㗎，係睇醫生嗰吓最貴嘛。你隻寵物好命嘅，咪冇病冇痛老死囉！但又有幾多隻係咁呀？唔好話寵物，人類老咗都多病痛啦！人類有公立醫院，但寵物冇。其實你係啱㗎，好多人都話養寵物根本係有錢人嘅玩意，要先搞得掂自己嘅生活之餘，再負擔得起佢嘅一切。樓主每個月嗰過萬真係好少事，有啲人一個月十萬都係咁，但隻寵物又唔係完全冇救，就好似人類去醫院覆診咁咋嘛，仲好精神食得玩得瞓得，你話樓主講多少少，如果貓貓嚴重到要去到呢步，咁我好同意佢嘅決定，但佢而家只話「好容易令到」，又話其實未需要去到呢步，淨係重點提及每個月要洗錢好辛苦。

唔講樓主呢單點樣先，我好同意你既講法
好似人生cancer你有錢胰臟癌末期都可以延十年壽命，每個月過百萬都係咁
所以就算每月十萬呢啲真係好少事
無心理準備拎幾百萬出黎真係唔好害人害貓
俾返隻貓啲義工呀或者流浪好過害佢有病無錢醫

我明個感受 但真係唔想成辛苦更長日子 睇住佢每日情況變差 稍為好d就會以為會好轉 之後好快又差返 比佢走係未正確決定我而家都仲未知

點樣唔講樓主呢單呀？而家就係佢開post講佢做咗呢個決定 好自責 亦都承認貓貓其實未去到呢一步 亦都提及咗錢 忠言就係逆耳㗎啦

13 歲都差唔多啦
老貓 夾硬延長佢生命無咩意思

原來你係著眼果句 好容易令到
其實無論點做都會有兩面，呢段時間我做過好多決定
至於你所講既去到呢步，到底要去到邊一步
我同你果個睇法亦唔係一樣
每一日每一夜都係我去照顧去，去感受住佢
你亦都唔需要諗得的太極端
我唔係需要人認同，你既批評我都接受，因為而且確我係因為負擔唔起，所以我同醫生提出左。

我都係咁樣同醫生講
呢個情況只會係一個循環，不如早少少解脫
我一直都好自責，但始終都係做左呢決定