話說前排廖孖記嘅瓶裝腐乳驗到有過量嘅蠟樣芽孢桿菌，所以今次就同大家講下呢隻菌到底係咩嚟
。因為細菌對比起我之前介紹過嘅其他微生物會比較複雜啲，如果有唔明或者有補充可以留言討論
細菌特徵：
蠟樣芽孢桿菌係革蘭氏陽性（Gram positive，用Gram stain染出嚟會係紫藍色）同埋β溶血性（β haemolytic，因為啲菌會分解blood agar上面嘅紅血細胞，所以菌落周圍會見到溶血環，就好似有個光環圍住咁樣）。菌落中心係白色，而菌落邊緣會係半透明同唔整齊，而且望落會好似磨砂玻璃咁嘅質感。佢哋喺有氧甚至無氧嘅環境下都可以生存。佢哋對盤尼西林（Penicillin）有抗藥性，但萬古黴素（Vancomycin）對佢哋就有效
。呢隻菌嘅細菌外圍生滿短鞭毛, 佢哋依靠擺動鞭毛嚟活動。而佢哋外圍生滿鞭毛嘅特徵令佢哋睇落似仙人掌，所以佢哋先會又叫做仙人掌桿菌，並唔係因為佢哋喺仙人掌上面發現
。下面呢張圖係網上搵返嚟，因為我冇染劑可以染佢哋嘅鞭毛
加啲想像力嘅話可以見到佢哋身上有好多短嘅鞭毛，令到佢哋睇落似仙人掌🌵網絡圖片：Stained using the Leifson flagella stain method, this photomicrograph revealed the presence of three flagellated, Bacillus cereus bacteria
https://phil.cdc.gov/Details.aspx?pid=1059
呢張圖係佢哋嘅菌落喺horse blood agar上面嘅樣。
上面有兩粒藥，一粒係盤尼西林（Penicillin）一粒係萬古黴素（Vancomycin）。佢哋對盤尼西林有抗藥性，所以盤尼西林藥片（P 10）周圍都可以見到好多菌生埋去。而萬古黴素就有效咁對付到佢哋，所以萬古黴素藥片（VA 30）周圍會見到無菌生埋去
如果背光睇嘅話會更加明顯咁見到佢哋β溶血性嘅特徵，就好似有個清澈嘅光環圍住佢哋咁樣
呢張圖係用咗革蘭氏染色法上色嘅結果。細菌就係依靠呢一種染色方法可以分為兩大類，如果染出嚟係紫藍色嘅話就係革蘭氏陽性（Gram positive），染出嚟係粉紅色嘅話就係革蘭氏陰性（Gram negative）。細菌染出嚟唔同顏色係因為革蘭氏陽性同陰性嘅菌細胞壁結構有唔同，不過今日就唔講住，知道咗細菌可以分為呢兩大類先
下面呢段片睇到因為佢哋身上有好多鞭毛，令佢哋游水游得好活躍
病理：
其實仙人掌桿菌並唔係啲乜嘢罕見嘅細菌。其實佢哋幾乎無處不在。如果食物暴露係空氣或者俾無徹底消毒嘅器具掂到嘅話，食物好快就會俾仙人掌桿菌污染。如果仙人掌桿菌污染到食物之後而食物又冇妥善冷藏，仙人掌桿菌就會大量繁殖同埋產生內生孢子（Endospore），腸毒素（Enterotoxin），甚至有機會產生一種叫做Cereulide嘔吐型毒素（Emetic toxin），不過好消息係唔係所有仙人掌桿菌都識生產Cereulide，而佢哋產生毒素嘅量都唔係隻隻相同。所以就算有人將啲食物擺咗室溫全日再食返都冇事其實一啲都唔出奇，但千祈唔好試
所以除咗細菌本身之外，佢哋所產生嘅毒素都係導致食物中毒嘅主要原因
腸毒素主要引致腸道不適，但呢種毒素就唔耐熱，食物重新加熱就可以破壞到呢啲毒素；但嘔吐型毒素就非常之耐熱，有研究顯示佢哋能夠抵受126°C 90分鐘。而內生孢子都係非常耐熱，要 121°C 3分鐘先有機會殺得死。當環境溫度處於55°C以下同埋4°C以上嘅時候，啲孢子就會重新萌發成仙人掌桿菌細胞。換言之當仙人掌桿菌已經喺食物上面產生咗大量毒素同埋孢子，普通嘅加熱方式雖然可以殺死細菌（仙人掌桿菌喺80℃ 20分鐘就會死亡），但並不能夠保證破壞到毒素同孢子，唔徹底嘅加熱甚至提供咗一個溫暖嘅環境俾啲孢子同菌體生長，食咗呢啲食物嘅話最後都係會屙嘔肚痛
。有一個好著名嘅由仙人掌桿菌引起嘅食物中毒名稱叫做炒飯綜合症（Fried rice syndrome）。咁係因為炒飯通常係由隔夜飯冷飯製作，而當啲隔夜飯受仙人掌桿菌污染而又無儲存喺適當嘅溫度，上面就會有大量嘅仙人掌桿菌孢子同埋毒素，即使經過高溫炒飯之後啲孢子同埋嘔吐型毒素會仍然存在喺炒飯入面，食咗之後就會引起食物中毒
。呢張圖我用咗特別嘅染色方法（Endospore stain）將啲仙人掌桿菌染咗做粉紅色，而孢子就染咗做藍綠色。
病徵：
仙人掌桿菌引致嘅食物中毒症狀可以分為嘔吐型同埋腹瀉型，呢兩類症狀可以共存：
嘔吐型：
由耐熱嘅嘔吐型毒素Cereulide所引致。潛伏期短，幾個鐘頭甚至一個鐘頭內就會病發，會有噁心、嘔吐、發燒、四肢無力等等嘅症狀。嘔吐型多數都係由受污染嘅米飯或者其他澱粉類食物所引發，尤其係佢哋煮熟咗之後受污染而又儲存咗喺唔適當嘅環境一段時間。不過正如我頭先所講，唔係隻隻仙人掌桿菌都識生產呢啲嘔吐型毒素，唔係嘅話我相信我三日唔埋要嘔一次
腹瀉型：
腹瀉型症狀常見於食咗受仙人掌桿菌污染嘅肉類製品、醬汁、果醬、沙律、乳製品等食物。引起腹瀉型症狀嘅毒素係唔耐熱的，高溫加熱就可以破壞。但係食物如果有好多孢子，都可以令佢哋抵受胃酸然後去到腸胃萌發再產生導致腹瀉型症狀嘅腸毒素。腹瀉型症狀潛伏期較長，大約6 - 15小時，會引起腹痛、肚瀉同埋痙攣，而且症狀有機會會維持幾日
。治療：
由仙人掌桿菌引起嘅食物中毒大部份情況下其實都唔需要食藥，只要屙清晒嘅話同埋不斷補充返水份同電解質其實好快就好返
而且如果係因毒素而引起嘅食物中毒就算你食抗生素殺菌都無用。預防
：所以要預防因仙人掌桿菌所致嘅食物中毒，最重要就係避免啲食物受到仙人掌桿菌污染。而當食物係儲存喺4°C以下或者60°C以上嘅時候，仙人掌桿菌就會停止生長同埋唔會產生新嘅孢子同埋毒素。如果仙人掌桿菌數量保持喺低水平嘅話係唔會有事。
記住多啲留意食物衛生
咁就唔驚有事了
菌無咩好睇
但前排咁啱又興講Bacillus cereus所以就轉左話題
