我第一次將呢啲嘢寫出嚟，只係想搵個地方放低。唔係咩連載，睇到嘅話，多謝你陪我。
生活喺一個監護人有schizophrenia嘅屋企會令人早熟，似乎係常識嚟。
要有同情心，理解佢點解要一次又一次咁傷害我，明白佢係冇心，明白佢嘅難處，呢啲都係基本。
但我都好想好想知道愛係咩感覺。
想試吓同人拖手。想好似佢哋咁嘴對嘴。
「徵男友 14歲」唔知大家以前有冇玩過
online x舞團之類嘅遊戲，一直可以見到好多人都會咁樣徵，之後結婚。好羡慕。今日又返唔到學，因為搵唔到學校喺邊。好似一直有人跟住我，唯有兜路。終於去到學校但已經遲咗到，閂咗閘。都係食埋lunch先偷偷地返。仲有幾個鐘可以去公園坐。
「Hi,乜你自己一個？冇返學？」
「食埋飯先返。」
「要唔要一齊食？」
好想試吓拖手。
我拖住佢行過去麥x勞，途中佢問我屋企嘅事，又話咩都可以同佢講，好似、鬆咗啖氣。
「你想食咩？我買比你啦」
「唔洗。我有錢。」
「當哥哥請你啦！」哥哥。我唔識佢點解可以咁熟？
「我要開心餐。」
我每次都好想食但一次都冇叫過。因為開心餐係比好開心嘅人食，但我一啲都唔開心。
「我夠鐘返學。」
「好啦，你電話幾多號？我下次帶你去我屋企睇狗仔好唔好？呢度有500蚊，你拎去冒x樂園玩啦！」
「多謝。」
袋起張500蚊，我諗緊學校入面一包朱古力係4蚊，500蚊可以食100包。點解我咁厚面皮咁貪心？
或者今次，今次我唔洗再體諒人。係佢自己話比我嘅。
「Hi, 我係今朝個哥哥：）你icon好可愛，係咪你養嘅貓？」
嘻嘻。佢話我嘅貓可愛。
「係。但我下次想睇你隻狗。」
「今個禮拜六嚟我度？」
呢一年，我讀中一。