［Indie Game 遊戲開發］《佳仔去台灣》暨 業餘GameDev交流討論

我寫咗隻 Web Game《佳仔去台灣》，遊玩時間約10分鐘，得兩隻Boss。

背景介紹：佳仔已經俾牧師收埋咗廿八年，命不久矣。彌留之際，盜夢者終於喺深山搵到佢，幫佢完成最後嘅義務 - 去台灣。

網址：https://cowmoomoooooo.itch.io/totaiwan
密碼：721





Q&A

（1）點解揀佳仔做主角？
我細細個係打機學歷史，所以用返歷史做主題，回饋社會。今次整2D動作遊戲，有戰鬥系統就免不了死人。而呢段歷史入面，最適合死嘅係佳仔同毅進仔。

（2）係唔係想掠水？
暫時未。呢個Project係練手用，試試點樣實行各種遊戲機制，等我練完再整商業遊戲。不過平日要開工，唔知幾時練完。

（3）抄咗邊隻Game？
角色係自己畫，場景同音樂係用買返嚟嘅 Assets 砌出嚟，戰鬥機制係參考古董遊戲《永遠的伊蘇》同近年嘅Rogue-like Game。我對自己嘅定位係Programmer，希望大家體諒美術同文案比較垃圾。

（4）揀呢個主題，驚唔驚出事？
咁要靠連仔保護會員資料。另外 Game Setting 係夢境，純屬創作，當然唔會符合史實。

（5）點解咁睇唔開，放作品上連登？
之前我有玩 itch.io 嘅 Game Jam，感覺上參加者都定位自己做「藝術家」，注重遊戲氛圍而唔係娛樂性，所以我收唔到有意義嘅意見。希望各位可以集中批評隻Game有咩唔好玩，等我可以修正開發方向。

（6）佳仔好短，玩一陣就收皮。點解牧師可以玩幾年，我哋玩得10分鐘？
呢個Project係用嚟測試遊戲機制，得兩隻Boss，冇乜點做Level Design，所以正常10分鐘爆機。我預計8月31日會有一次更新，加入新關卡同機制，之後再諗繼唔繼續開發。

歡迎各位評論
如果你都有寫Game，可以放你嘅作品上嚟（半成品都得），我會盡力俾意見 。
如果多人嘅，我可以喺 itch.io 開個private game jam俾大家交流吓。

如有類同
實屬巧合

Lm 樓主好有心

推一推 Post

雖然冇乜人玩，但係我會繼續開發，反正呢個 Project 嘅主要目的係儲唔同遊戲機制嘅 C# Script／Unity Assets。

下次更新：8月31日
新增第一關第三節「地鐵」
新增機制：玩家角色上 Buff/ Debuff，持續傷害，召喚物（自動攻擊）

其實我唔太滿意第一關。近戰嘅打擊感太難整，唔適合做主要攻擊手段，所以我加咗追蹤／大範圍遠攻，最後搞到隻 Game 不倫不類。如無意外，「地鐵」係第一關嘅最後一節。第二關會係雙軸射擊，避開近戰嘅問題。