Machico(帝皇)
2024-07-15 19:49:08
成日話香港做騎師係優差,其實除咗豐厚獎金及馬主打賞之外,策騎費都是另一項收入,事關現時騎師每匹馬出場費為2,300元,若然某位騎師一季出賽500次,策騎費已收過百萬,不過當中1,000元要支付結馬會作騎師基金。當然唔係個個都有咁多錢落袋,以剛季出賽只92次嘅華將陳嘉熙為例,全季策騎費除卻馬會費用,實際只有約12萬落袋。
至於見習生,每次策騎費則為1,250元。
Machico(帝皇)
2024-07-16 10:39:08
昨日冠軍之戰,呂健威先落後情況下奇跡反先伍鵬志,堅係馬迷奇遇記,有今生、無來世喇,以往爭冠軍真係好少鬥到最後一兵一卒,對上一次已經係12/13馬季嘅葉楚航喇!
講番當年馬季煞科戰係跑快活谷,好多馬迷專程入場睇葉楚航VS告東尼,搞到馬場「掛紅旗」,大家好耐冇見過咁墟冚場面了。講番當晚戰況,賽前葉楚航係以2W領先緊告東尼,不過告仔同伍鵬志一樣,當晚先聲奪人,憑住「牛精仔」及「權駿精英」連贏兩場,頭馬數字一下子追平了葉楚航,仲以較多亞軍反壓後者。
去到全季最後一場賽事,葉楚航出賽嘅「勁飛翔」必須要贏先可以反先告仔,呢隻馬之前連勝兩仗,用蘇狄雄熱到1.9倍大熱門開跑,直路透出後,得一隻韋達「紅駿」追佢,結果都係追唔到,航哥埋單以69W成功絕殺告仔奪冠,而同樣當晚做冠軍騎師嘅韋達,賽後同航哥合照添!
大家睇番當晚啲相,航哥真係high到不得了,又噴香檳又高舉獎盃,仲揮舞埋勝利旗幟添,在旁仲有當時仍在生的簡炳墀,簡SIR親眼見證徒弟成為另一位華倉冠軍,相信都老懷安慰。