更新日期： 2024年7月14日週日 上午10:59
前美國總統特朗普當地周六晚喺美國賓夕法尼亞州拉票時，被埋伏附近嘅槍手開槍射傷，特朗普表示自己冇大礙，當時感到右耳上方被擊中。槍擊事件至少有一名民眾喪生，而涉嫌槍手亦已經死亡。
今年美國將舉行大選，特朗普遇刺事件震驚全球。事發後有網友搵到今年過年前，命理專家楊天命為杜汶澤網上節目做嘉賓講龍年運程嘅片段，原來楊天命師傅一早講中特朗普會出事。
楊天命喺節目中提到，生肖屬狗嘅特朗普喺龍年犯太歲，但就有機會再當選美國總統。不過楊天命同時補充，特朗普「會有生命危險」。杜汶澤隨即追問會發生咩事，仲話會唔會好似已故美國總統甘廼迪咁中槍，楊天命就舉出3個可能︰心臟問題、腸癌以及開槍事件。杜汶澤話呢3個可能範圍好闊，楊就回應「點闊呀！呢3樣嘢好難中架大佬！」。結果楊天命又真係不幸言中，好在特朗普冇生命危險，唔少網民都留言讚師傅好準。至於特朗普會否一如楊天命所講真係再次當選？11月大選後自有分曉。
