「幫我頂咗張演唱會飛，三萬蚊！」
「一張飛要三皮野，呢隊野識飛架？」我諗緊都諗唔明，會有咩人用幾萬蚊買兩個鐘嘅快樂。
「你識條鐵咩，呢對係「DIVE」啊，出邊有錢都未必搶到佢d飛，唔好講咁多廢話，係兄弟就幫我頂咗佢。」
大家好，我係呂峻，細細個嘅時候，daddy Mammi唔好彩係一次旅行入邊失咗蹤，到今時今日都無人調查到當時發生咗咩事。不過呢件事之後，我就繼承咗父母留落嚟嘅遺產，如果唔敗家嘅應該都夠洗夠用幾代。唯一嘅親人就係照顧我屋企嘅管家 - 黃叔，通常我都叫佢做Uncle Wong，平日都係同我係同一間屋一齊生活。
講返叫我頂張飛個嗰，就係同我由細識到大嘅兄弟 - 啊景。佢係一個不折不扣嘅富二代毒男，平日嘅生活都係打機同埋追星，基本上所有女團嘅資訊都會留意，喺眼花撩亂嘅女團之中，佢最鐘意嘅就係最近嚟香江開演唱會嘅「DIVE」。
「賣返張飛俾黃牛未得，都係打個和唔洗蝕。」對於一個唔追開星，亦唔睇娛樂新聞野嘅人嚟講，呢張飛請我我都未必會去睇個演唱會。
「唉～我突然有事去唔到，又唔想急賣益咗班黃牛黨。但係唔賣出去，我偶像見到個VIP位空咗實會好傷心。」佢拎住張飛，捉住我對手，好誠懇咁望住我。
「又要捱多次義氣幫你頂咗佢。你下個月去法國出差，記得買返枝靚紅酒返嚟補償返俾我。」我搖搖頭，輕嘆一聲。識咗咗多年，拒絕唔到唯有就應承咗佢。
「幾時都話你係最好架啦。啊！呢度仲有塊我自己整咗好耐嘅應援牌，本身諗住當日入場嘅時候show俾佢睇，而家交俾你啦。記得到時幫我拎埋去舉牌支持偶像。唔講住，我返公司整野先，下次再約」終於放下心頭大石嘅佢，好瀟灑咁頭也不回咁走咗去。留底俾我嘅就只有一張演唱會飛同一塊剪剪貼貼咗好多大頭照嘅應援牌。
「你自己整架？估唔到你會追星喎！」Uncle Wong用帶住少少調戲嘅語氣同我講。
「唔好提啦，張飛係啊景佢臨時有嘢做去唔到，叫我代佢去。」
「你就好啦，有得去睇女團，好多人想睇都買唔到飛啊！」佢邊講邊笑。
「無你咁好氣，我入房整野。」
由於個演唱會係七月頭舉行，距離而家仲有成大半個月。張飛就隨手放咗落書房個櫃桶入邊。而個牌就攝咗個櫃罅之間。而我亦上網搜索下呢隊女團嘅背景，起碼最少知道佢地嘅基本資料都好。呢隊係由六位少女組成嘅女團，成員普遍都係廿十頭，同我差唔多大。當中有一個笑容都幾甜，原來就係佢地嘅隊長 - 裕珍。八卦完一陣我就開咗佢地嘅專輯嚟聽，聽聽下就訓著咗。
時間過得好快，好快就到咗演唱會個日。
當日啊景一早就打電話提醒我記得要去演唱會，又提我一定要拎埋個應援牌去。我係屋企睇下電影、聽下歌。hea下hea下，無睇時間，原來仲有一個鐘就開show。我快快手換衫白色tee shirt同牛仔褲就落咗停車場拎車。
「I'm on my wayyyyyyyy...」隨手點播咗其中一首歌。首歌旋律十分輕快，雖然我唔識韓文，但係靠歌入邊個幾句歌詞，又有galaxy，又有bigbig stage，我估應該係講唔好睇少自己，鼓勵自己嘅歌。我亦都有跟住歌詞哼咗幾聲。聽到自己哼歌，我忍唔住打咗個冷震。
泊好車之後，由正門入口進入咗場館入邊。場館入邊實在係十分墟冚，每個人都拎住一塊二塊嘅應援牌，亦唔少人手持住一d著燈嘅應援棒。跟住人流慢慢迫入去，好快就入到VIP位嘅通道口。係入口巳經聽到場內播放緊佢地嘅歌曲，無聽錯應該係啱啱車入邊聽個首嚟，呢首應該係佢地嘅主打歌之一。
看台嘅設計係面向觀眾，而我坐嘅位就係正前方嘅第一排，幾乎伸手就掂到個舞台。對上一次去睇演唱會應該係細個嘅時候，俾媽咪迫咗去一齊睇雙子女團嘅演唱會，個時香江最出名女團就係佢地。估唔到過咗咁耐，竟然會係自己一個去睇女團演唱會。
隨住愈嚟愈接近開始嘅時間，場內嘅人數同埋氣氛都變得熱鬧起嚟，望住看台周圍環境，有唔同嘅人開始大叫自己喜愛嘅偶像。
眼角見到坐咗係我後一排嘅一個男人，佢頭戴住咗一頂鴨咀帽，雙手放咗入身前嘅大斜孭袋入面，唔知係咪放咗好多應援物品係入邊呢！
「10！9！8！...5！4！3！2！1！ 歡迎嚟到「Dive」嘅第一個世界巡遊演唱會！」
舞台緩緩地升起，六個黑影由蒙蒙朧朧變得清晰可見。場內嘅歡呼聲亦愈嚟愈高漲。隨著一首又一首嘅歌曲表演，我亦都投入一齊歡呼叫囂，將啊景整嘅應援牌高高舉起。
中間有幾段休息環節，唔同成員都用唔鹹唔淡嘅廣東話同在場嘅觀眾打招呼同互動，令到氣氛去到頂點，佢地分享咗嚟到香江食咗啲咩美食，同埋收到後援會送俾佢地嘅夾公仔機。
時間好快到咗尾聲，呢首歌亦係佢地近期嘅一首主打歌曲，不過歌曲風格引起咗另一個國籍嘅國民不滿。不過係場內嘅人都係女團嘅忠實粉絲，無俾呢件事影響。全場人都好興奮咁跟住首歌咁大聲唱。呢首歌就快完結之際，突然留意到後排個個奇怪男人嘅袋入邊反射咗d光出嚟。究竟放咗啲咩係袋？音樂停止咗之後，台上六位成員一字排開咁係舞台前邊同台下聽眾揮手拍照。
「去死啦你地！」個位男人係袋中抽出一把小刀，快速翻過最前排嘅櫈衝上看台。由於最前邊係VIP位，個個位係無安排保安睇住，個嗰男人好輕易就衝咗上台。台上嘅六名女團成員驚惶大叫，企係我正前邊看台上嘅就係裕珍。個個男人露出凶狠嘅眼神望實裕珍，一步一步慢行迫近，係快將接近之際，伸出小刀作出向前刺嘅動作。
「啊！！！」係最危急嘅情況下，唔知係啲咩野驅使我有咁嘅勇氣，翻過看台上去，用應援牌擋住小刀嘅刺擊。成功擋住刀仔之後，我順勢將男人壓倒在地下，再用牌壓制住佢。其間台下幾位保安都好快衝上嚟幫忙壓制住個嗰男人，而其餘五位女團成員好快就入咗後台躲避，只有裕珍仲留係台上，帶住受驚嘅眼神望住兇徒。
我慢慢起身，步向裕珍嘅方向，諗住同佢講聲「唔洗驚無事啦」，不過係我開口之前。
「你有無事啊？」佢蹲低半身，好溫柔咁用英文關心我，雙手輕掂住我嘅腰部。
「我...我...我無事嘅無事嘅。」第一次同女團偶像咁近距離接觸，皮膚白到好似雪咁，水汪汪嘅眼睛望實你，我緊張到面都紅曬。原來真人同睇相嘅感覺係完全唔同，個種面對面嘅對視，同平日係照片螢幕見到嘅係兩回事嚟，慢慢個頭有少少暈嘅感覺。
嘭一聲，我暈倒係台上邊。原來小刀個下刺擊，刺傷咗我肚嘅左側，鮮血不斷由傷口入邊流出。裕珍雙手都沾到我傷口嘅血，聲音抖陣咁大聲求救。眼前慢慢地變到一片黑暗。救護員將我抬上擔架送到醫院入邊。
「喂喂！快啲起身啊！唔好有事啊！」