啲人話呢兩科嘥時間、冇用，又陳義過高，唔應該逼全部中大學生讀
但其實入面好多內容對成為一個現代社會公民係好基本同好重要
中大呢兩個課程唔係坐定定教你「甚麼是幸福」、「甚麼是民主」
而係透過 閱讀經典->討論交流->歸納反思 呢三個步驟去學習，而呢個學習係可以透過日後經歷同反思持續到終生
經典文本唔係用嚟話畀你聽答案，甚至呢啲經典既睇法放喺現今主流學術界都係有錯漏或者缺陷
先講《與人文對話》（FH）
FH主要分為三個部分：
尋找自我價值（幸福、人倫道德規範同道）
形而上學（心經導讀、聖經同古蘭經）
人類理想社會（民權、民主、資本同財產異化）
P.S. 以2015或之前課程為準
第一部分令你反思點樣追尋幸福，點樣約束自己行為同點樣從苦難中解脫達致消遙
第二部分令你認識到人類認知既極限，亦即形而上既存在
第三部分令你反思何為民主同理想社會：
到底民主係咪單純少數服從多數？
少數既聲音需唔需要尊重？
到底勞動異化係咪真實存在？
如果真係有民主，係咪應該等佔大多數既工人決定點分資本家既財產？因為資本家既財產好多靠剝削工人得嚟
上面都同個人心靈同現代社會有密切關係
呢十年既雨傘運動、魚蛋革命同反送中，其實我完全見唔到有任何關於民主本質既討論
結果好多人就以為香港一切問題有民主就解決到
甚至有人覺得泛民主派贏選舉就係民主
香港人講到民主咁重要，大部分人都想要民主
但同時又覺得大學讀呢啲野係離地同冇用
會唔會有啲矛盾呢
仲未計大學讀某程度係大學生算係社會入面最有能力學習嗰批
佢地有人將來會做老師教書、有人會做統治者，亦有人會做抗爭者
好難個個人都直接學習到以上內容
但目前條件下由最有學習能力既大學生學習係最乎合效益
又要民主又唔願意理解民主本質
咁樣就算他朝民主喺個天跌落嚟，都會演變成多數人暴政
而且呢啲內容就咁睇書係唔夠，要結合討論同個人閱歷、反思
有以上既基礎，先會明點解民主國家會有選舉人制度同比例代表制
另外好多人讀完書出嚟做野成日同人比較，覺得自己唔開心
其實望返會唔會係自己未夠了解何為幸福，結果喺啲無關痛癢既地方不停兜圈，自尋煩惱
仲有好多好多野大個之後睇返都覺得呢個學習經歷好重要
個人認為小學讀佢未必會理解到內容、中學讀可能會增加佢地入大學既壓力
去到入大學叫做上咗岸既時候讀又被人話離地
出嚟社會做野，放工就冇晒心力去學，身邊又好難搵到人同你理性討論
咁到底要點樣先可以唔學又可以確保下一代可以掌握到個個講到咁重要既野呢？
