新政兩年｜金融女轉戰GO24健身室 打破硬銷模式 月收百萬淨利潤

「GO24」 Fitness是一家24小時健身室，聯合創辦人陳匡俐（Trudy）其實早於6歲已移民到加拿大，大學畢業後，轉戰美國從事金融投行工作。在17年前她回流香港延續房地產投資，適逢經歷08年金融海嘯，她深覺紙醉金迷世界與自己格格不入，決定毅然退出。之後她誕下兩名女兒，發現香港地難以找地方予孩子玩樂，因而她萌起創業念頭，並在2013年自立門戶，開設了室內遊樂場。

傳統健身室捆綁式合約留客體驗差

之後再在一次機緣巧合下，Trudy遇上另一名生意拍擋Martin Barr，二人觀察到以往的香港健身室多以捆綁式合約留客，覺得體驗甚差。「其實當時自己返到香港，見到香港傳統做GYM Room會SELL好多會籍，又要長期合約，一簽就要簽兩年甚至十年都有，好誇張。」

有見及此，二人覺得自由度相對較高的24小時健身室，應該大有可為，故他們便決定投資逾千萬，踩入健身界。「我哋想啲客只要每月畀月費，就可以隨意用機。唔會有教練無啦啦走埋嚟，SELL你跟佢操。我哋想JOIN堂就自由報名，唔好咁多束縛。」而直到2018年，「GO24」Fitness，便從此誕生。

分店每月淨利潤達六至七位數 兩個月內回本

而市場調查數據亦證明，Trudy雖告別投行工作，但對市場觸角仍然敏銳。按業界《香港健身Guide》調查報告所得，香港24小時健身室數目，由在疫前2018年僅有9間，急升至2023年10月的214間，五年左右增長逾22倍；另邊廂，傳統健身中心則相形見絀得多，單在2023年，其倒閉或暫停營業場所高達136間。

要扑中疫情期間可逆市發圍的行業，已殊不簡單。更巴閉的是，Trudy自2018年開店起，至今已有9間分店，每間分店保守計，在兩個月內已可回本。被問道每間分店每月淨利潤，能否達至六至七位數，她更毫不遲疑道：「呢個係基本一定要㗎！」據其透露，目前「GO24」Fitness坐擁數千名會員，年齡層以20至40歲佔多數。

覷準缺口進攻CBD 趁租金大瀉租與置地為鄰

要創得如此驚人利潤，食時勢及食腦，同樣缺一不可。Trudy稱，「GO24」Fitness在疫前已開始默默耕耘。疫情間，眼見不少傳統健身室因不時要停業，難負擔租金及大量教練人工而相繼倒閉。「GO24」Fitness便覷準健身市場缺口，開始進行逆市擴充，進駐九龍、新界區人流較多私人住宅或商場區。「尤其疫情個陣少咗人返工，疫情緩和啲嗰陣，屋企附近有GYM Room，就可以方便啲客一落樓就做到運動。」

疫情雖打擊本地經濟，但有危亦有機，正正就因為商舖租金下跌，「GO24」抓緊商機，進軍CBD（核心商業區），再另設較高端副線「ONYX」健身室，力攻商業區的上班一族。翻查資料，在今年年頭，「GO24」Fitness以月租190萬，殺入中環核心商業區中建大廈約1.9萬平方呎地庫巨舖，與置地為鄰，其平均呎租約100元，租金較高峰期跌逾五成。

店舖選址面積大 設計花心思

市面上普遍24小時健身室面積僅約5000平方呎，而「GO24」Fitness場地面積普遍約一萬平方呎起，至最大可達約兩萬平方呎，為顧客帶來適度空間感，同時亦能放置更多不同類型的器材，供其使用。「唔會俾會員係度運動覺得好迫，一定要舒服同埋乾淨。」

同樣地，公司也花了不少心思在店舖設計上，每間分店都有本港元素。「好似黃大仙分店有隻獅子，因為有獅子山；太古分店就有sugar machine（太古砂糖）。」另外，公司起名「ONYX」縞瑪瑙，屬一種堅硬寶石珠寶，當然背後暗藏巧思，「起呢個名就係希望會員係呢到做完運動，之後變到一樣咁strong！」她笑著說。

「雙招」力拼北上 拒HARD SELL靠服務企穩

而談到會費，她則表示一分錢一分貨。「有啲公司手288蚊一個月（會費），我哋就冇咁低，要五百幾六百蚊，但入面已經包埋健身課堂同教練指導，明碼實價無額外收費。」誠然，24小時健身室已成香港主流，面對芸芸對手，Trudy稱，成功吸客不能單靠「操機」，健身室更要搞搞新意思。「要More Special（特別），有吸引嘅課程可以上，俾客人有得揀，唔係嚟到淨係做機。」

為此，「GO24」Fitness每間分店，每日會設計至少2至3節健身課堂，包括近年流行的HIIT（高強度間歇訓練）、空中瑜伽、K-POP流行舞蹈課程等，供會員免費參與。不同於傳統健身室，有大量教練「溝客」推銷及跑數的情況出現，Trudy表示，公司現時只有18名教練在9間分店遊走，主力是教班或指導會員正確使用機器，集中火力在教學上，貴精不貴多。

對Trudy而言，「服務好」其實才是吸客的長久之道。「市面咁多選擇，好似朋友成日都話去深圳食飯啲服務好好咁，會係其中一個北上原因。所以我覺得所謂服務之道，就係客人俾得起個價錢，就要有返相應quality（質素）。」

租金支出佔多 智能化設備助慳成本

然而，乍聽24小時健身室，經營時間較長，以為電費、冷氣費等費用一定是天價。但Trudy搖頭指，其中只有冷氣費支出較多，部分分店已裝設智能化冷氣，「半個鐘度感應唔到有人就會自動熄機，都慳到電。」

至於人工支出，由於教練人數少，故人工支出亦能控制在整體公司支出兩成以下。而在寸金尺土的香港，Trudy不免感慨稱，在公司佔最大支出仍是租金，「依家我哋對租金支出Target goal（目標），係想唔多過整體公司支出嘅百分之30至40。」

只是健身室24小時開放，在凌晨時段沒有職員在場，不免令人擔心其安全問題。但原來「GO24」Fitness場內會有閉路電視拍攝現場環境，若客人發生意外，店內有求救按鈕可以聯繫負責同事，會儘快幫忙協助。

望開拓特許經營新模式

許多人在疫後培養規律運動習慣，24小時健身中心隨之崛起。Trudy稱，疫情期間有兩間大型連鎖健身中心倒閉，除了造就健身市場缺口，亦令不少健身教練乘勢而起自行創業，這正解釋了市面上24小時健身室火速開設的原因。不過，經營健身室並非只是「擺兩部機」，便可以「財源滾滾來」。過往為保證健身室有良好服務質素和環境，Trudy表示，公司一直沿用直營模式營運。

但隨著公司質素已趨穩定，她透露近期正考慮開拓特許經營模式，並會其交由具經驗拍檔營運。她樂觀指，「公司開咗6年，我覺得都係一個適合時間，始終做Franchise（特許經營），又係另一門學問。」

重點如下：
1: 分店每月淨利潤達六至七位數 兩個月內回本
2: 透露近期正考慮開拓特許經營模式

補充說明：
24小時健身室數目，由在疫前2018年僅有9間，急升至2023年10月的214間
五年左右增長逾22倍
傳統健身中心，單在2023年，其倒閉或暫停營業場所高達136間

展望： 有人接手特許經營

Chat GTP 稿？

無端端同人講自己有盤生意好好搵，知咩料啦

如果真係每間分店月賺6至7位數 點解唔每個月自己開多一間分店
係咪賺夠係時候比人賺吓

完全未聽過依間野 想搞特許經營搵水魚

火棒嘅味道

Go24 好耐啦
仲有兩間係甲級寫字樓

搵緊水魚加盟特許經營

基本呢類健康室係無護城河

笑死，係咪蝕到頂唔住

搞特許經營 佢就賺硬，投資者死啫 真係識做生意

Pure定GO好d

賺夠益人

Check左官網有得許經營

好人

"......按業界《香港健身Guide》調查報告所得，香港24小時健身室數目，由在疫前2018年僅有9間，急升至2023年10月的214間，五年左右增長逾22倍......"

呢個市場好快飽和，仲有幾多增長空間？

收左錢說好香港故事

飽和? 個頂即係幾多?
大埔間247多人到嘔，我不知幾想有人會開多間

目前「GO24」Fitness坐擁數千名會員。
我哋就冇咁低，要五百幾六百蚊
收入當10,000會員600一位,月入600萬

今年年頭，「GO24」Fitness以月租190萬，殺入中環核心商業區中建大廈約1.9萬平方呎地庫巨舖。
間間都1-2萬呎，其他8間當1萬呎40呎租，8間月租金開支共320萬
9間加埋510萬

公司現時只有18名教練在9間分店遊走。
當人工勁平加冇其他後勤。18*3=54萬

600-510-54=36萬 計埋其他開支折舊，真係有可能搵到錢咩

想特許經營收特許費、月費、器材裝修食水，然後按會員使用時間俾番少少錢