我同我太太Sara結咗婚差唔多三年，我真係好愛佢。唔想講得咁肉麻，但佢真係我另一半，我想象唔到自己會同第二個女人一齊。
結婚之前，我已經明確表示我唔想要小朋友。當時佢似乎同意咗，我以為咁樣就算。但結婚一年半後，佢又提起要小朋友嘅問題。佢問我想唔想要，我話唔想。佢嗯咗一聲，我哋就繼續做之前嘅嘢。呢次唔算係嚴肅嘅對話，只係一個奇怪嘅問題，但我無留意佢。
前陣子佢嘅書架壞咗，所以我訂咗一個新嘅。我想趁佢唔喺屋企嗰陣搭好，然後擺好啲書，等佢返嚟嗰陣有個驚喜。搬書嘅時候，我發現咗佢以前嘅日記，我即刻微笑，翻開咗。大學嗰陣，佢成日帶住本日記。嗰本係佢計劃將來用嘅notebook，如果佢想要啲咩，佢都會畫出嚟，加啲剪貼，做到好細緻。佢大學時候同我講過想讀博土，show咗呢本日記俾我睇，當時我都驚訝佢嘅細心。記得當時我哋只係year 2，但佢已經清楚知道自己想做咩，讀咩，將來想去邊。
我翻睇呢本日記，回想過去。我冇預期會有新嘢，至少唔會有啲我未同佢一齊經歷過嘅。但當我打開嗰陣，我見到一樣我從未諗過會見到嘅嘢。有一部分專門講懷孕同準備迎接新生命，佢研究咗產前維他命，我哋嗰區嘅婦產科，仲有bb搖籃嘅圖等等。雖然只有兩頁，但我覺得好難受。喺我心入面，佢寫呢啲嘢只有一個原因：佢想要小朋友。
我當然好掙扎。我不斷同自己講，我一直都坦白我想要啲乜，如果佢唔同意係佢嘅問題。但諗到佢可能因為想迎合我而自己受苦，放棄佢想要嘅生活，我頂唔住。佢一返嚟我就同佢對質，之後發現情況比我諗嘅嚴重好多。
Sara的確想要小朋友，但佢話佢更珍惜我哋嘅關係，願意妥協。我問咗佢無數次係咪真嘅，我真係想佢誠實，唔想佢覺得需要忍受。佢堅持話唔要小朋友對佢嚟講唔係大問題，但我仲係喺度追問。我唔明白點解佢會喺咁重要嘅日記入面寫啲對佢來講唔重要嘅嘢。我哋傾偈期間，佢突然爆出一個大新聞。
佢話佢一年半前做咗墮胎手術。佢好似覺得我應該覺得鬆一口氣咁，好似佢需要啲證據嚟證明佢所講嘅，即係唔要小朋友對佢嚟講唔係大問題。
我唔能夠形容當時嘅感覺，仲有我依家仲感受緊嘅嘢。我可以講，我從未大發雷霆過。我冇郁手打佢，我永遠都唔會，但嗰次對話真係唔好受。我只記得感到傷害，因為佢冇同我商量咁重要嘅決定。佢去做咗咁大嘅手術都冇同我講，而我竟然連件事都唔知。做咁大嘅手術應該有副作用，佢應該要休息幾日，身心都會受影響。我點會冇察覺到呢啲跡象呢？我依家仲係自責緊。我記得佢問過我想唔想要小朋友，但之後嗰禮拜我完全唔記得佢嘅情緒狀態。我真係有幾關心佢？
我依家都唔想要小朋友，但我寧願斬咗我自己嘅左手都唔想佢再墮胎，尤其係而家佢話佢唔係真係反對要小朋友。如果咁可以令佢唔使再經歷咁激烈嘅事，我願意養個小朋友。
我過去一個半星期一直住喺我家姐度。我需要一啲空間諗嘢，所以我走咗。我想見佢，問佢依家好唔好，但我唔知道應該點做。我對佢同對自己都仲係好嬲，我唔想再同佢大吵一場。我諗第一次已經嚇壞咗佢，我唔想再咁樣。我家姐覺得我小氣，因為我喺度懲罰緊我太太，對於一件我反正會同意嘅事。但我唔會同意墮胎。我唔知。我係咪錯咗？
